Qano'oxoosheguem so npaqtaxanaxat
1Huaña nache so lataxala' na ntaxaỹaxanaxanecpi le'enaxat Eliasib qataq so ltauapi somaye, ỹe'eguelaxalec da ỹa'ara't so lasom maye qailonec da llegueuo ana qaguetapi, ime, nache ỹe'eguelaxatchiguiña so maiche lma' co'ollaxa, nataqa'en no'oxoosheguem so npaqtaxanaxat, chegoqchiguiña aso qailonec lalloxolate so Cien, nache ivitta'a aso lỹa nalloxolate le'enaxat Jananel. 2Qaq so ỹalleppi maye lma' ye Jericó, nache no'oxoosheguem so maiche pa'aỹa'aguet npaqtaxanaxat, qaq so qotteguet se'eso npaqtaxanaxat maye chegoqchiguiña yemaye, nache no'oxoosheguem so Zacur, som llalec so Imri. 3Qaq so llalaqpi so Sená, somayepi ỹa'ara't so lasom maye qailonec llegueuo na nỹaqpi. Qataq ỹa'alyiñi naua lauoqtel nache ỹauo'o aso lvinaqte, qataq so la'axasoxot da qaỹapogui. 4Qaq so Meremot, maye llalec so Urías, qataq laual so Coos, somaye no'oxoosheguem so maiche pa'aỹa'aguet npaqtaxanaxat, qaq so npaqtaxanaxat maye qota'aguet maye chegoqchiguiña yemaye, nache no'oxooshegue'm so Mesulan, som llalec so Berequías, qataq laual so Mesezabel, qaq so Sadoc, maye llalec so Baná, nache no'oxoosheguem so taỹa'ague so npaqtaxanaxat, 5qaq de'era taỹa'ague se'eso npaqtaxanaxat nache no'oxoosheguem so lma' ye Tecoa, qalaxaye so shiỹaxauapi 'amaqtaqaicpi maye lma' yemaye, saishet co'ollaxa da itauan so ilotague' de'era no'onataxanaxac. 6Qaq so Joyadá, som llalec so Paseaj, qataq so Mesulán, som llalec so Besodías, soomaye ỹaỹamaxaayiñi so ñegueuo ye Jesana. Ime, nache ỹa'alyiñi soua lauoqtel so lasom, qataq aso lvinaqte qataq so la'axasoxot se'eso lasom. 7Qaq da taỹa'ague se'eso npaqtaxanaxat, nache no'oxoosheguem so Melatías maye lma' ye Gabaón, qataq so Yadón maye lma' ye Meremot, qaq soomaye nache huaxaigueta so lma' ye Gabaón, qataq so lma' ye Mispá, maye ỹo'ottrac da lamaxasoxonaxac so nta'a, som ilotague' ye 'alhua maye pa'aigue da avit so tala Éufrates. 8Qaq so taỹa'ague so npaqtaxanaxat, nache ỹo'ot so Uziel, som llalec so Jaraías, maye lo'o na lcat plata, qaq so lỹa taỹaueegue somaye, qalaq ỹo'ot so Jananías, som lo'o na coraxat maye ama da laitaỹaxac, nache soomaye no'oxooyishegue'm so lpaqtaxat ye Jerusalén, ivitta'a naqa'en so qalotegue npaqtaxanaxat. 9Qaq so taỹa'ague so npaqtaxanaxat qalaq ỹo'ot so Refaías, som llalec so Hur, maye ilotague' so tachiguingui na laiñi so 'alhua ye Jerusalén. 10Qaq so Jedaías, som llalec so Jarumaf, qalaq ỹo'ot so taỹa'ague so npaqtaxanaxat maye naloteuga so lma', qaq so lỹa taỹa'ague somaye qalaq ỹo'ot so Jatús, som llalec so Hasabnias.
11Qaq so Malquías, som llalec so Jarín, qataq so Jasub, som llalec so Pajat Moab, soomaye no'oxooyishegue'm da taỹa'ague so npaqtaxanaxat qataq aso nalloxolate maye qailonec da nqatelaxanaxaquipi. 12Qaq so Salún, som llalec so Halojés, som ilotague' co'ollaxa so tachiguingui so laiñi so lma' ye Jerusalén, somaye huaxaigueta soua llale 'alo da no'oxooyishegue'm so lỹa taỹa'ague se'eso npaqtaxanaxat. 13Qaq so Janún, huaxaiguet so lma' ye Zanoaj da ỹaỹamaxaañi so ñegueuo maye le'enaxat ca'amapega't, nache no'oxoosheguem somaye qataq ỹanauo so lasompi, qataq aso lvinaqtepi, qataq so la'axasoxotpi da qaỹapogui somaye, qataq no'oxooyishegue'm so npaqtaxanaxat maye ivi' cuatrocientos cincuenta metros ye lalogaxa nache ivira'a so lasom so lasoguiñi lma'. 14Qaq so Malquías, som llalec so Recab, maye ilotague' ye Bet Haqueren, no'oxoosheguem so lasom maye qailonec lasoguiñi lma', nataqa'en ỹanauo so lasompi qataq aso lvinaqtepi, qataq so la'axasoxotpi da qaỹapogui.
15Qaq so salum, som llalec so Coljozé, maye ilotague' ye Mispá, no'oxoosheguem so lasom aso 'etaxat laỹe', ime, nache ỹauo'o so lapo' so pa'asheguem qataq ỹanauo so lasompi qataq aso lvinaxatpi qataq so la'axasoxotpi. Nataqa'en ỹaỹamaxaañi so npaqtaxanaxat maye chegoqchiguiña aso 'etaxat laỹe' le'enaxat Siloé, maye huaqta'ai' so lanaxanaqa' so nta'a, qataq nache ivitta'a so piaxala'pi maye taỹaña so huaqta'a't nỹecpi maye lalamaxat. 16Qaq so Nehemías, som llalec so Azbuc, som nta'a maye ilotague' so tachiguingui so laiñi so 'alhua ye Betsur, somaye no'oxoosheguem so npaqtaxanaxat maye datatta aso nhuachiqui so nta'a David, qaq nache ivira'a aso 'etaxat laỹe' qataq so lanataqa' so huataxanaqpi.
17Qaq da taỹa'ague se'eso npaqtaxanaxat nache no'oxoosheguem so leviitapi, qataq so Rejún, som llalec so Bani, qataq so Jasabías maye ilotague' so tachiguingui so laiñi so 'alhua ye Keila, somaye maiche lhuennataxac da nqottenec so ta'aỹa'ague se'eso npaqtaxanaxat nache ỹo'onataxanaxan so maiche ilotague'pi. 18Qaq so taỹa'ague se'eso npaqtaxanaxat nache queto'ot da no'oxooyishegue'm soua ltau' so Bavay, som llalec so Henadad, maye ilotague' so lỹa tachiguingui so laiñi so 'alhua ye Keila, 19qaq so Ezer, som llalec so Josué, maye ilotague' ye Mispá, somaye no'oxoosheguem so npaqtaxanaxat maye datatta so ñiguisheguem maye taỹasheguema so nỹec maye laỹe' so no'ogoxonaxat maye naña aso lamaqai. 20Qaq so Baruc, som llalec so Zabay, somaye no'oxoosheguem so npaqtaxanaxat maye chegoqchiguiña asa'aso lamaqai, nache ivitta'a so lma' so Eliasib, som lataxala' so ntaxaỹaxanaxanecpi. 21Qaq so Meremot, som llalec so Urías, qataq laual so Coos, somaye no'oxoosheguem se'eso npaqtaxanaxat ỹachegoxotchiguiña so lasom so lma' so Eliasib, nache ivitta'a so loga't somaye.
22Qaq so ntaxaỹaxanaxanecpi maye naña so loigue so ca'amegue so tala Jordán, nataqa'en no'oxoosheguem so taỹa'ague se'eso npaqtaxanaxat. 23Qaq so Benjamín qataq so Hasun soomaye no'oxooyishegue'm so npaqtaxanaxat maye naloteuga so maiche lma't. Qaq so Azarías, som llalec so Maseías, qataq laual so Ananías, somaye no'oxoosheguem so naloteuga so maiche lma'. 24Qaq so Binuy, som llalec so Henadad, somaye no'oxoosheguem so npaqtaxanaxat ỹachegotchiguiña ye lma' so Azarías, nache iviraxatta'a aso lallemaqhuo aso lamaqai. 25Qaq so Palal, som llalec so Uzay, somaye no'oxoosheguem so npaqtaxanaxat maye datateguet aso lamaqai, qataq aso nalloxolate maye qaỹoqotcheguemec maye netaña so qasoxoc maye lauanec so huataxanaqpi. Qaq so taỹa'ague so npaqtaxanaxat qalaq no'oxoosheguem so Pedaías, som llalec so Paros. 26Qaq so ilotague'pi aso atamnaxaqui maye naña ye Ofel, no'oxoosheguem so npaqtaxanaxat maye pa'aỹa'ague da nala' lliguisheguem, naloteuga so lasom maye qailonec da lleguec na 'etaxat. Nataqa'en ỹaỹamaxaañi aso nalloxolate. 27Qaq so lma' ye Tecoa, no'oxoosheguem so npaqtaxanaxat maye nalotta aso nalloxolate late'erai, nache ivitta'a so npaqtaxanaxat ye Ofel.
28Qaq ñi 'oonolec so ntaxaỹaxanaxanecpi maiche no'oxoosheguem so npaqtaxanaxat, maye naloteuga so lma', chegoqchiguiña so lasom maye qailonec da llegueuo na caipi. 29Qaq so Sadoc, som llalec so Imer, somaye no'oxoosheguem so npaqtaxanaxat maye naloteuga so lma'. Qaq so taỹa'ague so npaqtaxanaxat nache no'oxoosheguem so Semaías, som llalec so Secanías, cha'aye somaye nache nauaatalec so ñegueuo maye pa'aỹa'ague da nala' lliguisheguem. 30Qaq so Jananías, som llalec so Selemías, qataq so Janún, som 'oonolec soua seis llalqa so Salaf, soomaye no'oxooyishegue'm so taỹa'ague so npaqtaxanaxat. Qaq so Mesulán, som llalec so Berequías, no'oxoosheguem so naloteuga so maiche lma'. 31Qaq so Malquías maye lo'o na lcat plata, somaye no'oxoosheguem so taỹa'ague so npaqtaxanaxat, nache iviraxatta'a so lma' so ilotague' aso atamnaxaqui, qataq iviraxatta'a so naloteuga lma' so nmenaxaicpi, qataq iviraxatta'a so naloteuga so lasom da huo'o na qanmit, qataq so lanataqa' so nauanaxanaxanec maye naña aso lamaqai. 32Qaq so taỹa'ague se'eso npaqtaxanaxat maye chegoqchiguiña yemaye, nache no'oxoosheguem so lo'opi na lcat plata qataq so nmenaxaicpi iviraxatta'a so lasom maye qailonec da llegueuo ana qagueta.
