Levítico 14

₁Ñim Nataxala' 'enapega so Moisés, 'eeta':

₂«Qaq 'era da llec da qaỹa'axat da qui'itta ca shiỹaxaua maye huec da nhuetaxanaxa maye nchega naqa'en na no'oc. Que'eca dalolaxaic iuen da qaỹauegueua'a ca ntaxaỹaxanaxanec, ₃nache camaye ỹauegueuga ca pa'auec ye nanataqa' maye qanayeetaña da yaqto' imeten. Nache da ila'a da mashe no'oita na lo'oc, ₄nache ca ntaxaỹaxanaxanec ỹamaxalec cam shiỹaxaua maye no'oita, da ndoreuo caua dos qoỹo ña nca'altrauec, qataq qui'itte', qataq ca laỹe aca qo'oipaq pino, qataq ca hualoq laỹe togaxaraic, qataq aca 'oonole naqta na nchegoxosoxonaxat le'enaxat hisopo. ₅Ime, nache ca ntaxaỹaxanaxanec ỹalauat ca 'oonolec caua qoỹo, nache naloqteetelec aca taxaqui 'alhua maye huetangui na le'ec 'etaxat, maye qaỹachegoxotangui ca npaxaatasheguem 'etaxat. ₆Ime, qaq ỹacona ca lỹa qoỹo maye ña nca'altauec, qataq ca laỹe ana qo'oipaq pino, qataq ca hualoq laỹe togaxaraic, qataq aca naqta nchegoxosoxonaqte le'enaxat hisopo. Nache ỹapapiaxa't 'enauaque caamaye, qataq ca qoỹo maye ña nca'altauec, nache iuomaxaayingui ca 'etaxat maye qaỹachegoxotangui ca npaxaatasheguem 'etaxat maye ỹaleeguet na ltago'q ca qoỹo maye ỹalauat. ₇Ime, nache siete da ichegoxolec ca shiỹaxaua maye huec ca qauem nhuetaxanaxa da yaqto' qui'itta, nache ỹa'axatem da no'oita camaye. Qaq ca qoỹo maye ña nca'altauec, nache ỹaxanec da huaỹo.

₈Nache que'eca shiỹaxaua maye nqui'itaxattac, camaye iuen da iỹoi' caua alogo, qataq nachel, qataq npetec 'enauac na laue. Qaq 'era da 'eetec camaye da yaqto' qui'itta. Qaq da ime, nache ishet da inoxoneua'a ca nanataqa' maye qanayeetaña, qalaxaye saishet da netaña ca maiche lpe'l caua siete na'axa'te. ₉Qaq da iviraxatrec caua siete na'axa'te, nache camaye ỹataqta namarecta na laue na lqaic, qataq ana lqa' laue, nashep laue, npe laue qataq 'enauac ana laso na lo'oc, qataq iỹoi' caua alogo, qataq nachel. Ime, nache ỹataqta qui'itta camaye.

₁₀Qaq da ivireuga ca na'a'q ocho, nache camaye ỹaconeua'alo caua dos qagueta llalqa maye qaica ca lque'emaxa, qataq aca 'oonolec qagueta llale maye ñaq 'oonolec vi'i, qataq ca seis kilos y medio ca ỹataqta no'on lsoche na ala na nañiguishec, da yaqto' lachetaqtaxanaqte maye ndaqñiguishec lalegue ca aceite, qataq ca ỹaqauga laỹolec ca aceite. ₁₁Nache ca ntaxaỹaxanaxanec ỹauegueua'a camaye ye ñegueuo ñi npe'l maye huaña naxa da qanauane' Ñim Nataxala' qataq ca lachetaqtaxanaxat. ₁₂Ime, nache ca ntaxaỹaxanaxanec ỹaconeua'a ca 'oonolec que'ecaua qagueta, nache ỹaneuo lỹateuo naqa'en ca laỹolec ca aceite da yaqto' lachetaqtaxanaxat maye sa imauaq da qaỹavigaxat, nache ỹaasheguem da ỹanot Ñim Nataxala'. ₁₃Qataq ipelecot na lqosot ca qagueta huaña naqa'en ye nalaataqa' na shiguiỹac maye qoỹaneuo da qaỹavigaxat. Qaq aca nachetaqtaxanaqte maye sa imauaq da qaỹavigaxat, nache lalamaqte ca ntaxaỹaxanaxanec. Qaq acamaye ỹataqta sa qaishetapec.

₁₄Ime, nache ca ntaxaỹaxanaxanec ỹacona aca laỹe' ca ltago'q aca nachetaqtaxanaqte maye sa imauaq da qaỹavigaxat, nache ỹa'ayingui ana llaxaata, nache ỹa'amen aca aloiguishe ltela da'am, qataq aca aloiguishe llaxaata late'erai, qataq aca aloiguishe lqona late'erai ca shiỹaxaua, maye nqui'itaxattac. ₁₅Ime, nache ỹacona ca laỹolec ca aceite, nache icorelec ca ne'emaxashec lhuaq lauel. ₁₆Qataq ỹa'ayingui ana llaxaata aloiguishe ca aceite maye huetaigui na lhuaq lauel ne'emaxashec, nache siete da ỹe'eguelaxalec da ichegoxogue da pa'aỹa'ague añi nca'atoxonaxalate. ₁₇Qaq ca aceite maye no'onaigui na lhuaq lauel ca ntaxaỹaxanaxanec, nache ỹa'amen aca aloiguishe ltela da'am, qataq aca aloiguishe llaxaata late'erai, qataq aca aloiguishe lqona late'erai, ca shiỹaxaua maye nqui'itaxattac, nache pa'aguiñi naqa'en ca ltago'q ca shiguiỹac maye nachetaqtaxanaxat. ₁₈Nache ca no'onañi ca aceite, ỹa'ameelec na lqaic cam shiỹaxaua maye nqui'itaxattac. Qaq 'era da 'eetec ca ntaxaỹaxanaxanec da yaqto' qaiỹouec ca lalolaxa que'eca shiỹaxaua. ₁₉Ime, nache ca ntaxaỹaxanaxanec ỹaneuo aca nachetaqtaxanaqte maye sa imauaq da qaỹavigaxat. Qaq 'era da 'eetec da nqui'itaxatta ca shiỹaxaua maye saishet da qui'itta. Ime, nache ipelecot na lqosot ca lỹa shiguiỹac maye qoỹaneuo da nachetaqtaxanaxat maye qaỹavigaxatta, ₂₀nache ỹaneuo aca nachetaqtaxanaqte chegaqaigui ana ala ca nañiguishec npa'axatcheguem da ỹachalec añi nca'atoxonaxalate maye mashe huetalec aca lỹa nachetaqtaxanaqte. Qaq 'era da 'eetec ca ntaxaỹaxanaxanec da yaqto' qaiỹouec ca lalolaxa, qataq ỹa'axat da qui'itta que'eca shiỹaxaua.

₂₁Qaq da huo'otaq choxoraq que'eca dalolaxaic, nache camaye ỹaconeua'a ca 'oonolec qagueta llalec da yaqto' lachetaqtaxanaxat, qataq ca napacttelec na dos kilos na ỹataqta no'on lsoche na ala ca nañiguishec maye qairaqneguet na aceite, da yaqto' lachetaqtaxanaxat, qataq ca ỹaqauga laỹolec ca aceite, ₂₂qaq da nalotaleguete da desheenaxanalo caua dos qoto' lta'araiqa, huo'otaq caua qoto' llalqa, nache ca 'oonolec ỹaneuo da lachetaqtaxanaxat maye sa imauaq da qaỹavigaxat, qaq ca lỹa, nache lachetaqtaxanaxat qaỹavigaxatta. ₂₃Qaq da ivireuga ca na'a'q ocho, nache iroua'a ca ntaxaỹaxanaxanec da yaqto' qui'itta, huaña ye ñegueuo ñi npe'l maye huaña naxa da qanauane' Ñim Nataxala'. ₂₄Nache ca ntaxaỹaxanaxanec ỹacona ca qagueta maye nachetaqtaxanaxat maye sa imauaq da qaỹavigaxat, qataq ca laỹolec ca aceite, nache ỹaasheguem da ỹanot Ñim Nataxala'.

₂₅Ime, nache ipelecot na lqosot que'eca qagueta maye nachetaqtaxanaxat, qataq ỹacona ca laỹe' ca ltago'q ca qagueta, nache ỹa'ayingui ana llaxaata, nache ỹa'amen aca aloiguishe ltela da'am, qataq aca aloiguishe llaxaata late'erai, qataq aca aloiguishe lqona late'erai ca shiỹaxaua maye nqui'itaxattac. ₂₆Ime, nache ỹacona ca laỹolec ca aceite, nache icorelec na ne'emaxashec lhuaq lauel, ₂₇qataq ỹauota'a ana aloiguishe llaxaata, nache siete da ỹe'eguelaxalec da ichegoxogue da pa'aỹa'ague añi nca'atoxonaxalate ca aceite maye huetaigui na ne'emaxashec lhuaq lauel, ₂₈Qataq ca aceite maye no'onaigui na lhuaq lauel ca ntaxaỹaxanaxanec, nache ỹa'amen aca aloiguishe ltela da'am, qataq aca aloiguishe llaxaata late'erai, qataq aca aloiguishe lqona late'erai ca shiỹaxaua maye nqui'itaxattac, nache pa'aguiñi naqa'en ca ltago'q ca nachetaqtaxanaxat. ₂₉Nache ca no'onañi ca aceite, nache ỹa'ameelec na lqaic ca shiỹaxaua maye nqui'itaxattac. Qaq da 'eetec de'era ca ntaxaỹaxanaxanec, nache qaiỹouec ca lalolaxa que'eca shiỹaxaua. ₃₀Ime, nache ca ntaxaỹaxanaxanec ỹaareuo caua qoto' lta'araiqa, huo'otaq caua qoto' llalqa, cam ỹaareuo cam shiỹaxaua maye nqui'itaxattac. ₃₁Nache ca 'oonolec ỹaneuo da nachetaqtaxanaxat maye sa imauaq da qaỹavigaxat, qaq ca lỹa nache nachetaqtaxanaxat qaỹavigaxatta, qataq aca nachetaqtaxanaqte chegaqaigui na ala ca nañiguishec. Qaq 'era da 'eetec so ntaxaỹaxanaxanec da yaqto' qaỹapalaxat ca lasouaxashet que'eca shiỹaxaua maye nqui'itaxattac».

₃₂Qaq 'era da nqataxac ca shiỹaxaua dalolaxaic maye huec ca qauem lhuetaxanaxa na lo'oc, qataq da sa ỹañoxot da late'erai aca lachetaqtaxanaqte da yaqto' qui'itta.

₃₃Ñim Nataxala' 'enapega so Moisés qataq so Aarón, 'eeta':

₃₄«Qom mashe qaunoxoñiiua'a ye Canaán, yem 'alhua maye qami' sanema qome da yaqto' qaralamaxache, nache da ivita da huo'o ca nỹec da decoche yi'iye 'alhua maye qoviita'a qome, ₃₅nache ca lalamaxat que'eca nỹec, taua'a ca ntaxaỹaxanaxanec da yaqto' dalaxanec camaye, 'eeta': ‹Na lauel ñi ima' huo'o na nasheguem lcochaxa›.

₃₆Qaq nache qanqatec 'enauac na huetaigui que'eca nỹec da yaqto' saishet da ivira'a nataqa'en da decoche. Qaq da ime, nache ca ntaxaỹaxanaxanec huenoxoneua'a da imeten camaye.

₃₇Qaq ca ntaxaỹaxanaxanec, da imeten ca nasheguem lcochaxa que'eca nỹec, nache da ila'a da mashe qaramchiguiñi camaye qataq daralalec, huo'otaq tocalec da lo'oxoỹaxac, qataq mashe sa nsatchiguiñi, ₃₈nache camaye pa'auec, nache damaxasoxoolec da qaỹapogui que'eca nỹec caua siete na'axa'te. ₃₉Nache da ivi' caua siete na'axa'te, nache ca ntaxaỹaxanaxanec qaltaq ỹe'eguelaxalec da imeten ca nỹec, nache da huo'otaq nquictauec ca huaigui na lauel ca nỹec, ₄₀nache camaye damaxasoxoolec da qanqat ca coma'pi maye decoche, qataq qaỹasaxauga ca saishet da qui'itta maye huauga ca pa'auec ca nỹecpi. ₄₁Ime, qataq damaxasoxoolec da qanamarecta 'enauac ca lauel ca nỹec, nache ca namareeguishec lsoche, nache qaỹasaxauga ca saishet da qui'itta maye huauga ca pa'auec ca nỹecpi. ₄₂Ime, nache qaỹacona ca laỹe coma'pi da yaqto' nmeneguet ca qanqat coma'pi, qataq qanaralaxat ca 'alhua maye na'amnaxanaxat da qaỹa'amiiñi ca coma' que'eca nỹec.

₄₃Qaq da huo'otaq ỹe'eguelaxalec da huo'o ca huaigui lcoche ca nỹec, da huo'otaq mashe ime da qanqat ca coma' maye qauem, qataq mashe qanamare'c caua laỹel na lauel qataq da mashe ime da qaỹa'amen, ₄₄nache ca ntaxaỹaxanaxanec pa'auo da yaqto' imeten camaye, qaq da nquictauec ca lcochaxa ca nỹec, qache camaye saishet da qui'itta, qataq ishet da dalolaqtaxan. ₄₅Qaq huaña, nache qanlaxaañi que'eca nỹec, nache 'enauac ca coma', 'epaq qataq ca la'amnaxat 'alhua, nache qaỹasaxauga ca saishet da qui'itta maye huauga ca pa'auec ca nỹecpi.

₄₆Qataq 'enauac ca huenoxonoigui que'eca nỹec da mashe damaxasoxoolec ca ntaxaỹaxanaxanec da qaỹapogui, nache camaye saishet da qui'itta ivitta'a ca pe. ₄₇Qataq da huo'o ca deque'etaigui, huo'otaq do'ochiỹaigui que'eca nỹec, nache camaye iuen da iỹoi' caua alogo.

₄₈Qalaxaye da pa'auo ca ntaxaỹaxanaxanec da yaqto' imeten, nache da ila'a da saishet da ỹe'eguelaxa da huo'o ca lcochaxa que'eca nỹec da mashe ime da qanaralaxat na la'amnaxat, nache ỹa'axat da qui'itta, cha'aye qaica ca lcochaxa camaye.

₄₉Qaq da qui'itta qanqa'en ca nỹec, nache ca ntaxaỹaxanaxanec ỹaconalo caua dos qoỹo, qataq ca laỹe aca qo'oipaq pino, qataq ca hualoq laỹe togaxaraic, qataq aca naqta nchegoxosoxonaqte le'enaxat hisopo, ₅₀nache ỹalauat ca 'oonolec qoỹo naloqteetelec aca taxaqui 'alhua maye huetangui ca le'ec 'etaxat maye qaỹachegoxotangui ca npaxaatasheguem 'etaxat. ₅₁Ime, qaq ỹacona ca laỹe aca qo'oipaq pino qataq aca naqta nchegoxosoxonaqte le'enaxat hisopo, qataq ca hualoq laỹe togaxaraic, qataq ca qoỹo maye ña nca'altauec, nache ỹapapiaxa't 'enauaque caamaye iuomaxaayingui ca latago'q ca qoỹo maye ileu, cam ỹalecta'aguet ca 'etaxat maye qaỹachegoxotangui ca npaxaatasheguem 'etaxat, nache siete da ichegoqot ca nỹec. ₅₂Qaq 'era da 'eetec da qui'itta naqa'en ca nỹec, ỹauota'a ca ltago'q ca qoỹo, qataq ca 'etaxat npaxaatasheguem, qataq ca qoỹo nca'altauec, qataq ca laỹe ca 'epaq pino, qataq aca nchegoxosoxonaqte le'enaxat hisopo, qataq ca hualoq laỹe togaxaraic. ₅₃Qaq da ime, nache ỹachaxanec da huaỹo que'eca qoto' maye ña nca'altauec, huaña naqa'en ca pa'auec ca nỹecpi. Huaña nache ỹoqta qui'itta que'eca nỹec».

₅₄Qaq 'era da llec da ivita da nasheguem na qauem nhuetaxanaxa ca no'oc, ₅₅huo'otaq ca lcochaxa ca nogoxot, qataq ca lcochaxa ca nỹec maye ishet da dalolaqtaxan, ₅₆qataq na lalaache na no'oc huo'otaq da nasheguem ana ỹataqta nhueta, huo'otaq da nasheguem na chiỹaxatapega't na no'oc, ₅₇yaqto' ỹataxaraic ca qui'itta qataq ca saishet da qui'itta. Qaq 'era da nqataxac da ivita da huo'o ca huec ca qauem nhuetaxanaxa, huo'otaq ca lcochaxa ca nỹec maye ishet da dalolaqtaxan.