So Nehemías ỹe'eguelaxa ye Jerusalén
1Qaq huo'o so na'a'q, huetoigui so ca'agoxoic Nisán, so mashe ivi' naua veinte vi'iye da lo'onataxanaxac so nta'a Artajerjes, nache cai sanem se'eso nta'a aso nỹomaxaqui huetagui so lataxa, nache somaye aỹem ỹauatton da ỹataqta saquico, saq 'ena'ama soua lỹa't na'axa'te, 2nache aỹem inat somaye, 'eeta':
¿Chaq ta'ainco' da 'auaquicota? Ye 'eco' saishet da 'am sano'on, yo'oqta da huo'o ca huo'omshe huo'o da 'anqui'ic.
Nache aỹem ỹataqta huo'o da icolanaxa. 3Nache sasateguet se'eso nta'a, sheeta':
¡Ỹataqta nache 'eetai' qome da 'anca'altauec 'am nta'a! Ta'ainco' ctaxa da qaica ca ỹaquicoxo ye ỹataqta nlachiguiñi ye sachegoqchiguiña huaqta'a't nỹecpi maye nlattraña yeua ita'al, qataq so lasompi ỹataqta ỹavicta naqa'en so norec.
4Nache se'eso nta'a, 'enapec:
¿Qaq chaq negue't ca 'anshetaique da 'am setaunec? Huaña nache ỹataqta seỹaxanot Ñim Nataxala' da aỹem itauan. 5Nache sasateguet se'eso nta'a, sheeta':
'Am nta'a, maye aỹem 'aramaxashec, da 'auaỹamaxareeta qataq da aỹem 'anqouaguec, nache aỹem 'auamaxa qome ye Judá, yem huaqta'a't nỹecpi maye nlattraña yeua ita'al da yaqto' qaltaq ño'oxoosheguem.
6Nache so nta'a maye huaqta'ai' co'ollaxa aso nate'e, aỹem inat, 'eeta': ¿Chaq lcate' na'axa'te caua ivi' ca 'icỹaxac, qataq ca lagui da 'añe'eguelaq? Nache so sa'aqtaxanem so laloqo' da ñe'eguelaq, nache ỹaỹamaxareeta da aỹem ỹamaq. 7Huaña nache sheetega so nta'a, sheeta': Da 'auaỹamaxareeta, nache ishet da aỹem 'aỹa'anem aca 'ere, taỹa'a ye nta'alpi maye ilotague'pi ye 'alhua maye pa'aỹa'ague da avit so auaxai lche le'enaxat Éufrates, da yaqto' saishet da aỹem nqanaxat, choche sevitta'a ye Judá, 8nataqa'en seỹaxanot da ỹo'ot aca lỹa lere da taỹa'a so Asaf, maye ilotague' so aviaq da yaqto' aỹem ỹanem ca qo'oipaqpi da yaqto' so'ot ca lasompi se'eso lpaqtaxanaxat aso nalloxolate, maye netaña so saqaỹapeque aso atamnaxaqui, nataqa'en so lpaqtaxat so huaqta'a't nỹecpi qataq ca ima' da yaqto' sonaigui. Nache se'eso nta'a aỹem ỹanem 'enauac so seỹaxanaiquepi, cha'aye aỹem hueta'aguet da lqouagaxanaqtaic Ñim Lo'onatac 'Enauacna.
9Nache so sevita se'eso nta'alpi maye ilotague' so netaña ye 'alhua maye pa'aỹa'ague da avit so auaxai lche Éufrates, nache sanem aso lere so nta'a. Nataqa'en se'eso nta'a huo'o so ỹamaq huataxanaq lta'alpi qataq so nalleppi maye huota'a so lalopi caipi, da yaqto' aỹem nauaatalec de'era ỹequiaxac. 10Qalaxaye cail qaỹaỹaten da huo'o ca nvi' da yaqto' itauan so Israel le'ecpi, nache so Sambalat maye lma' ye Horón, qataq so Tobía maye Amón le'ec, soomaye dalematai' co'ollaxa.
So Nehemías ivita ye Jerusalén
11Qaq so mashe sevita ye Jerusalén, nache so inoxoorec soua tres na'axa'te da soota'a yemaye, 12qaq huo'o so pe, da aỹem soosheguem nache ashec, qaq huo'oi soua ñenaictegueto shiỹaxau', qalaxaye qaica ca sa'aqtaxanem dam ỹachanguit añi iquiyaqte Ñim Lo'onatac 'Enauacna da yaqto' so'otec ye Jerusalén. Qataq qaica ca lỹa huo'o ca nnotaxala' nache aỹemta. 13Qaq se'eso pe nache aỹem satoigui so lasom maye naña ye ca'amapega't, nache sateuga aso qailonec da da'ailo'oc laỹe', qataq so lasom maye naña so laponqa' so lasoguiñi. Ime, nache semeteetac so lpaqtaxat ye Jerusalén maye hua'axauec qataq so lasompi maye ỹataqta ỹavicta souaxat so norec. 14Ime, qataq ashec, ñeqo'ona so lasom maye qailonec da laỹe' na 'etaxat, qataq aso laquip laỹe' so nta'a, qalaxaye saishet da sanata ca ỹec souaxat so sootalec ilo saishet da ỹa'axasoxoolec somaye. 15Qaq so ñaq napaltalec na 'alhua nache shectague' aso lacheugue, qaq huaña nache semeteetac se'eso npaqtaxanaxat. Ime nache ñe'eguelaq, sateua'a so lasom maye naña so ca'amapega't.
16Qaq so nataxala'pi saishet da ỹaỹaten ca saigue qataq na so'ottacpi, cha'aye ñaq saxanaxa da huo'o ca sa'aqtaxanem so judiiopi ivira'a so ntaxaỹaxanaxanecpi, qataq so nataxala'pi, qataq so ltauapi qataq so do'onataxaatacpi. 17Huaña nache shenapega somayepi, sheeta':
«Qami' mashe qauaỹaañeeta da qomi' huo'o da qarqalaic, cha'aye se'eso lpaqtaxat ye Jerusalén ỹataqta nlachiguiñi, qataq so lasompi ỹaqta ỹavicta souaxat so norec. Qaq ỹoqo'oye aỹem qauauaqaiguet qome da yaqto' she'eguelaxasoxolec da ño'oxonaxasheguem so lpaqtaxat ye Jerusalén, da yaqto' saishet da nache 'eetai' da qomi' qaisheueeta'ape.»
18Qaq cael sa'aqtaxanem da 'eetec de'era lqouagaxanaqtaic Ñim Lo'onatac 'Enauacna, qataq naua la'aqtaqa maye aỹem ỹanema se'eso nta'a. Huaña nache somayepi, 'eeta':
«¡Qomoxochectaxa ño'oxonaxasheguem yemaye!»
Huaña nache somayepi ỹataqta 'enauac da huo'o da la'añaxac qataq na'añaxata'a't. 19Qalaxaye cael la'axaỹaxac de'era so Sambalat maye lma' ye Horón, qataq so Tobías maye Amón le'ec, qataq so Gesem maye lma' ye Arabia, nache soomaye ỹataqta qomi' isheueeta'ape qataq qomi' 'eetegalo, 'eeta':
«¿Negue't ca qansheetaique da qauo'oche qami'? ¿Qalqo' qansheetaique da qauataiỹa'aguet ñi nta'a?»
20Nache aỹem sasategueta soomaye sheeta':
Ñim Lo'onatac 'Enauacna maye ilotague' na piguem, Ñimaye qomi' ỹanema qome da huo'o ca ishet da semataq. Cha'aye maiche qomi' lamaxa'she, ỹoqo'oye nagui qaltaq ño'oxonaxasheguem namaye. Qalaxaye qami' saishet da qomi' sa qaualemaxache', cha'aye qaica ca qoñeec, qataq saishet da qananaquiite' na Jerusalén.
