Da nqanaqtaguec da no'onataxanaxac
1Qaq so Sambalat co'ollaq la'axaỹaxac da qaltaq ño'oxonaqtapiguisheguem se'eso npaqtaxanaxat, nache ỹataqta saỹaỹamaxaren nache ỹe'eetac so judiiopi. 2Nache co'ollaq datataigui so laỹepi qataq so alleppi maye lma' ye Samaria, nache 'eeta':
«¿Negue't ca ỹauotaique da ỹo'ot ne'ena choxoraicpi judiopi? ¿Qalqo' ipi'itaxaatega da qaỹa'aqta'a da qaltaq no'oxoosheguem ne'ena huaqta'a't nỹecpi qataq da ỹe'eguelaxalec da ỹavigaxat aca lachetaqtaxanaqtepi qalqo' ipettega da 'oonolec na'a'q nache imat namaye? ¿Qalqo' ipi'itaxaatega da ishet da do'onataxana na coma' vigaxaic qataq na coma' laỹepi da huo'o ca dalaxaic ỹo'ot?»
3Qaq so Tobías, som Amón le'ec, maye nnaictague' somaye, 'enapeco':
«¡Se'eso npaqtaxanaxat maye qano'oxootapiguisheguem ỹataqta qaica ca la'añaxac, ỹoqo'oye da huo'otaq huenotsheguemec aca huaxaỹaxa nache hua'axauec!»
Da natamnaxac so Nehemías
4Qaq huaña nache aỹem ñatamen sheeta': «'Am Qanatamnaxala', ña 'aua'axaỹa da 'eetec de'era qane'enaguec, qaq 'auo'otec qome da maiche talec 'anqa'en yemayepi da le'enaxanaxac. Qataq 'aneguet qome ca npa'aguenaxauapi da yaqto' loxonecpi yemayepi nache ỹauega ca ỹaqa'a 'alhua. 5Qataq saishet qome da 'auchoxonnai' yemayepi, qataq saishet da 'auapalaxat ca lasouaxashetpi, cha'aye yemayepi isheueetac na no'oxootapiguisheguem na npaqtaxanaxat.»
6Qaq qomi' nache qolaqto'ot da ño'oxonaqtapiguisheguem so npaqtaxanaxat, qaq so qaro'oxonec mashe tachiguingui na laiñi ye ỹoqta lshequitcheguemec somaye. Cha'aye so shiỹaxauapi ỹataqta huo'o da lasapachaxa da do'onataxan. 7Qalaxaye so Sambalat, Tobías, qataq so lma' ye Arabia, Amón qataq ye Asdod, co'ollaq la'axaỹaxac da nquictasheguem so ño'oxonaqtapiguisheguem npaqtaxanaxat, qataq da mashe sapoqtapigui so lauacpi, nache ỹataqta dalemata. 8Qaq huaña nache 'enauac somayepi huaxaỹa't da yaqto' qomi' iloquiaxa'n, qataq da qomi' iqalhuaqche't. 9Huaña nache qomi' ñatamnaqot Ñim Qanatamnaxala', qataq sauoqo'o so qanalleppi da yaqto' qomi' nauaataleguete ye na'a'q qataq ye pe. 10Huaña nache so Judá le'ecpi huo'o da nachoxoc, 'eeta': «Ne'ena deỹoxosoxootacpi namayepi mashe qaica ca la'añaxac, cha'aye ỹataqta qalota na coma' laỹe, nache sa seshetaq qome da semataq ne'ena ño'oxonaqtapiguisheguem npaqtaxanaxat.»
11Qaq qomi' saỹatenaq da so qampa'aguenaxauapi lhuennataxa da huenoxotaua'a se'eso huaqta'a't nỹecpi nache qomi' ique'elaxa't da qomi' ỹalaua't, yaqto' vi'iiguet som so'otaqtac. 12Qalaxaye huo'o so judiiopi maye lauoreuapi somayepi, qaq nacheso so qomi' icoyegue'n naxa da huotaique da anac somayepi da qomi' iloquiaxa'n, 13ỹoqo'oye aỹem shenapega ñi 'oonolec da huaxaiguet ca maiche llalaqpi da naỹamaxat, ỹauo'o ca lainec, lchecna qataq lchecnec, nache nauanalec na pa'auo so saxanaxa da qano'oxoosheguem se'eso npaqtaxanaxat. 14Qaq co'ollaq sela'a da ỹataqta ñi'i somayepi, nache ñachaañi da shenapega so nataxala'pi, nta'alpi, qataq 'enauac som laỹepi shiỹaxauapi, sheeta': «¡Saishet qome da qayi'iitac! Nacherata da qauennachiỹa'a Ñim Nataxala' da ỹataqta 'añaxaic qataq ncolanaxat, ỹoqo'oye qauloquiilec qome na qarqaỹaipi, qaỹa'alquipi ỹalleppi, qataq 'alpi, qataq ana qaramoxouaipi, qataq naua qarma'achilli'.»
15Qalaxaye so qampa'aguenaxauapi co'ollaq la'axaỹaxac da mashe ñaỹamaxataqtai', qataq da Ñim Qanatamnaxala' mashe qomi' ỹachaxanalo na 'eetapeguecpi somayepi. Huaña nache 'enauac da shenaqta qataq she'eguelaxasoxouga da ño'oxonaxasheguem so npaqtaxanaxat, nache ñi 'oonolec ỹataqtac na lo'onatac. 16Qaq huaña se'eso na'a'q, nache seỹoracache so ñalleppi, huo'o so do'onataxaatac ñaqa'en, qaq so laỹepi qalaq ỹauota'a so lo'ogoxonaxat, taquiaxai, lpaqtaxanaqte, lchecnec qataq aso ltogue lapoqte. Qaq so nataxala'pi ỹataqta ỹa'añaqchettac 'enauac so shiỹaxauapi maye lma' ye Judá, 17qaq so no'oxootapiguisheguem so npaqtaxanaxat, qataq so deỹoxosoxootac saishet da 'enauaque naua lhuaxaye da do'onataxanalo cha'aye na 'oonolec lhuaq do'onataxaatega, qaq na lỹa lhuaq huetaigui nataqa'en so lo'ogoxonaxat. 18Qaq 'enauac so do'onataxaatacpi ỹataqta na'atchigui so lainecpi, qaq so nasheere lo'o qalaq nache huetaua'a ñaqa'en na ỹaỹe da yaqto' ỹashiiyigui aso lasheere da huo'o ca camachaqca, 19nache aỹem shenapega so nataxala'pi, qataq so ltauapi qataq 'enauac so shiỹaxauapi, sheeta': «Da no'onataxanaxac ỹataqta lta'araic qataq ñaq qaỹoqtec na saxanaxa da qano'oxoosheguem, nataqa'en qomi' ỹataqta ñelagaxataq da souaqta'aguelo naua laỹel na npaqtaxanaxat, nache ỹataqta qomi' qaỹoqtache. 20Qaq ỹoqo'oye da qomi' qailoquiaxa'n, nache da qaua'aqaiỹa ca l-lamaxa da qaỹashiiyigui aca nasheere. Qaq qom nache 'eetec de'era nache qami' qauanaqui da qomi' qauauaqaigueta, cha'aye Ñim Qanatamnaxala' qomi' itauan qataq qomi' deloctapegueleguete.»
21Qaq da choche nnoxoosheguem aso nala' nache qomi' so'onataxanaq ivitta'a da napalñi da yo'oq ana huaqaañi, qaq so qaraỹepi no'oxootapiguisheguem so npaqtaxanaxat, qaq so laỹepi nache nasoqta'a aso lataquiaxaipi. 22Qaq se'eso na'a'q nataqa'en sheetega so shiỹaxauapi qataq 'enauac so detaunaxaatacpi da nache huetaua'a na pa'auo ye Jerusalén, yaqto' da ivita ye pe nache dauanaxaatac, qaq da yo'oxoñi qalaq do'onataxan. 23Qaq ỹoqo'oye aỹem qataq so ihuo' le'ecpi qataq so detaunaxaatacpi, qataq 'enauac so alleppi maye aỹem nauaatalec, saishet da ñeqata'q soua qorogo, qataq ñi 'oonolec da shenaqta nache 'eetai' da nasoqta'a so lo'ogoxonaxat yaqto' lhuotta da nalat.
