So Jesús nqochen da lataxac
1Qaq co'ollaq mashe inoxoore'c soua seis na'axa'te, nache So Jesús ỹauec so Pedro qataq soua nqaỹa't Santiago qataq Juan, ndoqnaxaatre'c soomaye da taresheguemec aso qaỹoqotcheguemec 'alhua. 2Huaña yemaye, nache nqochen da lataxac, ỹauaachiguilo soomaye. Na lashec co'ollaxa Somaye ỹataqta 'eroigui, 'eeta'am añi nala', qaq soua alogo qalaq ỹataqta ỹapaga'q, 'eeta'am na le'eraxa añi nala' da mashe laiñi ye na'a'q. 3Huaña, nache soua tres lapaxaguenataqa ilora'a so la'aqtaxanaxanec Ñim Lo'onatac 'Enauacna le'enaxat Elías qataq Moisés da na'aqtaxaategueto So Jesús.
4Nache so Pedro 'enapega So Jesús, 'eeta':
«'Am Qarataxala', ¡'onaxaictaxa da nache souaqta'a ne'ena! Da 'am 'auaỹamaxareeta, nache so'ota'q caua tres qaya'axaquilli', 'oonolec ca 'arma', qataq da Moisés, qataq da Elías.»
5Qaq co'ollaq ña detaqtac so Pedro, nache anac so lo'oc na piguem ỹataqta 'eroigui. Ipelteeleguete soomaye. Nache se'eso lo'oc chemaqtoigui so na'aqtac, 'eeta':
«'Era dam Ỹalec maye ỹataqta ỹauotaxat, damaye ỹataqta ñetootapeguec, qaq qami' iuen da ỹataqta qana'axaỹaxañiỹa damaye.»
6Qaq co'ollaq hua'axaỹalo de'era na'aqtac soua lapaxaguenataqa, nache soomaye ỹataqta nqapaxanegueta ana 'alhua, cha'aye ỹataqta ỹaguec da lcolanaqa'. 7Nache So Jesús nqo'onalo soomaye, nache ipoteua'alo, qataq 'enapegalo, 'eeta':
«Qoñiisheguem, saishet da qayi'i.»
8Qaq soomaye co'ollaq ñiyishegue'm, nache saishet da huo'o ca lỹa ilora'a, nachaqsota So Jesús.
9Qaq co'ollaq mashe huenotreeguesopa aso qaỹoqotcheguemec 'alhua, nache So Jesús 'enapegalo soua lapaxaguenataqa, 'eeta':
–Saishet qome da huo'o ca qaua'aqtaxañim de'era qarauanaqchiqui, nato' qom Aỹem Shiỹaxaua Llalec mashe seleu qataq da mashe ñeca'alec.
10Nache soua lapaxaguenataqa inatta'ape Somaye, 'eeta':
–¿Ta'ainco' ye na dapaxaguenataxaatapeguec na namaxasoxonaxacpi maye chegoqo'ot so Moisés ye 'eetega da hua'auñi qome da nvi' ca Elías, da saxanaxa da nvi' ca Lca'aguishec Ñim Lo'onatac 'Enauacna?
11Nache So Jesús 'enapeco':
–Aja', damaye 'eesa. Ca Elías nvi' qome da yaqto' ỹaỹamaxaañi 'enauac na lataxaguesat. 12Qalaxaye Aỹem ỹataqta 'eesa de'era qami' sa'aqtaxanema da so Elías mashe sogote da nvi'. Qalaxaye na shiỹaxauapi saishet da ỹauatton, nachaqrata da maiche ỹoiqueetac cam ỹo'otec somaye. Aỹem Shiỹaxaua Llalec, nataqa'en nache 'eetec qome da Aỹem qaỹo'otec ỹoqo'oye ỹaguec da ñeque'eenaxac qome.
13Huaña, nache soua tres lapaxaguenataqa ỹaỹate'n da So Jesús detaqtega so Juan maye nachelaxanataxanaq.
So Jesús nataren so nsoq maye huo'o so netaigui saqcha'a na'añaxac leguemaxaic
14Qaq co'ollaq mashe ivitra so hueta'a so shiỹaxauapi, nache huo'o so ỹale nqocheneua'a So Jesús. Nache ỹa'aroto naua l-llectel, 15nache 'eeta':
–¡'Am Ỹataxala', 'auchoxoren qome da ỹalec, nache 'autauan! Cha'aye damaye ỹataqta sa no'on qataq ỹataqta lta'araic da nque'eenaxac. Cha'aye qalota naxa da tangui na norec da decopche, qataq na 'etaxat. 16Qaq damaye ñauegueua'alo naua 'arapaxaguenataqa da yaqto' natare'n, qalaxaye daamaye saishet da ỹañoxo't.
17Nache So Jesús 'enapeco':
–Qami' ỹataqta saishet da qauaỹachiñi ca qoñiitec qataq saishet da huo'o ca qarpi'iỹaxaqui Ñim Lo'onatac 'Enauacna. ¿Peta'a ỹapacteco' da sa qauañoxoche da huo'o ca qauo'oche da saishet da qami' soota'agueta? ¿Cam laguio' nache ishet da qauaỹaanataxañi? ¡Ña qanaviquicna'a da nsoq!
18Nache So Jesús nlaxa se'eso saqcha'a na'añaxac leguemaxaic maye netaigui se'eso nsoq, nache 'enapega da jec. Huaña nache no'oita so nsoq.
19Qaq co'ollaq qaỹata'ague de'era, nache soua lapaxaguenataqa iỹotrauga So Jesús. Nache inattrac, 'eetra':
–¿Ta'ainco' ye qomi' saishet da sañoxotaq da so'oraqauec se'eso saqcha'a na'añaxac leguemaxaic?
20Nache So Jesús 'enapeco':
–Cha'aye qami' saishet da huo'o ca qarpi'iỹaxaqui Ñim Lo'onatac 'Enauacna. Qaq ỹataqta 'eesa de'era qami' sa'aqtaxanema da huo'otaq qami' huo'o ca qarpi'iỹaxaqui, na'aictaxa da lcatam aca ala ana nañiguishe le'enaxat mostaza, qalaq ishet da qoñiỹapega aca qaỹoqotcheguemec 'alhua da ca'ai ca hueta'a, nache qami' ỹalaxagueta. ¡Nache qaica ca alaq da qauataiỹa'aguet! 21[Qalaxaye ca 'eeta'am se'eso na'añaxac leguemaxaic da qaỹo'orauec qalaq iuen da natamen qataq nqouaqchet ca shiỹaxaua.]
So Jesús qaltaq ỹa'axata'a da nalaataguec
22Qaq co'ollaq ñaq iconnaxaata'ape ye 'alhua Galilea, nache So Jesús da'aqtaxaateguema soua lapaxaguenataqa, 'eeta':
«Nam Aỹem ipa'agueetacpi Aỹem ỹaconeua'a qome, nache Aỹem ỹaneua'a na laỹepi shiỹaxauapi. 23Nache Aỹem ỹalauat, qalaxaye Aỹem Shiỹaxaua Llalec qom inoxoore'c caua tres na'axa'te, nache qaltaq ñeca'alec.»
Qaq co'ollaq hua'aqchigui de'era soua lapaxaguenataqa, nache ỹataqta daquicote'.
Aso lasheue da qaisheeten aso no'onaxanaxaqui late'erai
24Qaq So Jesús qataq soua lapaxaguenataqa co'ollaq mashe ivitra ye nỹecpi ye Cafarnaúm, nache som ỹacootapeeguet ana nsheetenaxanaqte da qaisheeten aso no'onaxanaxaqui late'erai, somayepi taua'a so Pedro, nache inattac, 'eeta':
–¿Isheeten peta'a ñim Qanapaxaguenaxala'ai añi lasheue da qaisheeten añi no'onaxanaxaqui late'erai?
25Nache so Pedro 'enapeco':
–Aja', isheeten.
Nache so Pedro co'ollaq pa'aigui so nỹec maye hueta'a 'enauac somayepi, nache So Jesús hua'aulec da inat somaye, 'eeta':
–Aỹem 'aua'aqtaxanem Pedro ¿Chaq negue't cam iỹaxanot na nta'alpi da desheetenaxan qataq da ỹauo'o aca ltaunaxanaqte? ¿Cam shiỹaxauapi maye hueta'a cam ilotague' 'alhua huo'otaq cam ỹaqa'a ca chegaqa'ague?
26Nache so Pedro 'enapeco':
–Qomye nam chegaqauecpi.
Nache So Jesús 'enapeco':
–¿Qaq nam lalamaxatpi saishet qone' da desheetenaxan? 27Qalaxaye da yaqto' saishet da dalemata nam lapootega't ana nsheetenaxanaqte, nache no'on da 'anqo'onaxaama qome aso auaxai, ime, nache 'auasaxañi aca 'arqoina. Qaq ca hua'auchiguiñi 'arqoishec nỹaq camaye 'auauachigui na alap qome, nache 'aulalec aca anom lcatole. Nache 'auacona acamaye, nache 'aỹa'aneuo aca isheetenaxanaqte qataq aca 'arsheetenaxanaqte.
