Lucas 6

₁Huo'o so na'a'q mataxaqui, nache So Jesús qataq soua lapaxaguenataqa ỹa'axasoxoorelec so nanaxanaqa' maye nma' na trigo. Nache soua lapaxaguenataqa napocta'ape na trigo, nache nqateua'a na ala da yaqto' che'c. ₂Nache so fariseopi ỹauaachiguilo soua napaxaguenataqa da ỹo'ottrac de'era, nache denataxa'n, 'eeta':

–¿Ta'ainco' qami' ye sa qaualaqaiguet da namaxasoxonaxac? De'era qauo'oche damaye sa qaishetapec na na'a'q mataxaqui.

₃Nache So Jesús 'enapeco':

–¿Saishet peta'a da qautaxaỹaxañiỹapec da nanettalec ana la'aqtac lmalate Ñim Lo'onatac 'Enauacna da 'eetec co'ollaxa so David, qataq soua lỹa't da ỹataqta iqoua't? ₄Nache so David pa'aigui so lma' Ñim Lo'onatac 'Enauacna, nache ỹacona aso nauole maye sa qaishetapec, qataq nda'a't ca ntaxaỹaxanaxanec da qaỹasheetem asomaye da chec, qalaxaye, nache 'ena'am chec somaye qataq nataqa'en soua nnaictagueto. ₅Aỹem Shiỹaxaua Llalec, Aỹem maiche Aỹem chegoqtot da huo'o ca so'ot, qataq ca saishet da so'ot ye na'a'q mataxaqui.

₆Qaq so lỹa na'a'q mataxaqui, nache So Jesús qaltaq inoxoneua'a asom napaxaguenaxaqui na judiopi da yaqto' dapaxaguenataxan. Qaq ỹalectauo so ỹale maye deqaqta na lhuaq aloiguishec.

₇Qaq na chegaqaigui na fariseo qataq nam dapaxaguenataxaatapeguec na namaxasoxonaxacpi, choche nauaatac So Jesús da huo'otaq nataren na lhuaq se'eso ỹale. Da ỹo'ot de'era, nache ishet da qaỹachegoxotchigui da huasoilec qanqa'en da do'onataxangui so na'a'q mataxaqui.

₈Qalaxaye So Jesús ỹaỹaten da lhuennataxac somayepi; nache 'enapego' som ỹale maye deqaqta na lhuaq, 'eeta': «Qoñisheguem qome. Ime, qaq 'anachaangui na laiñi.»

Nache so ỹale nachaañi tangui na laiñi so shiỹaxauapi.

₉Nache So Jesús 'enapega 'enauac som hueta'a yi'iye, 'eeta': «Aỹem qami' sena't nagui: ¿Chaq negue't ca ỹaỹamaqchiguiñi da qaỹo'ot ne'ena na'a'q mataxaqui, ca no'on huo'otaq ca qauem? ¿Qanca'alaxatec ca achaalataxac huo'otaq qailaxachigui?»

₁₀Qaq co'ollaq ime da ỹamataigui so shiỹaxauapi, nache So Jesús 'enapega so ỹale, 'eeta': «Ña 'auachaxanec na 'arhuaq.»

Nache so ỹale ỹachaxanec na lhuaq, nache ỹataqta no'oita na lhuaq.

₁₁Qalaxaye so shiỹaxauapi ỹataqta dalemata. Nache chegoqchiguiña da nmittaique ca lataxac da dataỹa'aguet So Jesús.

₁₂Qaq se'esoua na'axa'te So Jesús tasheguemec aso saqaỹoqotcheguemec 'alhua da yaqto' nqouagaxauen, nache imattec se'eso pe da na'aqtaxaatague' Ñim Lo'onatac 'Enauacna. ₁₃Qaq so lỹa na'a'q, nache iỹaxana so qalota ca'attague'pi Somaye. Ime, nache lca'aua'alo soua doce somayepi, nache ỹauo'oi lamaxa'she. ₁₄Qaq 'enaua naua le'enaqa'ate soomaye: Simón som ilonec da le'enaxat Pedro, qataq so Andrés som lqaỹa so Pedro, qataq so Santiago, qataq so Juan, Felipe, qataq so Bartolomé, ₁₅Mateo, qataq so Tomás, qataq so Santiago som llalec so Alfeo, qataq so Simón maye chegaqaigui nam dataỹa'aguet naxa na nta'alpi, ₁₆qataq Judas som lqaỹa so Santiago, qataq so Judas Iscariote maye ỹaneuo co'olloxocheye So Jesús.

₁₇Nache So Jesús qataq soua doce lamaxa'she huenoteeguesopa aso qaỹoqotcheguemec 'alhua, nache nqo'onalo so nalochiguiñi 'alhua. Huaña yemaye, nache lapona't so qalota maye ca'attague' Somaye. Nataqa'en qalota na hueta'a yemaye na chegaqa'alo naua 'aleu' maye huaigui ye 'alhua Judea, nataqa'en na chegaqa'a ye nỹecpi ye Jerusalén qataq huo'o na chegaqa'a ye nỹecpi Tiro qataq Sidón, ₁₈nvi' da yaqto' na'axaỹaxana So Jesús qataq yaqto' Somaye nataren na lalolaxa. Qataq nam huo'o na netaigui saqcha'a na'añaxac leguemaxaic nataqa'en no'oita. ₁₉Nache 'enauac huotaique da ipoteua'a So Jesús cha'aye ỹaỹaten da la'añaxac maye hueto'ot Somaye da ishet da datannaxan.

₂₀Nache So Jesús ỹamataigui so lapaxaguenatacpi, nache 'enapeco':

₂₂Ñim Lo'onatac 'Enauacna qami' ỹaaleguete da lqouagaxanaqtaic souaxat na shiỹaxauapi da qami' nquiỹalo, huo'otaq da qami' isheueeta'ape qataq da qami' sa qaỹaconegueta, qataq qaica ca huotaique da qami' ỹalecta'agueta. Na shiỹaxauapi qami' ỹo'oteque de'era, cha'aye souaxat da Aỹem qaualaqaiguet, Aỹem Shiỹaxaua Llalec. ₂₃Qaq ỹataqta qauamaichiguiñi qome, qataq qauasocheetai' da qantonaxaqui, cha'aye Ñim Lo'onatac 'Enauacna mashe iqataxaatai' da lta'araic qansheetenaguiiqui. Cha'aye nataqa'en, nache 'eetec co'ollaxa so chegoxoguet namayepi da sa iyacnapec so hua'au la'aqtaxanaxanecpi Ñim Lo'onatac 'Enauacna.»

₂₄Nache So Jesús ỹamataigui so laỹepi shiỹaxauapi, nache 'enapeco':

₂₆¡Ỹataqta qauem da qa'aita'ague qami' maye, nache 'eetai' da qami' qaỹo'oxoreeta'ape! Cha'aye soua qaỹoqteguelo vi'iye so qaralamaxache qarhuo'oi le'ecpi nataqa'en ỹo'oxoreetac co'ollaxa so na'aqtaxanaxanecpi maye tenataxanaxaicpi.

₂₇¡Ỹataqta qana'axaỹaxañiichigui da huotaique qami' sa'aqtaxanema!: Qauauochec qome ca qami' ipa'agueeta'ape, qataq ỹataqta qauaỹamaxacheeta ca qami' sa iyacna'ape. ₂₈Ca qami' isheueeta'ape da qauasacheeguet qalaq qauaỹamaxachiichiguiñi ca qara'aqtaqui. Qaq ca sa qami' ỹaconegueta qalaq qanqouagaxauñiitalec camaye. ₂₉Qaq da huo'otaq huo'o ca iuaxangui ana 'aramelque, qaq nataqa'en 'aỹa'anem ana lỹa 'aramelque. Qataq da huo'otaq huo'o ca deuotaxanec ca 'arpo', qalaq nataqa'en 'aua'aqta'a da ỹache ca 'al-lomaxaqui. ₃₀Qataq da huo'o ca 'am ỹashela, qalaq 'aỹa'anem ca iỹaxanaique, qataq da huo'o ca deuotaxanec ca 'aralamaxat, qalaq saishet da qonapega da 'am ỹe'eguelaxatem. ₃₁Qaq cam no'on maye qauauoitaique da qami' ỹo'oteque na shiỹaxauapi, qaq nacheca qauo'ochec qome namayepi.

₃₂Cha'aye da ndotec da qauauochec na qami' ỹauoteque, nache qaica ca qauo'oche ỹactec da ỹaỹamaqchiguiñi. ¡Cha'aye ivira'a na 'etaxaloxoicpi ishet da ỹo'ot de'era! ₃₃Qaq da huo'otaq qandoxocheetec ca qami' ỹo'oteque ca ỹaỹamaqchiguiñi da qauo'ochec ca no'on, qaq ¿negue'to' cam ỹactec ỹaỹamaqchiguiñi maye ishet da qauo'oche? ¡Ye ivira'a nam 'etaxaloxoicpi nataqa'en ishet da ỹo'ot de'era! ₃₄Qami' da qandoxocheetec da qaua'aalaxanaxañi cam qaupichiỹa'a da huo'o nataqa'en ca chegoqo'ot, nache qami' saishet da huo'o ca qauo'oche ca naigui da ishet da qaỹauo'o ca qansheetenaguiiqui. Cha'aye nataqa'en nam 'etaxaloxoicpi ishet da na'aalaxana't, qalaxaye naquitta'a da huo'o aca late'erai laueque.

₃₅Qalaxaye qami' ỹataqta qauauochec ca qami' ipa'agueeta'ape, qataq qauaỹamaxacheeta qataq da huo'o ca qaua'aalaxanaxañic qalaq saishet da qauacheeta'a da qami' isheete'n. Cha'aye da nache qoñiitec de'era, nache Ñim Lo'onatac 'Enauacna maye 'amaqtaqaic qami' ỹanema ca qansheetenaguiiqui qataq ỹataqta qami' llalqa. Ñimaye ỹataqta choxonnataxanaxaic, ichoxoren na shiỹaxauapi maye qauem da lataxac qataq sa nmanapec. ₃₆Qami' iuen da ỹataqta qami' choxonnataxanaxaiqa, qauchoxoyiñi 'enauac na shiỹaxauapi, qoñiita'am Ñim Lo'onatac 'Enauacna maye Qarta'a, Ñimaye choxonnataxanaxaic.»

₃₇So Jesús nataqa'en 'enapeco':

Saishet da qanmichi ca lasouaxashet ca qarỹai, yaqto' Ñim Lo'onatac 'Enauacna, saishet da qami' nmi't. Qataq saishet da qauauo'oi ca nhuaxanaguec ca qarỹai, yaqto' Ñimaye saishet da ỹauo'o ca qanhuaxanaguiiqui. Qauapalaxache ca lasouaxashet ca qarỹai, yaqto' Ñim Lo'onatac 'Enauacna ỹapalaxat ca qarasouaxashechi. ₃₈Qaỹa'añim ca qarỹai cam iueetaique, yaqto' Ñim Lo'onatac 'Enauacna qami' ỹanema cam qaviñiitaique. Cha'aye ỹoqta 'eesa da Ñim Lo'onatac 'Enauacna, da cam lcata cam qaỹa'añim ca qarỹai, qaq nache lcatam cam qami' ỹanema Ñimaye. Da huo'otaq qaỹa'añim ca qarỹai ca trigo, nache qami' qoỹanema ca laỹe' na trigo ỹataqta qantoqoochiguiñi qataq ỹataqta nlaqchigui, nache saishet da iuen da qauloitaique.

₃₉So Jesús nataqa'en ỹauo'o so daloqnaxana, 'eeta':

Ca sanauaañi saishet da ỹaueca'aguet ca lỹa sanauaañi, cha'aye ishet da 'enauaque da tayingui aca llimiaxañi. ₄₀Ca napaxaguenatac saishet da napacalec na ỹaỹaten ca napaxaguenaxala'. Qalaxaye da huo'otaq mashe inoxonaqchetec nam qaỹapaxaguenecpi, nache ishet da 'eeta'am cam napaxaguenaxala'.

₄₁¿Ta'ainco' ye 'aulotagui ca qauem maye ỹo'ot ca 'arỹa? ¿Sa 'ananomo' peta'a na qalota lataxacpi qauem maye 'auo'ottac? 'Eeta'am da 'aula'a ca ltagoxoshet 'auaqpi lte ca 'arỹa ana la'aite, qaq sa 'ananoma ca maiche 'artagoxoshet 'epaq laỹe. ₄₂¿Ta'ainco' da qonapega ca 'arqaỹa da qoneta': «Ỹaqaỹa, ña 'aua'aqta'a da ñeqat ye 'artagoxoshet 'auaqpi lte añi 'ara'aite», da 'am sa 'ananoma ye maiche 'artagoxoshet 'epaq laỹe? ¡'Am tenataxanaxaic! 'Aua'auaxaañi da 'anqat ye maiche 'artagoxoshet 'epaq laỹe maye huetaigui añi 'ara'aite, yaqto' ỹoqta 'anauaachiguiñi da 'anqat ca ltagoxoshet 'auaqpi lte ca 'arqaỹa.

₄₃So Jesús nataqa'en 'enapeco':

«Qaca aca qo'oipaq da 'onaxai, nache aca ala qauem, qataq nataqa'en qaca aca qo'oipaq da qauem, nache aca ala 'onaxai. ₄₄Qaq aca 'oonole qo'oipaq maiche qaỹauatton souaxat aca ala. Ỹoqo'oye saishet da qanqat ana ala ana nañiguishe le'enaxat da higo qataq ana uva, da qaỹachegoxotaigui aca qo'oipaq maye huo'o ana le. ₄₅Na no'on shiỹaxauapi, nache 'eetai' da ỹo'ottac ca ỹaỹamaqchiguiñi, cha'aye da no'on huetaigui da lquiyaqteỹaxac. Qaq nam qauem shiỹaxauapi, nache 'eetai' da ỹo'ottac da qauem, cha'aye da lquiyaqteỹaxac huetaigui da qauem. Naua 'ara'aqtaqa maye nauoiguilo na 'ap naamaye ỹachaxa'n naua huetanguilo añi 'arquiyaqte.»

₄₆So Jesús queto'ot da da'aqtaxaatac 'eeta':

«Qami' qoñiitega naxa da Aỹem Qarataxala'ai qataq qami' ỹalamaqa'ate, qalaxaye saishet da qauo'oche da qami' samaxaleguete. ₄₇Da huo'o ca nquigueua'a Aỹem qataq na'axaỹaxana da ỹapaxaguenataxanaxac qataq Aỹem ỹalaxaguet, ₄₈camaye 'eeta'am ca ỹale maye ỹo'ot ca lma', qaq ỹa'auaxaañi da desheraxan, ỹataqta qaỹoqchiguingui naqa'en ca lsherec ivittaña ca coma'. Huaña, nache lapaxañi ca lo'oxonaxala' naqa'en ca nỹec. Qaq da ivita da nvi' na ndep, nache na la'auataxa na 'etaxat ỹataqta iuaxanot ca nỹec. Qalaxaye ca nỹec saishet da deraỹapigui', cha'aye ỹataqta 'onaxaic da no'oxonaguec.

₄₉Qaq ca na'axaỹaxaatega da ỹapaxaguenataxanaxac, qalaxaye saishet da Aỹem ỹalaxaguet, qaq camaye 'eeta'am ca ỹale da no'oxoosheguem ca lma' da ỹaatelec ca 'alhua maye sa da'angui. Qaq da ivita da nvi' na ndep, nache na la'auataxa na 'etaxat iuaxanot que'eca nỹec, nache camaye hua'axañi, nache ỹataqta dolachigui.»