1So Jesús nataqa'en 'enapeco':
–Ỹataqta 'eesa de'era qami' sa'axatema, da huo'o nagui nam ỹalectauopi nam saxanaxa qome da ileu, ivitta'a da ỹauaachigui da lo'onataxanaxac Ñim Lo'onatac 'Enauacna qataq da la'añaxac da ilo'ogue 'enauacna.
So Jesús nqochen da lataxac
2Qaq co'ollaq inoxoore'c soua seis na'axa'te, nache So Jesús ndoqnaxaatre'c da nnaicapegueto soua Pedro, Santiago qataq so Juan, da taresheguemec aso qaỹoqotcheguemec 'alhua. Qaq hualec asomaye, nache nqochen da lataxac, ỹauaachiguilo naqa'en soomaye. 3Soua alogo ỹataqta qashelectrapiguiñi qataq ỹataqta qaica ca 'ena'am da lapagaqa', saishet da huo'o ca ivi' ana 'alhua. 4Ime, nache soua lapaxaguenataqa ilora'a so Elías qataq so Moisés da detaqtrague' So Jesús.
5Nache so Pedro 'enapego' So Jesús, 'eeta':
«'Am Napaxaguenataxanaq, ¡ỹataqta ỹaỹamaqchiguiñi da nache souaqta'a ne'ena! Nache so'ota'q caua tres qaya'axaquilli', 'oonolec ñaqa'enaq ca 'arma', qataq da Moisés, qataq da Elías.»
6Cha'aye soua lapaxaguenataqa ỹataqta ñi'i' co'ollaxa, ỹoqo'oye so Pedro saỹaỹaten ca 'eetec ca naigui da nasaxauec.
7Nache saqaỹaloq da anac so lo'oc chegoqo'ot na piguem da naloteleguete soomaye. Qaq se'eso lo'oc chemaxaigui so na'aqtac, 'eeta':
«'Era da Ỹalec maye ỹataqta ỹauotaxat, damaye qaualaqaiguet qome.»
8Qaq co'ollaq namatrashegue'm, nache qaica ca lỹa ilora'a, nachaqsota So Jesús.
9Qaq co'ollaq mashe huenotreeguesop aso qaỹoqotcheguemec 'alhua, nache So Jesús huaqattapegueleguete soua lapaxaguenataqa da saishet da huo'o ca ỹa'axatrem de'era lauanaqche'c, choche ivitta'a da Somaye, som Shiỹaxaua Llalec qaltaq nca'alec. 10Ỹoqo'oye so Pedro, Santiago qataq so Juan ỹataqta saishet da ỹa'axa't de'era, qalaxaye nchemaxattrapigui da chaq 'eetec ca naigui da qaltaq nca'aleeguesop da l-leuaxa Somaye. 11Nache denataxa'n, 'eetra':
–¿Ta'ainco' ye nam dapaxaguenataxaatapeguec na namaxasoxonaxacpi ye 'eetega da hua'auñi da nvi' ca la'aqtaxanaxanec Ñim Lo'onatac 'Enauacna le'enaxat Elías, qom saxanaxa da nvi' ca Lca'aguishec Ñim Lo'onatac 'Enauacna?
12Nache So Jesús ỹasategueto' soomaye, 'eeta':
–Damaye 'eesa, da ca Elías hua'auñi da nvi' da yaqto' ỹaỹamaxaañi 'enauac na lataxaguesat, qataq na'aictaxa da nataqa'en 'eesa naua ñiyigui'she la'aqtaqa Ñim Lo'onatac 'Enauacna, da ỹa'axa't da na Shiỹaxaua Llalec ỹataqta huo'o qome da nque'eenaxac qataq qano'otangui. 13Qalaxaye Aỹem 'eesa de'era qami' sa'axatema, da so Elías mashe sogote da nvi', qalaxaye qalota na sa iyacnapec somaye. Qalaxaye, nache 'eetec dam la'aqtaxanaxac ana nere maye huetalec na la'aqtacpi Ñim Lo'onatac 'Enauacna.
So Jesús nataren so nsoq
14Qaq co'ollaq nvilda cam huetra'a soua lỹa't lapaxaguenataqa, nache ilora'a so saqalota shiỹaxauapi coleesopa soomaye. Nataqa'en huo'o nam dapaxaguenataxaateguec na namaxasoxonaxacpi maye chegoqo'ot so Moisés da ỹalectauo da ncotategueto soomaye.
15Qaq co'ollaq ila'aguet So Jesús so shiỹaxauapi, nache somayepi ỹataqta lta'araic da ntonaxac, cha'aye mashe saishet da qaipettega da qanauane', nache qanqalgoqta'aguet Somaye da qanquine'.
16Nache So Jesús denataxan, 'eeta':
–¿Negue't cam qancotaitapigui?
17Nache huo'o som ỹalectauo ỹasat, 'eeta':
–'Am Napaxaguenataxanaq, 'am ñauegueua'a da ỹalec, cha'aye damaye huo'o ñi netaigui saqcha'a na'añaxac leguemaxaic maye saishet da ỹashenem da da'aqtaxan. 18Da taigui naxa so saqcha'a na'añaxac leguemaxaic da ỹalec, nache huañi naqa'en, nache nauoigui na alap na lcochaxa. Naua lhue qalaq inaga't naxa, qataq ỹataqta nquigaxatta'aguet da deqaqta. Ỹoqo'oye seỹaxaategoiguilo daua 'arapaxaguenataqa da ỹo'oldaue'c ñi'iñi saqcha'a na'añaxac leguemaxaic maye netaigui da ỹalec, qalaxaye daamaye saishet da ỹañoxo't.
19Nache So Jesús 'enapeco':
–¿Ta'ainco' ye sa qauaỹaañi da qaupi'iỹa'ai Ñim Lo'onatac 'Enauacna? ¿Peta'a ỹapac da saishet da huo'o ca qauañoxoche da saishet da qami' soota'agueta? ¡Ñaq Aỹem qanaviquiỹa na nsoq!
20Nache sa qaỹaỹaloxon da qaỹauegueua'a Somaye so nsoq. Nache so saqcha'a na'añaxac leguemaxaic co'ollaq ilo'ot So Jesús, nache decopche naqa'en so nsoq, nache ncocatapiguiñi, qataq anac naqa'en na lcochaxa na alap.
21Nache So Jesús inattac so lta'a so nsoq, 'eeta':
–¿Chaq lagui co'ollaxa da huo'o de'era?
Nache so lta'a 'enapeco':
–Qomye nache chegoqchiguiña so ñaq nogotolec. 22Qataq nache chegoqchiguiña naxa da ñi'iñi saqcha'a na'añaxac leguemaxaic da huotaique da ỹalauat da tangui naqa'en na norec, huo'otaq na 'etaxat. Qaq ỹoqo'oye qomi' 'anqouagueque, da qomi' 'autaua'n. ¡Ñaq qomi' 'auchoxore'n!
23Nache So Jesús inat somaye, 'eeta':
–¿'Aupi'iỹa'a Ñim Lo'onatac 'Enauacna? Cha'aye cam pi'iỹa'a Ñimaye, nache qaica ca alaq.
24Nache so lta'a so nsoq, somaye ỹa'alaq, 'eeta':
–¡Aja', sepi'iỹa'a Ñim Lo'onatac 'Enauacna! ¡Aỹem 'autauan, yaqto' nquiguisheguem da ipi'iỹaxac Ñimaye!
25Nache So Jesús co'ollaq ila'aguet da mashe qalota na shiỹaxauapi da huotaique qanpataxagui Somaye, nache nlaxa so saqcha'a na'añaxac leguemaxaic, 'eeta':
–'Am saqcha'a na'añaxac leguemaxaic maye saq da'aqtaxan 'anqa'en ne'ena nsoq, ¡'am shenapega da qoca'ai, qataq saishet da 'añe'eguelaxa namaye!
26Nache so saqcha'a na'añaxac leguemaxaic ỹa'alaq, nache decopche naqa'en so nsoq. Ime, nache ca'ai, qalaxaye 'eeta'am naqa'en da ileu. Qaq ỹoqo'oye qalota na 'eetega da ileu so nsoq. 27Qalaxaye So Jesús ỹacona na lhuaq somaye da itauan da nachaalataxaañi, nache so nsoq nachaañi.
28Qaq co'ollaq ime de'era, nache So Jesús ỹe'eguelaxa ca nma', nache soua lapaxaguenataqa co'ollaq nda'agueta Somaye, nache inattrac, 'eeta':
–¿Ta'ainco' qomi' ye sa seshetaq da so'oraqauec so saqcha'a na'añaxac leguemaxaic?
29Nache So Jesús 'enapeco':
–Qomye na 'eeta'am se'eso saqcha'a na'añaxac leguemaxaic da qaỹo'orauec, qalaq iuen da ỹataqta nqouagaxauen ca shiỹaxaua.
So Jesús qaltaq ỹa'axata'a da l-leuaxa
30So Jesús qataq soua lapaxaguenataqa quera'ai yi'iye huetra'a, nache taỹaleguete ye 'alhua Galilea. Nache So Jesús nshetaique da saishet da qaỹanoma da nateuga yi'iye, 31cha'aye Somaye huotaique da nalemaqte' da ỹapaxague'n soua lapaxaguenataqa nache, 'eeta':
«Aỹem Shiỹaxaua Llalec Aỹem qoỹaneua'a qome na shiỹaxauapi da yaqto' Aỹem ỹalauat. Qalaxaye qom inoxoore'c caua tres na'axa'te, nache qaltaq ñeca'alec.»
32Qaq soua lapaxaguenataqa saishet da ỹaỹate'n de'era qaỹa'aqtaxaatapeguema, qalaxaye ñi'iỹaleguete da qaltaq denataxa'n.
¿Negue't ca ỹoqta ỹactec da la'amaqchec?
33So Jesús qataq soua lapaxaguenataqa ivildeua'a ye nỹecpi ye Cafarnaúm. Qaq co'ollaq mashe huetra'a ca nỹec, nache So Jesús inatta'ape soua lapaxaguenataqa, 'eeta': «¿Negue't ca qanqalloxocheetapigui qami' so ñanaguenaqtague' na nqa'aic?»
34Qalaxaye soua lapaxaguenataqa saishet da ỹasa't, cha'aye co'ollaq huangui so nqa'aic, nache ncotatrapigui da chaq negue't ca ỹoqta ỹactec da la'amaqchec soomaye.
35Nache So Jesús nso'ooñi, nache iỹaxanalo soua doce lapaxaguenataqa, nache 'enapegalo, 'eeta':
«Da huo'o ca 'oonolec da qoñiita da huotaique da 'amaqtaqaic, nache camaye iuen da hueta'a ca pa'atec ndaqa', qataq nacheca ca lamaxashec na laỹepi.»
36Ime, nache iỹaxana so 'oonolec nogotolec, nache ỹataxanoiguilo soomaye. Ime, nache ỹacona da nsoxouo so nogotolec, nache 'enapegalo soomaye, 'eeta': 37«Qami' da qauacoñiiguet ca nogotolec, 'eeta'am ne'ena ñesoqtauo, nache Aỹem qauacoñiiguet. Qaq da Ayem qauacoñiiguet, nache nataqa'en qauacoñiiguet Ñim Lo'onatac 'Enauacna maye Aỹem namaq.»
Ca sa qomi' mpa'aguenalo, nache camaye qartaua
38Nache so Juan som 'oonolec soua napaxaguenataqa 'enapego' So Jesús, 'eeta':
–'Am Napaxaguenataxanaq, qomi' huo'o so sauanaqchigui da do'otaxaatega da 'are'enaxat da ỹo'ottapeguec na saqcha'a na'añaxac leguemaxaicpi, nache qomi' sellaqapeguem, cha'aye saishet da qarỹa somaye.
39Qalaxaye So Jesús 'enapeco':
–Saishet da qaulliỹapeguem, cha'aye saishet da huo'o ca 'oonolec da huo'otaq ỹo'ot ca sa qaỹauanapega da do'onataxana da ỹe'enaxat, qaq da ime, nache Aỹem isheueetac. 40Cha'aye ca sa qomi' mpa'aguenalo, qaq nacheca ca qomi' itauaata'ape.
41Qaq ỹataqta 'eesa da Ñim Lo'onatac 'Enauacna saishet da icoua'ai da ỹami' ca nsheetenaxat cam qami' ỹanema ca qaraquipi, souaxat da qami' ỹalamaqa'ate.
Dam taỹa'aguet ca shiỹaxaua da ỹo'otec da ca'ai da lpi'iỹaxac ca lỹa
42Da huo'o ca ỹo'otec ne'enatai' saq 'amaqtaqpiolec maye Aỹem quetague' da ỹaxaañi da Aỹem pi'iỹa'a, nache camaye no'on da qaicoñero'ot na lqosot ca lta'araic coma', ime, nache qaỹasaxangui aso auaxai.
43Na maiche 'arhuaq da huo'otaq 'am ỹaueca'a da sa 'aualaxaguet Ñim Lo'onatac 'Enauacna, qaq no'on da 'aucheguec. Cha'aye ỹaỹamaqchiguiñi da 'aunoxoneua'a da nca'alaxa da 'oonolec na 'arhuaq, saq 'ena'am da nalota't naua 'arhuaxaye, qalaxaye 'am qaỹasaxaña ca hueta'a ca norec maye saishet da qaỹalamat. 44[Qataq hueta'a na qoche'l maye saishet da ileu, qataq ca norec maye saishet da 'om.]
45Qataq na 'arapia' da huo'otaq 'am ỹaueca'a da sa 'aualaxaguet Ñim Lo'onatac 'Enauacna, qaq no'on da 'aucheguec. Cha'aye ỹaỹamaqchiguiñi da 'am teraic da 'aunoxoneua'a da nca'alaxa, saq 'ena'am da nalota't naua 'arapia'ate da 'am qaỹasaxauga ca nhuaxanaqa' na 'etaxaloxoicpi [cam norec maye saishet da qaỹalamat 46maye hueta'a na qoche'lpi maye saishet da ileu, qataq ca norec maye saishet da 'om.]
47Qataq ana 'ara'aite da huo'otaq 'am ỹaueca'a da sa 'aualaxaguet Ñim Lo'onatac 'Enauacna, qaq no'on da 'anqat. Cha'aye ỹaỹamaqchiguiñi da 'oonole añi 'ara'aite da 'aunoxoneua'a da lo'onataxanaxac Ñim Lo'onatac 'Enauacna, qalaxaye saq 'ena'am da nalota't naua 'ara'ai'te da 'am qaỹasaxangui ca norec maye saishet da qaỹalamat, 48qataq huetaña na qoche'l maye saishet da ileu, qataq cam norec maye saishet da qaỹalamat.
49Ñim Lo'onatac 'Enauacna, Ñimaye iqui'itaxat 'enauac da shenaqta, 'eeta'ama qomi' da sequi'itaxataq ca camachaqca da sauoqta'a na toue huo'otaq na norec. 50Na toue, namaye ỹataqta no'on. Qalaxaye da huo'otaq deqat da lle'euaxa, qaq ¿ca 'eetec qami' da qavi'eguelaxachiỹa da lle'euaxa? Qaq ỹoqo'oye, qami' iuen da qoñiỹa'am namaye da ỹataqta qami' no'o'n: qauo'oche ca ỹaỹamaqchiguiñi qataq qaulaquiitapiguiñi da qaualliquiitaigui na shiỹaxauapi.
