Mateo 16

₁Huo'o so chegaqaigui nam fariseopi qataq na saduceopi nquigueua'a So Jesús da ỹauotaique da ỹe'eguen Somaye, nache dequictacot, 'eeta':

–Sauoqtaique da 'auo'ot cam sa qaỹauanapega cam ỹa'axat da ỹoqta 'eesa da Ñim Lo'onatac 'Enauacna 'am namaq.

₂Qalaxaye So Jesús 'enapeco':

–Qami' da ivita ye avit, qalaq qoñiita': «Ỹoqta da 'onaxaic ca na'a'q qonte', cha'aye ỹataqta toc da avit.» ₃Qaq da ña nte'etom, qalaq qoñiita': «Ỹoqta da qauem na na'a'q, cha'aye ỹataqta toc da nala' lliguisheguem qataq napalgui.» ¡Qami' maye qoñiitega da qami' llalqa Ñim Lo'onatac 'Enauacna! Ỹataqta qauaỹachiñi da qaua'axache da lataxac na piguem. Qaq ¿ta'ainco' qone' ye saishet da qauaỹaañi da nam so'ottacpi nagui namayepi la'anec Ñim Lo'onatac 'Enauacna? ₄Qami' qauỹaxañiitaique ca na'anec, cha'aye qami' qauemaiqa qataq saishet da qauauoitaique da qaua'amqaanataxañi. Qalaxaye saishet da qami' qoỹanema ca na'anec, nachaqrata dam huaigui co'ollaxa so na'aqtaxanaxanec Jonás.

–Qaq co'ollaxa ime da nasaxauec de'era So Jesús, nache ca'ai somayepi.

₅So Jesús qataq soua lapaxaguenataqa taitrague da le'ego aso lapel ye Galilea. Qalaxaye soua lapaxaguenataqa icoua'aisalo co'ollaxa da ỹache' aca nauole 'ayiiña. ₆Nache So Jesús 'enapegalo soomaye, 'eeta':

–Maxatchaxa qome, qarvichiỹa'a ana ỹasheeraxachigui ca ndaqñiguishec 'ayiiña maye huetaigui na fariseopi qataq na saduceopi.

₇Nache soua lapaxaguenataqa detaqtega't co'ollaxa, 'eetra':

«Ỹoqta da nasaxauec de'era da Jesús souaxat da qomi' saishet da ñachoq aca nauole 'ayiiña.» ₈Nache So Jesús co'ollaq noma de'era na'aqtaxaatrapigui soomaye, nache 'enapegalo, 'eeta':

–¡Qami' ỹataqta qapio'olec dam qarpi'iỹaxaqui Ñim Lo'onatac 'Enauacna! ¿Ta'ainco' da leetapigui ye qarvilli da qaca aca qaya'acoi nauole 'ayiiña? ₉Qana'axaỹaxañiichigui de'era shenapec, ¿peta'a mashe qaucoviỹa'ai se'eso na'a'q co'ollaq sequia'axan so cinco mil ỹalleppi, sequia'axanataxaneque soua cincole nauole 'ayiiña? ¿Nataqa'en qaucoviỹa'ai peta'a soua no'oxonal nallec laỹe'te maye nlaxatchigui so ñi'iỹoxot? ₁₀Qataq ¿saishet peta'a da qantooñic co'ollaq sequia'axan so cuatro mil co'ollaq sequia'axanataxaneque soua siete nauole 'ayiiña, qaq qami' qanlaxachiichiguilo soua qalote' no'oxonal maye laỹe' na nallec? ₁₁¿Saishet peta'a da Aỹem qauaỹaañiguet da Aỹem, saishet da sheetega aca yo'oqchigui nauole? ¡Maxatchaxa qome qarvichiỹa'a ana ỹasheeraxachigui ana nauole maye huetaigui na fariseopi qataq na saduceopi!

₁₂Huaña, nache soua lapaxaguenataqa So Jesús ỹaỹate'n da Somaye saishet da 'eetega da qaivita'a ana yo'oqchigui ỹasheeraxachigui ca ndaqnec, nachaqrata da qaivita'alo naua lapaxaguenataxanaxaco maye qauema nam fariseopi qataq nam saduceopi.

₁₃Qaq co'ollaq mashe saqaỹapeque so nỹecpi ye Cesarea maye ilotague' co'ollaxa so Filipo, nache So Jesús inatta'ape soua lapaxaguenataqa, 'eeta':

–Na shiỹaxauapi nagui ¿Chaq 'eetec naxa ca la'aqtac da detaqtega Aỹem, maye Aỹem Shiỹaxaua Llalec?

₁₄Nache soomaye 'ena'apo':

–Qomye huo'o na 'eetega da 'am Juan maye nachelaxanataxanaq, qataq huo'o na 'eetega da 'am nacheso som la'aqtaxanaxanec Ñim Lo'onatac 'Enauacna le'enaxat Elías, qataq huo'o na 'am 'eetega da na'aqtaxanaxanec Jeremías, qalqo' ca 'oonolec som hua'au la'aqtaxanaxanecpi Ñim Lo'onatac 'Enauacna.

₁₅Nache So Jesús 'enapeco':

–Qaq qami', ¿Ca 'eetec ca qarauattonaxanaxaqui Aỹem?

₁₆Nache so Simón Pedro 'enapeco':

–Qomye nache 'am maye 'am Lca'aguishec qataq 'am Llalec Ñim Lo'onatac 'Enauacna maye nca'altauec, qaltaq chegoqo'ot da nca'alaxa.

₁₇Nache So Jesús 'enapeco':

–¡Ỹataqta lta'araic qome da 'aramaicỹaxac, 'am Pedro maye 'am llalec so Jonás! Cha'aye saishet da maiche 'anallegoxottela't da 'auaỹaten de'era, nacheñi Ñim Ita'a maye neta'ague da piguem Ñim 'am ỹapaxaguen. ₁₈Ỹoqo'oye Aỹem 'am sanagui da Pedro, damaye naigui da «coma'.» Qaq ne'ena coma' so'oxootelec cam 'amqaanataxanaxaicpi maye Aỹem ỹa'amaqteetac, qaq ivira'a da la'añaxac da nleuaxa saishet da ilaxachigui. ₁₉Qaq 'am Pedro, 'am sami' da 'ara'añaxac da qonetaigui da lo'onataxanaxac Ñim Lo'onatac 'Enauacna. Qaq 'enauac nam lataxacpi maye saishet da 'auashen ana 'alhua, qaq nataqa'en Ñim Lo'onatac 'Enauacna maye neto'ot na piguem saishet da ỹashen. Qaq nam lataxacpi maye 'auasheeta, nataqa'en Ñim Lo'onatac 'Enauacna ỹasheeta.

₂₀Nache So Jesús huaqattapegueleguete soua lapaxaguenataqa da yaqto' saishet da huo'o ca da'aqtaxanem da Somaye nacheso So Lca'aguishec Ñim Lo'onatac 'Enauacna.

₂₁Qaq huaña, nache So Jesús ỹataqta da'aqtaxaatema soua lapaxaguenataqa dam taỹa'a da ivireguet, 'eeta':

«Aỹem iuen da saigue da Jerusalén. Qaq huaña qome yemaye, nache na nqueroxonecpi maye nataxala'pi qataq na lataxala'pi na ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna, qataq nam dapaxaguenataxaatapeguec na namaxasoxonaxacpi maye chegoqo'ot so Moisés, namayepi ỹataqta qalota qome naqa'en da ñeque'eenaxac, qataq Aỹem ỹalauat. Qalaxaye qom mashe inoxoore'c caua tres na'axa'te, nache qaltaq ñeca'alec.»

₂₂Nache so Pedro iỹotauga So Jesús, nache ỹataqta 'enapega souaxat da nasaxauec de'era, nache 'eeta':

–¡Ñim Lo'onatac 'Enauacna 'am ntelaqna'aguet qome de'era 'am Ỹataxala' da yaqto' saishet da huo'o ca qouaigui!

₂₃Qalaxaye So Jesús ỹamato'ot so Pedro, nache 'enapega, 'eeta':

–¡'Am Pedro, da 'artaxaỹaxac 'eeta'am da ltaxaỹaxac so pa'aguenataxanaxaic! ¡Aỹem qoca'ai qome! Cha'aye 'am saishet da 'auaỹaten dam 'eetapeguec Ñim Lo'onatac 'Enauacna. Qataq choche qoquetegueua'a da Aỹem saishet da salaq.

₂₄Nache So Jesús 'enapegalo soua lapaxaguenataqa, 'eeta':

«Da qami' qansheetaique da qami' ỹapaxaguenataqa, nache iuen da qaucoviỹa'ai da qauo'oche ca maiche qoñiitapeguec. Nachaqrata da iuen da qami' lhuotte', na'aictaxa da qami' qaỹalaua't. Qataq qaualaqaiguet ca ỹa'aqtac. ₂₅Cha'aye ca nshetaique da maiche nca'alaxatec da nachaalataxac, nache camaye deqat. Qalaxaye cam ỹan da nachaalataxac souaxat Aỹem, nache camaye nca'alec. ₂₆Cha'aye ¿negue't cam ỹachegoxotaigui ca shiỹaxaua da huo'otaq imatta't da nauec 'enauac nam huetalec ana 'alhua, qaq da nachaalataxac deqat? Qataq ¿chaq negue'to' ca ỹan da ñe'eguelaxaala't da nachaalataxac? ₂₇Cha'aye Aỹem Shiỹaxaua Llalec, saqaỹaloq da ñe'eguelaq ñanactaigui da la'añaxac Ñim Lo'onatac 'Enauacna qataq na ỹamaxashecpi da yaqto' sanem ca laueguec nam 'onaxaic nam ỹo'ottacpi qataq sauo'o ca nhuaxanaguec na qauem nam ỹo'ottacpi. ₂₈Qaq ỹataqta 'eesa de'era qami' sa'aqtaxanema, da huo'o qome ca 'oonolec da qoñiita maye ỹalectauo nagui cam saishet qome da ileu, qom saxanaxa da ilogui da selo'ogue 'enauacna.»