Lucas 5

₁Qaq huo'o so na'a'q So Jesús hueto'ot na loigue aso lapel late'erai ye Galilea, nache ỹataqta qalota so shiỹaxauapi laponeua'a Somaye da yaqto' na'axaỹaxana da la'aqtac Ñim Lo'onatac 'Enauacna. ₂Nache So Jesús ila'alo soua dos nllocta qui'itchiguilo, neto'oto na loigue asa'aso lapel late'erai, cha'aye som ya'acoxoicpi huenoteeguesopa soomaye. Qataq iỹota'ape soua lalegue'c. ₃Aso 'oonole se'esoua nllocta lalamaqte so Simón Pedro, nache So Jesús huenooñigui asomaye, ime, nache iỹaxanot so Pedro da cara'ac da nquigaxattaxaasom asomaye. Ime, nache So Jesús nso'ooñi netangui aso nllocta, nache cot da ỹapaxaguen so shiỹaxauapi.

₄Qaq So Jesús co'ollaq ime da lapaxaguenataxanaxac, nache 'enapega so Pedro, 'eeta':

–'Auauegaxaama ye laiñi ana lapel ana 'al-llocta. Ime, nache 'aualliguiñi na 'araleguec.

₅Nache so Pedro 'enapeco':

–'Am Napaxaguenataxanaq, qomi' imauec so pe da sha'acoqtac, qalaq qaica ca qaralliiguishec. Qalaxaye 'am da aỹem 'auamaq, nache nagui sasaxañi na ỹaleguec.

₆Qaq co'ollaq qaỹo'ot da 'enapec So Jesús, nache ỹataqta qalota so nalliiguishecpi nỹaq. Qaq ỹoqo'oye huotaique da colaqa'ague so lalegue'c. ₇Nache soomaye ỹatecapeguetalo soua lỹa't maye netanguilo aso lỹa nllocta, da yaqto' je'c da itaua'n soomaye. Nache se'esoua lỹa't je'c, nache ỹataqta qanlaxatchiguilo soua dos nllocta. Qaq ỹoqo'oye ỹataqta huotaique da iyiiyiñi. ₈Qaq co'ollaq ila'a de'era so Pedro, nache ỹa'aroto naua l-llectel So Jesús, nache 'enapega, 'eeta':

¡'Am Ỹataxala' aỹem qoca'ai, cha'aye aỹem ỹataqta aỹem 'etaxaloxoic!

_9-10So Pedro Santiago qataq so Juan maye llalqa so Zebedeo qataq 'enauac so laỹepi ỹataqta ỹaguec da lcolanaxa, souaxat se'eso qaica ca 'ena'am lla'acoxo'c maye ỹo'o't. Qalaxaye So Jesús 'enapega so Pedro, 'eeta':

–Saishet qome da 'añi'i, cha'aye nache chegoqchiguiña nagui da qaỹa'axañiiñi da qaya'acoxoqui, nache Aỹem qami' sapaxagueneque da lataxac da yaqto' Aỹem qanaviquiiua'a na shiỹaxauapi da yaqto' Aỹem quegue.

₁₁Ime, nache ỹaueguetra so loigue soua l-llocta', nache no'onaxatchiguilo 'enauac nam ỹachetacpi, nache ca'atregue So Jesús.

₁₂Qaq huo'o so na'a'q co'ollaq hueta'a so nỹecpi So Jesús. Nache nvireuo so 'oonolec ỹale maye sa no'on, somaye nchega na lo'oc; nache ỹa'aroto naua l-llectel So Jesús iviraxata'aguet na latap naqa'en na 'alhua. Nache nachoxoreetacot, 'eeta':

–'Am Ỹataxala' aỹem saỹaten da 'aushet da aỹem 'anataren. ¿'Auo'ot peta'a de'era?

₁₃Nache So Jesús ipoteua'a somaye, nache 'enapega, 'eeta':

–¡Aja', seshet! ¡Nagui 'am no'oita!

Nache saqaỹaloq da qaica so lalolaxa se'eso sa no'on. ₁₄Ime, nache So Jesús 'enapega somaye, 'eeta':

–Saishet qome da huo'o ca 'aua'aqtaxanem de'era. Nachaqrata da 'am qojec, 'anachaxaneua'a ñi ltaxaỹaxanaxanec na shiỹaxauapi da qaitaxaỹapegue' Ñim Lo'onatac 'Enauacna. Ime, qaq 'aỹa'aneuo aca 'arachetaqtaxanaqte maye damaxasoxoolec co'ollaxa so Moisés, yaqto' na ntaxaỹaxanaxanecpi ỹaỹaten da mashe qaica so 'aralolaxa.

₁₅Nache So Jesús ỹataqta nquictauec da na'aqtaguec. Nache ỹataqta qalota na shiỹaxauapi anac da ỹauotaique da na'axaỹaxana qataq huo'o na anac da huotaique da qanataren. ₁₆Qalaxaye So Jesús, nache 'eetai' naxa da nmittaique cam huaña da ishet da 'oonolec da yaqto' nqouagaxauen.

₁₇Qaq huo'o so na'a'q So Jesús dapaxaguenataxaatac hueta'a so nỹec. Qaq huo'o na ỹalectauo nso'ootañi nam ỹalectaigui na fariseopi qataq nam dapaxaguenataxaatapeguec na namaxasoxonaxacpi. Somayepi chegaqa'alo naua 'aleu' yem 'alhua ye Galilea, qataq ye 'alhua Judea qataq ye nỹecpi ye Jerusalén, da yaqto' na'axaỹaxana So Jesús.

–Qaq souaxat da So Jesús hueto'ot da la'añaxac Ñim Lo'onatac 'Enauacna da yaqto' nataren na sa no'onpi, ₁₈nache nvildeuo soua shiỹaxau' npeetragui so mala' huetalec so ỹale maye saishet da queuoỹapigui'. Nache se'eso sa no'on qaỹauotaique da qairoua'a So Jesús, ₁₉qalaxaye saishet da ỹanatra cam tateua'a naqa'e'n se'eso nỹec, cha'aye so ñegueuo ỹataqta qalota na shiỹaxauapi. Huaña, nache huenoldesheguemec na l-laq so nỹec, nache ỹauo'o so lauata'c. Nache tachiguingui naqa'e'n so lmala' so sa no'on da ỹasaxaña cam laiñi som lapoota'a't shiỹaxauapi qataq ỹataxaatrelec So Jesús.

₂₀Nache So Jesús co'ollaq ila'a da lta'araic lpi'iỹaxa'c soomaye, nache 'enapega so sa no'on, 'eeta':

«¡'Am ñauochaxaua, nagui sapalaxat na 'arasouaxashetpi!»

₂₁Nache nam dapaxaguenataxaatapeguec na namaxasoxonaxacpi maye chegoqo'ot so Moisés qataq na fariseopi deuennataxaatac, 'eeta': «¿Negue't cam ipettega dam da'? ¡Da nasaxauec la'aqtac ỹataqta dataỹa'aguet Ñim Lo'onatac 'Enauacna! ¡Nachaqñita Ñimaye da ishet da ỹapalaxat ca nasouaxashet!»

₂₂Qalaxaye So Jesús ỹaỹaten da lhuennataxa somayepi, nache denataxan 'eeta':

«¿Ta'ainco' ye qarhuennataxaqui de'era? ₂₃Ñaq Aỹem qaua'aqtaxañim: ¿negue't ca ỹoqta saqalaq da qoỹenapec, peta'a da qaỹapalaxa't naua lasouaxashe'ete ne'ena sa no'on, huo'otaq da qanataren? ₂₄Qalaxaye nagui qami' sachaxanalo da Aỹem, maye Aỹem Shiỹaxaua Llalec huo'o da ỹa'añaxac ana'ana 'alhua da sapalaxat na nasouaxashetpi.»

Huaña, nache 'enapega som ỹale maye sa da'añiigue, 'eeta':

«Qoñisheguem, 'auacona na 'armala'. Ime, qaq qojec, 'anqo'ona ca 'arma'.»

₂₅Nache saqaỹaloq da ñesheguem som sa da'añiigue, ỹauaachigui 'enauac somayepi. Ime, nache ỹacona so lmala' maye nnaatalec co'ollaxa, nache nqo'ona ca lma', ỹataqta ỹo'oxoreetac Ñim Lo'onatac 'Enauacna.

₂₆Nache 'enauac so shiỹaxauapi ỹataqta huo'o da la'aalaxa, qataq nlaqchigui da lcolanaxa, ime, nache ỹo'oxoreetac Ñim Lo'onatac 'Enauacna, 'eeta':

«¡Ỹataqta qaica ca 'ena'am da llo'oxoyec da sauanaqchigui ne'ena na'a'q!»

₂₇Qaq co'ollaq ime de'era, nache So Jesús ca'ai yi'iye hueta'a. Qaq co'ollaq queta, nache ila'a so ỹale le'enaxat Mateo do'onataxaatac ỹacootapeeguet ana nsheetenaqte ca nta'a maye netaña ye Roma. Nache So Jesús 'enapego' somaye, 'eeta':

«Aỹem 'auca'ategue.»

₂₈Nache so Mateo ñesheguem, no'onaxatchigui 'enauac nam hueto'otpi, nache ca'ategue So Jesús.

₂₉Qaq nacheso se'eso na'a'q da so Mateo ỹo'ot so lta'araic lquia'axac, souaxat da huo'o naq 'enec naqa'en So Jesús. Nache iỹaxana da lquia'axaua so qalota nam ỹacootapeeguet ana nsheetenaqte ca nta'a maye netaña ye Roma, qataq qalota so laỹepi. ₃₀Qalaxaye huo'o na fariseopi qataq huo'o na dapaxaguenataxaatapeguec na namaxasoxonaxacpi da quetrapegueleguete soua lapaxaguenataqa So Jesús. Nache 'eetregalo, 'eetra':

–¿Ta'ainco' qami' ye qarquia'axauai nam ỹacootapeeguet ana nsheetenaqte ca nta'a qataq nam shiỹaxauapi maye qauem da lataxac?

₃₁Nache So Jesús 'enapeco':

–Nam iuen ca natannaxanaq nachena nam sa no'onpi, qaq saishet da nachena nam no'oitapi. ₃₂Aỹem ñanac da seỹaxana nam 'etaxaloxoicpi da yaqto' ỹe'eguelaqot Ñim Lo'onatac 'Enauacna, qaq saishet da nachena nam 'eetega da no'on da lataxac.

₃₃Nache huo'oi soua 'enapegalo So Jesús, 'eetra':

–Na lapaxaguenatacpi so Juan maye nachelaxanataxanaq qataq nam quetague' na fariseopi ỹataqta ỹaguec da nqouagaxaunaxac qataq nqouaqchetaxac. Qaq naua 'arapaxaguenataqa qalaq nda'a't da lquia'axac qataq da nỹomaxac.

₃₄Nache So Jesús 'enapeco':

–Ca ncoyeguenatacpi da ỹalectaua'a ca naronaxac, camayepi saishet da nqouaqchet da ña ỹalecta'aguet ca auonaxaua. ₃₅Qalaxaye qom ivita ca laloqo' da qaỹauec que'eca aronaq, huaña, nache ishet da nqouaqchet cam ncoyeguenatacpi.

₃₆So Jesús nataqa'en ỹauo'o da daloqnaxana, 'eeta':

«Da huo'otaq huo'o aca togoshe npoto da huo'otaq colaqa'ague, nache qaica ca icheguec ca laỹe aca npoto maye dalaxaale da naparen aca togoshe. Cha'aye da nache 'eetec, nache na'axat aca dalaxaale. Qataq nataqa'en ca dalaxaicolec napannaxanaxat saq taiguet aca togoshe npoto.

₃₇Qataq nataqa'en saishet da qaicoyigui aca shiguiỹac lo'oc ltoxoi ca lataxa maye dalaxaicolec. Cha'aye ca dalaxaicolec lataxa da ỹashiiyigui, nache ishet da ỹachipiaxata'ague aca lo'oc, nache ca lataxa qataq aca lo'oc caamaye deqa't. ₃₈Qaq ỹoqo'oye que'eca dalaxaicolec lataxa, camaye iuen da qaicoyigui aca dalaxaale lo'oc ca shiguiỹac.

₃₉Qataq nataqa'en da huo'o ca ỹe'eguen ca togoshec lataxa, nache camaye saishet da huotaique da qaltaq ỹe'eguelaxa da nỹomgui ca dalaxaicolec lataxa, cha'aye mashe ỹaỹaten da ca togoshec lataxa nacheca ca ỹataqta 'onaxaic.»