Da nqataxac da huo'o ca nalolaxa maye hualec na no'oc
1Nache Ñim Nataxala' 'enapega so Moisés qataq so Aarón, 'eeta':
2«Ca shiỹaxaua da huo'o ca lalaache na lo'oc, huo'otaq da nasheguem na lo'oc, huo'otaq da chiỹaxatapega't, nache camaye iuen da qaỹauegueua'a ñi ntaxaỹaxanaxanec Aarón huo'otaq ca 'oonolec nam chegoxoguetpi ñimaye. 3Nache ca ntaxaỹaxanaxanec imeten que'eca nasheguem nhuetac. Qaq da ỹapagaq ana laso ca huaña que'eca nhuetac qataq coxongui, qache nachena na nhuetaxanaxa maye nchega naqa'en na no'oc. Qaq da ime da imeten ca ntaxaỹaxanaxanec que'eca shiỹaxaua, nache da'aqtaxanem da saishet da qui'itta.
4Qaq da ỹapagaqapeqa't na nasheguem na lo'oc, qalaxaye saishet da coxongui, qataq saishet da lapagaxai ana laso, nache ca ntaxaỹaxanaxanec iỹotauga camaye caua siete na'axa'te. 5Qaq da inoxoorec caua siete na'axa'te, nache qaltaq imeten. Qaq da saishet da nquictauec que'eca nhuetac, nache qaltaq iỹotauga camaye caua lỹa't siete na'axa'te. 6Nache da inoxoorec caua lỹa't siete na'axa'te, nache ỹoltaq imeten. Qaq da ila'a da nquictañi qataq saishet da nquictauec que'eca nhuetac, nache ca ntaxaỹaxanaxanec da'aqtaxanem da mashe qui'itta camaye, cha'aye choche nasheguem na lo'oc. Nache que'eca shiỹaxaua iỹoi' caua alogo, qataq nache qui'itta.
7Qalaxaye da qaltaq nquictauec ca nasheguem na lo'oc ca dalolaxaic, da mashe ime da imeteetac ca ntaxaỹaxanaxanec, qataq mashe da'aqtaxanem da no'oita, nache camaye iuen da qaltaq taua'a ca ntaxaỹaxanaxanec da yaqto' ỹoltaq imeten. 8Qaq da ime da imeten ca ntaxaỹaxanaxanec que'eca dalolaxaic, nache da ila'a da mashe nquictauec aca nasheguem na lo'oc, nache camaye da'aqtaxanem da saishet da qui'itta que'eca shiỹaxaua, cha'aye huec na nhuetaxanaxa maye nchega naqa'en na lo'oc.
9Qaq da huo'o ca shiỹaxaua da nchega na lo'oc, nache camaye iuen da qaỹauegueua'a ca ntaxaỹaxanaxanec. 10Nache ca ntaxaỹaxanaxanec imeten camaye, da huo'o na lalaache na lo'oc, qataq ỹapagaq naqa'en ana laso, qataq chetaña na lapat, 11qache nachena na nhuetaxanaxa maye nchega naqa'en na no'oc. Qaq ca ntaxaỹaxanaxanec, nache ỹa'axat da saishet da qui'itta cha'aye mashe quichigui da lalolaxa, qataq camaye sa iuen da qaỹapoua'a, cha'aye mashe qaỹaỹaten da saishet qui'itta.
12Qaq da huo'otaq sa ilaua'ague na nasheguem da ivira'a da ỹataqta imoota na lo'oc chegoqchiguiñalo naua lapia'ate, nache ivirasheguema na lqaic, 13qaq ca ntaxaỹaxanaxanec, nache imeten que'eca shiỹaxaua. Nache da ỹaỹaten da choche npa'aỹasheguem na hualec na lo'oc, na'aictaxa da imoota, nache ỹa'axat da qui'itta. 14Qalaxaye ca na'a'q da qaltaq ñe'eguelaxasheguem ca lhuetac, qataq yo'oqchiguiña na lapat, qache camaye saishet qui'itta. 15Nache ca ntaxaỹaxanaxanec imeten na lo'oc camaye, nache camaye ỹa'axat da saishet da qui'itta, cha'aye da yo'oqchiguiña na lapat, nache ỹaỹaten da nachera da nhuetaxanaxa maye nchega naqa'en na no'oc.
16Qalaxaye da ỹe'eguelaxa da ỹapagaq que'eca nhuetac qataq yo'oqchiguiña na lapat, nache que'eca dalolaxaic iuen da taua'a ca ntaxaỹaxanaxanec, 17yaqto' camaye imeten. Qaq da ila'a da ỹe'eguelaxa da ỹapagaq que'eca nhuetac, nache camaye da'aqtaxanem que'eca dalolaxaic da mashe qui'itta.
18Qaq ca shiỹaxaua da huo'o ca lalaache na lo'oc, da ivira'a da maiche no'oita, 19qalaxaye da ñaq huo'o na lalaache, qataq huesottega't, huo'otaq ỹapagaqalec ca lliguiñi, nache camaye iuen da taua'a ca ntaxaỹaxanaxanec. 20Nache ca ntaxaỹaxanaxanec da ila'a da coxongui ca lliguiñi que'eca nhuetac, qataq ỹapagaq ana laso, nache da'aqtaxanem que'eca dalolaxaic da saishet da qui'itta, cha'aye ỹaỹaten da huec da nhuetaxanaxa maye nchega naqa'en na no'oc. 21Qaq da ila'a da qaca aca laso lapagaxai que'eca lliguiñi aca'aca nhueta, qataq saishet da coxongui, nacherata da maiche nquictañi da imiguiñi, nache camaye iỹotauga que'eca shiỹaxaua caua siete na'axa'te. 22Qaq da nquictauec aca nasheguem lhueta na lo'oc, nache ca ntaxaỹaxanaxanec nacherata da da'aqtaxanem da saishet da qui'itta que'eca shiỹaxaua. 23Qalaxaye da saishet da nquictauec acamaye, da choche no'onañi ca lliguiñi aca'aca nhueta, nache ca ntaxaỹaxanaxanec da'aqtaxanem camaye da qui'itta.»
Da nqataxac da huo'o ca ỹavic shiỹaxaua
24«Qaq da huo'o ca ỹavic, qataq ỹataqta toc ca huaña ca lavigaxa, 25nache ca ntaxaỹaxanaxanec imeten camaye. Nache da ỹapagaq ana laso que'eca huaña ca lavigaxa, qataq da coxongui, nache ca ntaxaỹaxanaxanec da'aqtaxanem da saishet da qui'itta camaye, cha'aye huec da nhuetaxanaxa maye nchega naqa'en na no'oc. 26Qaq da imeten ca ntaxaỹaxanaxanec ca lavigaxa camaye, qaq da ila'a da qaca aca laso lapagaxai, qataq saishet da coxongui, nacherata da maiche nquictañi da imiguiñi, nache camaye iỹotauga que'eca shiỹaxaua caua siete na'axa'te. 27Qaq da inoxoorec caua siete na'axa'te, nache ca ntaxaỹaxanaxanec ỹoltaq imeten, nache da ilalec da huo'o na hualec que'eca lavigaxa qataq nquictauec, nache camaye da'aqtaxanem da saishet da qui'itta que'eca shiỹaxaua. 28Qalaxaye da saishet da ila'a da nquictauec ca hualec que'eca lavigaxa, nacherata da nquictañi da maiche imiguiñi, nache ca ntaxaỹaxanaxanec da'aqtaxanem da qui'itta camaye, cha'aye choche lliguiñi ca lavigaxa que'eca no'onañi.»
Da nqataxac da huo'o ca huaigui na naue
29«Qaq ca ỹale qataq aca 'alo da nasheguem aca lhueta na lqaic huo'otaq ana lqa', 30nache ca ntaxaỹaxanaxanec imeten aca nhueta. Nache da coxongui acamaye, qataq qovialec, qataq ñeuec na laỹe laue, nache ca ntaxaỹaxanaxanec da'aqtaxanem da saishet da qui'itta que'eca shiỹaxaua, cha'aye huec da nhuetaxanaxa maye nchega naqa'en na no'oc.
31Qaq ca ntaxaỹaxanaxanec da imeten que'eca nhuetac, nache da ila'a da saishet da coxongui qataq saxanaxa da ỹe'eguelaxa da maiche lo'oxoỹaxac na laue, nache camaye iỹotauga que'eca shiỹaxaua caua siete na'axa'te. 32Nache da inoxoorec caua siete na'axa'te, nache ca ntaxaỹaxanaxanec ỹoltaq imeten aca nhueta, qaq da saishet da nquictauec, qataq saishet da coxongui, qataq saishet da qovialec na laue, 33nache ca ntaxaỹaxanaxanec ỹamaxalec da npetec na laue que'eca dalolaxaic, qalaxaye saishet da npetec ca huaña ca lhuetac. Ime, nache iỹotauga camaye caua lỹa't siete na'axa'te. 34Qaq da ime caua lỹa't siete na'axa'te, nache ca ntaxaỹaxanaxanec, qaltaq imeten aca nhueta, nache da saishet da nquictauec qataq da saishet da coxongui, nache ca ntaxaỹaxanaxanec da'aqtaxanem da qui'itta qataq 'enapega camaye da iỹoi' caua alogo, cha'aye qui'itta. 35Qalaxaye da huo'otaq nquictauec na hualec na lo'oc, da mashe ime co'ollaxa da qaỹa'axatem da qui'itta, 36nache ca ntaxaỹaxanaxanec iuen da ỹoltaq imeten camaye. Qaq da nache nquictauec aca lhueta na lqaic, nache sa iuen da imeten da huo'otaq qovialec na laue, cha'aye que'eca shiỹaxaua saishet da qui'itta. 37Qalaxaye camaye da ila'a da saishet da nquictauec aca'aca lhueta, qataq ỹe'eguelaxa da maiche lo'oxoỹaxac na laue, nache ca ntaxaỹaxanaxanec da'aqtaxanem camaye da qui'itta.
38Qaq ca ỹale huo'otaq aca 'alo da chiỹaxatapega't na lo'oc, 39nache ca ntaxaỹaxanaxanec imeten camaye, qaq da ila'a da chochaq chiỹaxatapega't na lapagaxa na lo'oc, nache ỹaỹaten da qui'itta ca shiỹaxaua.»
Da huo'o ca naañi na laue
40«Qaq ca ỹale da choche naañi na laue nache qui'itaic, qaq camaye qui'itta. 41Qaq da ndotec na latap laue da naañi, nache qui'itaic naqa'en na latap, camaye nataqa'en qui'itta. 42Qalaxaye da huo'o na tocapega't que'eca lqui'itaxa na lqaic, qache camaye huec da nhuetaxanaxa maye nchega naqa'en na no'oc, 43Nache ca ntaxaỹaxanaxanec imeten camaye, nache da ila'a da huo'o na lalaache qataq tocalec, qataq 'eeta'am na nhuetaxanaxa maye nchega naqa'en na no'oc, 44nache camaye ỹaỹaten da que'eca shiỹaxaua ỹoqta 'eesa da hualec na lqaic da nhuetaxanaxa maye nchega naqa'en na no'oc. Nache da'aqtaxanem camaye da saishet da qui'itta.»
Da lataxac na ỹoqta qauem nhuetaxanaxa
45«Qaq ca shiỹaxaua maye huec da nhuetaxanaxa maye nchega naqa'en na no'oc, camaye iuen da colaqta'ape naqa'en caua alogo, qataq dapoche na laue, qataq qapi da nauattalec na lashec, nache ỹa'alaqtai' da huo'o ca taỹa'ague, 'eeta': ‹¡Aỹem nchega na ỹo'oc!, ¡Aỹem nchega na ỹo'oc!› 46Qaq 'enauaque caua na'axa'te da hueta'ac da nhuetaxanaxa maye nchega naqa'en na lo'oc ca shiỹaxaua, nache saishet da qui'itta. Ỹoqo'oye qaiỹotauga da tauga ca pa'auec ca nanataqa' maye qanayiutaña, qataq nache 'oonolec camaye.»
Da lataxac da decoche ca nogoxot
47«Qaq da huo'o ca nogoxot chegaqaigui ca qagueta laue, huo'otaq ca lino da decoche, 48huo'otaq ca no'oxonec chegaqaigui ca qagueta laue, huo'otaq ca lino, huo'otaq ca nogoxoshet chegaqaigui ca lo'oc, 49da huo'otaq huagui ca nogoxoshet na daralalec huo'otaq tocalec da lo'oxoỹaxac, qache nachera da chegaqaigui da nhuetaxanaxa maye nchega naqa'en na no'oc, nache iuen da qaỹachaxana ca ntaxaỹaxanaxanec, 50nache camaye imeten ca hualec que'eca nogoxoshet, qataq nache iỹotauga camaye caua siete na'axa'te. 51Qaq da ivildec caua siete na'axa'te, nache imeten que'eca hualec ca nogoxot, qaq da mashe nquiguec na lcochaxa que'eca nogoxot, huo'otaq ca no'oxonec, huo'otaq ca nogoxoshet chegaqaigui na lo'oc, qache nachera da nhuetaxanaxa maye nchega naqa'en na no'oc, nache que'eca nogoxoshet saishet da qui'itta. 52Qaq ca nogoxoshet da huo'o na lcoche, camaye iuen da qaỹavigaxat, cha'aye damaye nachera da nhuetaxanaxa maye nchega naqa'en na no'oc.
53Qalaxaye ca ntaxaỹaxanaxanec da imeten camaye, qaq da ila'a da saishet da nquiguec na lcochaxa, 54nache camaye damaxasoxoolec da qaiỹouec ca hualec que'eca nogoxoshet. Ime, nache ỹoltaq ỹapoua'a caua siete na'axa'te.
55Qaq da ime da qaiỹouec ca hualec que'eca nogoxoshet, nache ca ntaxaỹaxanaxanec imeten camaye. Qaq da ila'a da saishet da ỹataqta ñeuec, nache camaye saishet da qui'itta, nache iuen da qaỹavigaxat, na'aictaxa da saishet da nquictauec ca lcochaxa, cha'aye camaye saishet da qui'itta. 56Qalaxaye ca ntaxaỹaxanaxanec da ila'a da ñeuec que'eca hualec ca nogoxot da ime da mashe qaiỹotac, nache camaye ncolaxatec ca laỹe que'eca nogoxot huo'otaq ca chegaqaigui na lo'oc, huo'otaq ca no'oxonec maye huo'o ca huagui. 57Qalaxaye da ñe'eguelaxasheguem ca lcochaxa qataq da nquiguec, qaq camaye, nache qaỹavigaxat. 58Qaq ca nogoxot, huo'otaq ca no'oxonec, huo'otaq ca nogoxoshet chegaqaigui na lo'oc maye ñeuec ca huagui da ime da qaiỹotac, nache camaye qaỹe'eguelaxaalec da qaiỹo, yaqto' camaye qui'itta.»
59Qaq 'era da llec ca nogoxoshetpi maye huagui na chegaqaigui na nhuetaxanaxa maye nchega naqa'en na no'oc, ca qagueta laue, huo'otaq ca chegaqaigui ca lino, huo'otaq ca nogoxoshetpi chegaqaigui ca lo'oc, cam ishet da qaỹa'axat da qui'itta huo'otaq saishet da qui'itta.
