Marcos 11

₁So Jesús qataq soua lapaxaguenataqa, co'ollaq ivilda aso qaỹoqotcheguemec 'alhua maye nanqa' ana Olivo, maye saqaỹapigui yeua Betfagué qataq Betania, qataq ye nỹecpi ye Jerusalén. ₂Huaña yemaye, nache So Jesús 'enapegalo soua dos lapaxaguenataqa, 'eeta':

–Qanqo'oñiỹa qome ye nỹecpiolec maye yo'oqotta na souaqta'a. Qaq qom choche qaunoxoñiiua'a, nache qanateñiỹalec ca 'ashena qaicoñettai', camaye saxanaxa da qanayeelec. Qausoiuec qome, nache Aỹem qanaviquiỹa. ₃Qaq da huo'o ca qami' ina't, da ta'ainco' da qausoiteguec, nache qaua'aqtaxañim qome qoñiita': «Ñi Qarataxala' iuen namaye, qalaxaye qom imat, nache ñe'eguelaxataq.»

₄Nache soua napaxaguenataqa tareua'a so nỹecpiolec. Huaña yemaye, nache natenaleguete so 'ashena qaicoñettai' netaua'a na laỹe so nqa'aic, nache isore'c.

₅Qaq so shiỹaxauapi maye hueta'a yi'iye inatta'ape soomaye, 'eeta': «¿Negue't cam qoñiitapeguec? ¿Ta'ainco' ye qausoitapeguec na 'ashena?»

₆Nache soua napaxaguenataqa da'aqtaxaarem somayepi, ipagaqchiichigui da la'aqtac So Jesús. Nache so shiỹaxauapi hua'aqta'alo da je'c soomaye. ₇Ime, nache ỹaue'c soomaye so 'ashena ỹauegalo So Jesús, nache soomaye ỹasaxaleguete soua npo'ote so 'ashena, nache So Jesús nelec somaye.

₈Qaq ỹataqta qalota so shiỹaxauapi lapaxañi na lapo' da ỹachangui so nqa'aic maye tateuga So Jesús. Qataq huo'o na iquesoxouec ana qo'oipaq lcoue, nache ỹachangui so llec Somaye da qaỹauotaique lapiaxala'. ₉Nache 'enauac so shiỹaxauapi nam hua'autapi, qataq nam nca'ataxaatauo, somayepi ỹa'alaqtalec So Jesús, 'eeta':

«¡Qomi' 'anca'alaxatre'c!

₁₁Nache So Jesús co'ollaq inoxoneua'a ye Jerusalén, nache taua'a aso no'onaxanaxaqui late'erai, huaña, qaq imeteetac 'enauac nam huo'o. Qalaxaye souaxat da mashe avit, nache jec nnaicapegueto soua lapaxaguenataqa da taỹa ye nỹecpiolec le'enaxat Betania.

₁₂Qaq so lỹa na'a'q, nache So Jesús qataq soua lapaxaguenataqa quera'ai ye Betania. Qaq co'ollaq huangui so nqa'aic, nache So Jesús nomteguet na lqouaxa ₁₃nache ñaq qaỹoqta co'ollaxa aso higo lcheyec, nache ilota'a, cha'aye ỹataqta ỹaguec ana lauepi asomaye. Qalaxaye co'ollaq maye ivirot, nache qaca aca ỹanata ala da yaqto' chec, cha'aye asomaye nda'a't ana laue, qataq saxanaxa da ivita ye laloxoqui da huo'o ana ala. ₁₄Nache So Jesús 'enapego' aso higo lcheyec, 'eeta': «¡Nagui, nache tachiguiña qome da saishet da huo'o ca chec ca alaỹaxac da qoneta!»

Nache soua lapaxaguenataqa hua'aqchiguilo de'era.

₁₅Qaq co'ollaq ivildeua'a ye Jerusalén, nache So Jesús pa'aigui aso no'onaxanaxaqui late'erai. Huaña, nache ỹo'orauec som huo'o na imeetac qataq som desheenaxatega na qaimeetac. Qataq ỹamaxañi so nmenaxala'pi nam nmeetega't naqa'en ana alom na shiỹaxauapi, qataq ỹamaxañi aso laỹe' na qoto'pi. ₁₆Nache saishet da huo'o ca ỹashenem da coleetegoigui aso no'onaxanaxaqui da ỹachetac ca lla'ac. ₁₇Huaña, nache dapaxaguenataxaatac, 'eeta': «Naua nanettrañi la'aqtaqa Ñim Lo'onatac 'Enauacna, 'eeta': ‹Ne'ena ima', namaye qaỹa'axatta da qouagaxaunaqa', nqouagaxaunaqa' 'enauac na ỹotta'a't shiỹaxauapi.› Qalaxaye qami' qauo'ochec namaye da nqañoxotaqa' na cachaxaicpi.»

₁₈Nache co'ollaq hua'aqchigui de'era nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq nam dapaxaguenataxaatapeguec na namaxasoxonaxacpi. Nache chegoqchiguiña da nmittaique ca lataxac da yaqto' ỹalauat So Jesús souaxat da ñe'etega, cha'aye 'enauac na shiỹaxauapi ỹataqta huo'o da la'aalaxa Somaye naua lapaxaguenataxanaxaco.

₁₉Qalaxaye co'ollaq mashe pe, nache So Jesús qataq soua lapaxaguenataqa, quera'ai ye Jerusalén.

₂₀Qaq so nte'etom so lỹa na'a'q, nache So Jesús qataq soua lapaxaguenataqa qaltaq tatrelec aso higo lcheyec, nache qaila'ata asomaye da deqaqta, ivira'alo naua lpa'aye da deqaxai'.

₂₁Nache so Pedro tachigui lauel co'ollaxa dam huaigui so lỹa na'a'q, nache 'enapego' So Jesús, 'eeta':

–'Am Napaxaguenataxanaq, ña 'aula'a aram higo lcheyec maye 'auasaxalec so qauem 'ara'aqtac caillaye, aramaye deqaqa.

₂₂Nache So Jesús 'enapeco':

–Ỹataqta qauauo'oi qome ca qarpi'iỹaxaqui Ñim Lo'onatac 'Enauacna. _23-24Ỹataqta 'eesa de'era qami' sa'axatema, da huo'o ca qarpi'iỹaxaqui qataq saishet da qauqolliguichi da la'añaxac Ñim Lo'onatac 'Enauacna, nache 'enauac cam qauỹaxañiỹaique da qanqouagaxauñi qalaq huo'o. Da qoñiỹapega añi qaỹoqotcheguemec 'alhua da, qoñiita: «Qoca'ai qome na qonetaña, nache 'angui aso auaxai», qaq nache ipacchigui. Nachaqrata da qaua'amaqchiñi da ipacchigui ca qauỹaxañiỹaique.

_25-26Qaq da qanqouagaxauñi qalaq qauchoxoyiñi ca shiỹaxaua maye huo'o ca qami' ỹo'oteque qauem. Yaqto' Ñim Lo'onatac 'Enauacna maye Qarta'ai maye neta'ague da piguem, ỹapalaxat na qarasouaxashechi.

₂₇Qaq co'ollaq ime de'era, nache ỹe'eguelaxareua'a ye Jerusalén. Nache So Jesús co'ollaq ñaq coleetegoigui aso no'onaxanaxaqui late'erai, nache naỹa Somaye som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq som dapaxaguenataxaatapeguec na namaxasoxonaxacpi, qataq som lta'alpi na judiopi, ₂₈da yaqto' inat Somaye:

–¿Negue't ca 'am ỹami' da 'ara'añaxac da 'auo'ot 'enauac de'era?

_29-30Nache So Jesús 'enapeco':

–Aỹem nataqa'en huo'o da inataxanaxac da qoñiita: ¿negue't co'ollaxa ca ỹami' da 'enec so Juan maye nachelaxanataxanaq da yaqto' dachelaxanataxan? ¿Ñim Lo'onatac 'Enauacna, huo'otaq ca choche shiỹaxaua? Da Aỹem qauasacheeguet, nache nataqa'en qami' sa'aqtaxanema cam sachegoxota'ague da ỹa'añaxac da so'ot 'enauac de'era maye qauauañiichigui.

₃₁Nache somayepi taỹa't da maiche ncotatega't, 'eeta':

«Da qomi' shenaqapec da nacheñi Ñim Lo'onatac 'Enauacna ỹami' da la'añaxac so Juan, nache ỹoqta qome da qomi' ina't da ta'ainco' da saishet da sa'amaqtenaq. ₃₂Qalaxaye nataqa'en sa seshetaq da shenaqapec da choche shiỹaxaua cam ỹami' de'era.»

Qaq somayepi saishet da ỹaỹamaxaren da nache 'eetec da lasataxac, cha'aye ñe'etega na shiỹaxauapi, cha'aye ỹaỹaten da 'enauac namayepi ỹa'amaqten so Juan da ỹoqta 'eesa la'aqtaxanaxanec Ñim Lo'onatac 'Enauacna. ₃₃Ỹoqo'oye somayepi co'ollaq ỹasateguet So Jesús, nache 'eeta' da lasataxac:

–Qomi' sa saỹaanaq.

Nache So Jesús 'enapego' somayepi, 'eeta':

–Aỹem nataqa'en saishet da qami' sa'aqtaxanema cam sachegoxoto'ot da ỹa'añaxac da so'ot 'enauac de'era.