So Jesús nataren so ỹale maye nchega na lo'oc
1Qaq co'ollaq chegoqtasheguema aso qaỹoqotcheguemec 'alhua So Jesús, nache ỹataqta qalota so shiỹaxauapi ca'attague'. 2Qaq anac so ỹale maye nchega na lo'oc, nache ỹa'aroto naua l-llectel So Jesús, nache 'enapega, 'eeta':
–Aỹem saỹaten da 'am 'aushet da aỹem 'anataren ¿'auo'ot peta'a de'era?
3Nache So Jesús ipoteua'a somaye, nache 'eeta':
–¡Aja', seshet! ¡Nagui 'am no'oita!
Nache co'ollaq choche nasaxauec de'era la'aqtac, nache som nchega na lo'oc, somaye ỹataqta no'oita. 4Nache So Jesús 'enapega somaye, 'eeta':
–¡Ỹataqta 'ana'axaỹaxaachigui qome de'era shenapec! Saishet qome da huo'o ca 'aua'axatem de'era. Nachaqrata da 'am qojec, 'anachaxaneua'a ñim ltaxaỹaxanaxanec na shiỹaxauapi da qaitaxaỹapegue' Ñim Lo'onatac 'Enauacna, qataq 'aỹa'aneuo qome aca 'arachetaqtaxanaqte maye damaxasoxoolec co'ollaxa so Moisés, yaqto' qaỹaỹaten da mashe 'am no'oita.
Da lpi'iỹaxac so huataxanaq lta'a maye Roma le'ec
5Qaq huo'o so na'a'q So Jesús taua'a ye nỹecpi maye le'enaxat Cafarnaúm, nache anac so huataxanaq lta'a maye lma' ye Roma da nachoxoreetacot Somaye, 6'eeta':
–'Am Ỹataxala', ye ỹamaxashec huetaña ye ima' huetalec ye lmala', yemaye saishet da ñesheguem, ỹataqta lta'araic da nque'eenaxac souaxat da nqui'ic.
7Nache So Jesús 'enapeco':
–Aja' Aỹem ñeqo'ona da ñataren.
8Nache so huataxanaq lta'a 'enapeco':
–'Am Ỹataxala', aỹem ỹataqta saq saiguet da 'aunoxonoigui ñi ima'. Nachaqrata da choche 'aỹa'an ca 'ara'aqtac, nache ye ỹamaxashec no'oita. 9Cha'aye aỹem saỹaten da nalaxayec qataq da namaxasoxonaxac. Da huo'o ca shenapega 'oonolec na ñalleppi da nqo'ona ca lauanec, nache camaye jec. Qataq da shenapega ca lỹa da sheeta' 'auanac, nache camaye anac, qataq da samaq ca ỹamaxashec da huo'o ca ỹo'ot, nache camaye ỹalaq da huo'o ca ỹo'ot.
10Qaq co'ollaq hua'axaỹa de'era So Jesús, nache ỹataqta huo'o da la'aalaxa. Nache 'enapega som nnaictague'pi, 'eeta':
–¡Aỹem ỹataqta 'eesa de'era shenapec da 'enauac na Israel le'ecpi qaica ca selalec da ỹapactec da lpi'iỹaxac Aỹem, da 'eeta'am de'era ỹale maye chegaqauec! 11Ỹataqta qana'axaỹaxañiichigui de'era shenapec: 'enauac naua pa'aiguelo ana 'alhua anac qome na shiỹaxauapi maye huo'o da lpi'iỹaxac Ñim Lo'onatac 'Enauacna, 'eeta'am da lpi'iỹaxac de'era ỹale. Namayepi ỹalegueua'a qome ca lta'araic lquia'axac Ñim Lo'onatac 'Enauacna qom qanayeetaigui da lo'onataxanaxac Ñimaye. Nso'ona'ai' da yaqto' lquia'axaua qome soua sachegoxosoxogueta Abraham, Isaac, qataq so Jacob. 12Qalaxaye nam hua'auchiguiñi ncoyeguenatacpi maye ỹalegueua'actaxa da lo'onataxanaxac Ñim Lo'onatac 'Enauacna, namayepi qaỹasaxauga ca napalaxa. Huaña da ỹataqta nỹen souaxat da nqui'ic qataq inaga't naua lhue souaxat da lcolanaxa.
13Nache So Jesús 'enapega se'eso huataxanaq lta'a, 'eeta':
–'Avi'eguelaxa qome ca 'arma'. Qaq ỹataqta ipacchigui qome da 'eetec da 'arpi'iỹaxac.
Nache ipacchigui da no'oita se'eso namaxashec co'ollaq qoỹan da na'aqtac.
So Jesús nataren aso lachoro so Pedro
14So Jesús nqo'ona so lma' so Pedro. Qaq co'ollaq ivita, nache ilalec aso lachoro so Pedro da sa no'on, huetalec so lmala', ỹataqta ỹaguec na le'eraxa. 15Nache So Jesús ipoteua'a, nache se'eso le'eraxa qaica. Nache asomaye ñesheguem, nache huetague' Somaye qataq iquia'axan.
So Jesús nataren so qalota sa no'onpi
16Qaq co'ollaq mashe napaltapiguiñi, nache qanauegueua'a So Jesús so qalota shiỹaxauapi maye huo'o na netaigui saqcha'a na'añaxac leguemaxaicpi. Qaq Somaye 'oonolec so la'aqtac, nache ỹo'orauec se'eso saqcha'a na'añaxac leguemaxaicpi, qataq nataren 'enauac som sa no'onpi maye qanauegueuo.
17Qaq 'eetec de'era, yaqto' ỹataqta ipacchigui dam ỹachaxanapec co'ollaxa Ñim Lo'onatac 'Enauacna maye ỹa'axat so la'aqtaxanaxanec le'enaxat Isaías co'ollaq, 'eeta': «Camaye nataren 'enauac na qaralolaxasat, qataq qomi' nca'alaxateeguesopa na qanque'eenaxaguesat.»
Soua nshetraique da ca'atregue So Jesús
18Qaq So Jesús co'ollaq ila'a da ỹataqta qalota so shiỹaxauapi da laponeua'a nache 'enapegalo soua lapaxaguenataqa da taitrague da le'ego aso lapel late'erai ye Galilea. 19Qaq co'ollaq ivittra, nache anac som 'oonolec nam dapaxaguenataxaatapeguec na lamaxasoxonaxacpi so Moisés, nache nquigueua'a Somaye da 'enapega, 'eeta':
–'Am Napaxaguenataxanaq, aỹem 'am seca'ategue, maicheye cam 'auataigue.
20Nache So Jesús 'enapeco':
–Anam huaxaỹaxapi huo'o na lauacpi, qataq nam maỹopi huo'o na lpata'cpi, qalaxaye Aỹem Shiỹaxaua Llalec, saishet da huo'o ca ỹalamaxat ima' da ñematec.
21Qataq anac so 'oonolec nam lapaxaguenatacpi, nache 'enapega 'eeta':
–'Am Ỹataxala', ñaq Aỹem 'aua'axaỹa'a da ña sa'auaxaañi da selayiñi ye ita'a; ime nache 'am seca'ategue.
22Nache So Jesús 'enapeco':
–Aỹem 'auca'ategue, cha'aye ỹoqta ỹactec da 'onaxaic da Aỹem 'auca'ategue nagui. ¡Ñaq 'aua'axaỹa'a nam leuaxaicpi da ilayiñi nam lqatacpi!
So Jesús ỹa'axaneguet so la'at lta'araic
23Nache So Jesús huenongui aso nllocta, nache jec da nnaicapegueto soua lapaxaguenataqa. 24Qaq co'ollaq ñaq quetralec aso lapel, nache anac so la'at ỹataqta lta'araic, ỹoqo'oye ana lapaxa so 'etaxat tangui aso nllocta. Qaq So Jesús do'ocheta. 25Nache soua lapaxaguenataqa nqo'onalo Somaye da nquetoxo'n, 'eetra':
–¡'Am Qarataxala', ña qomi' 'anca'alaxatre'c! ¡Ten, huotaique da qomi' iyiiyiñi!
26Nache So Jesús 'enapeco':
–¿Ta'ainco' ye qayi'i? ¡Qami' ỹataqta saq 'amaqtaq da qarpi'iỹaxaqui Ñim Lo'onatac 'Enauacna!
Nache So Jesús ñesheguem, nache 'enapega so la'at qataq ana lapaxa so 'etaxat da vi'iiguet, nache 'enauac ỹe'eguelaxa da ntochiguiñi. 27Nache soua lapaxaguenataqa ỹataqta huo'o da la'aalaqa' de'era, nache nnattega't 'eetra':
–¿Negue't dam da' ỹale, ye ivira'a na la'at qataq ana lapaxa na 'etaxat da ỹalaxaguet?
Soua ỹale't Gadara lashe' maye huo'o so netaigui saqcha'a na'añaxac leguemaxaic
28Qaq So Jesús co'ollaq mashe ivittague da le'ego aso lapel late'erai, ivittra yem 'alhua Gadara, nache ana'c soua dos ỹale't maye netaiguilo so saqcha'a na'añaxac leguemaxaic soomaye chegoqtroigui ca napa'alpi da ca'atra'aguet So Jesús. Qaq se'esoua ỹale't ỹataqta chaqaiqa, ỹoqo'oye qaica ca ishet da tateuga se'eso nqa'aic. Qaq se'esoua dos ỹale't co'ollaq nquiguereua'a So Jesús, 29nache soua saqcha'alo na'añaxaco leguemaxaiqa ỹa'alaqtai'salo, 'eetra':
–¡'Am Jesús maye 'am Llalec Ñim Lo'onatac 'Enauacna!, ¿negue't cam qomi' 'auo'oteque? ¿'Auauo'o peta'a ca qanhuaxanaguec nagui da saxanaxa da nvi' ca nmitaguec 'enauacna?
30Qaq se'eso qanayeuta'a, nache saqaỹauga so netaña aso qalota cos late'epi deque'etac. 31Nache se'eso saqcha'a na'añaxac leguemaxaicpi nachoxoreetacot So Jesús, 'eeta':
–Da qomi' 'anqateeguesopa ne'enaua ỹale't, nache no'on da qomi' 'auasheetema da saxaigui aya'aye cos late'epi.
32Nache So Jesús 'enapeco':
–Aja', qaunoxoñiỹoigui ayemayepi.
Nache se'eso saqcha'a na'añaxac leguemaxaicpi ca'aisalo se'esoua ỹale't, nache taigui aso cos late'epi. Qaq co'ollaq ime da taigui, nache 'enauac aso cospi nqalgaqangui so tocot, nache tangui aso lapel, nache 'ogaxaipi.
33Qaq soua ỹale't maye ilotegueto aso cospi soomaye datare'c, cha'aye ỹataqta ñi'i'. Qaq co'ollaq ivireua'a ca nỹecpi, nache ỹa'axattrac 'enauac de'era qataq dam huaiguilo soua ỹale't maye huo'o so netaigui saqcha'a na'añaxac leguemaxaicpi. 34Nache 'enauac so shiỹaxauapi maye lma' yi'iye, nauga So Jesús, nache nachoxoreetacot da ca'ai ye lma' somayepi.
