So Nehemías iueelec so choxoraqpi
1Qaq so mashe qaỹata'ague de'era nache qalota so ỹalleppi qataq 'alpi da nachetega so maiche lauo' le'ecpi judiiopi. 2Cha'aye huo'o na 'eeta': «Da ñaloqtenaq na qoyalaqpi qataq ana qoyalepi, nache ỹataqta qomi' qalota, qaq ỹoqo'oye seuenaq da huo'o ca sachegoxotaqa'ague ca ala na trigo da yaqto' nache 'eetai' da ñeca'alaqtauec.» 3Qataq huo'o na 'eeta': «Qomi' ishet da ñeqataxañi na ala na trigo, cha'aye qaravigaxashet qataq sepatanaqauo na qana'alhua, qataq na qarma', qataq na qorañiguishe uva lma'pi.» 4Nataqa'en huo'o na 'eeta': «Qomi' da huo'omshe ishet da sesheetenaq añi nsheetenaqte ca nta'a, cha'aye huo'o aso qara'aale anom plata, qalaxaye sepatanaqauo na qana'alhua qataq na qorañiguishe uva lma'pi.» 5Nataqa'en namayepi 'enapec: Cha'aye ỹoqta 'eesa da maiche qomi' nhuo' le'ecpi, qaq ỹoqo'oye na qoyalaqpi nache 'eeta'am na qaỹa'alquipi. Qaq ta'ainco' da nache qomaqta da semenaq na qoyalaqpi ỹalleppi, qataq 'alpi da yaqto' qaỹauo'o nlatacpi. Qataq saseshetaq da ñe'eguelaxataxala't, cha'aye na qana'alhua qataq na qorañiguishe uva lma' mashe lalamaxat na ỹaqa'a.
6Nache co'ollaq sa'aqchiguilo naua la'aqtaqa da quetega na laỹepi nache ỹataqta salemata. 7Qaq co'ollaq ime da seuennataxaatapeguelec de'era, nache ỹataqta seviraxato'ot so nataxala'pi qataq so ltauapi souaxat da ỹataqta sa ỹala'ac añi isheetetac naqa'en so maiche lauo' le'ecpi. Huaña, nache seỹaxanegue 'enauac somayepi da sauo'o so naponaxac da qaitaxaỹapigui de'era qanayeuaigui. 8Huaña, nache shenapega somayepi, sheeta': «Qomi' ỹataqta huo'o da qarhuogoxo da yaqto' ishet da ñe'eguelaxataxala't na maiche qarhuo' le'ecpi, maye qaimenoigui co'ollaxa so ỹotta'a't shiỹaxauapi da ỹauo'o l-latacpi. Qaq nagui qaltaq maiche qami' da qaumiñiitac na qaralamaxache qarqaỹaipi, maye mashe ñe'eguelaxataxala't co'ollaxa.»
Nache 'enauac somayepi ỹataqta ỹe'emaqtom, cha'aye saỹaỹaten ca 'eetec ca lasataxac. 9Nache aỹem shenapega somayepi, sheeta': «De'era qauo'ocheetac, damaye ỹataqta saỹaỹamaxañi. Cha'aye da ishet da qarvichiỹa'a da le'enaxanaxac na qomi' ipa'agueeta'ape, nache qami' qauachaxañi da huo'o naq 'enec qanqa'eñi Ñim Qanatamnaxala'. 10Cha'aye aỹem qataq na ỹaqaỹañicpi qataq na itauapi huo'o aso la'aale qorom qataq so trigo, ne'ena maiche qarhuo' le'ecpi, qalaxaye nagui ishet da sapalaxataq aso lavigaxaiste. 11Qaq ỹoqo'oye qami' ñachoxoreetoiguilo nagui da qavi'iguelaxachiỹot ñi 'oonolec namayepi na na'alhuapi, lañiguishe uva lma'pi, qataq na olivo lma'pi, qataq na lma'pi namayepi, nataqa'en qauapalaxache aca lavigaxaiste maye qami' netaiguilo, na'aictaxa da huo'otaq anom, huo'otaq ala ca trigo, huo'otaq ca lataxa, huo'otaq ca aceite qataq saishet qome da qauamaqaitalec da isheeten aca qanquigachiisheguem lavigaxaiste.» 12Nache somayepi, 'enapec: «Aja', qomi' so'otaq qome 'enauac de'era qonapec, she'eguelaxataxam qome namayepi 'enauac na lalamaxatpi, qataq saishet da seỹaxanaqot da huo'o aca isheeten.
Qaq huaña, nache seỹaxana so ntaxaỹaxanaxanecpi, da yaqto' ỹauaachigui ñaqa'en de'era ỹan la'aqtac se'eso shiỹaxauapi, qataq yaqto' ipacchigui damaye.» 13Ime, nache aỹem sechego'q soua aỹogo, nache sheeta': Qaq 'era da 'eetec qome Ñim Lo'onatac 'Enauacna da ỹataqta ichegoq, qataq ỹasaxauec ca lma' qataq ca lalamaxatpi ca shiỹaxaua maye saishet da ipaguelec ca ỹan la'aqtac. Qataq Ñim Lo'onatac 'Enauacna nqateeguesop qome camaye ca lalamaxat 'alhua, lma'pi, qataq 'enauac ca logoxoshetpi.
Nache 'enauac so lapoota'a't shiỹaxauapi, 'eeta': «Aja', nachera qome da 'eetec». Ime, nache ỹataqta qaỹo'oxoreetac Ñim Nataxala', qataq qaipactelec da qaỹo'ot da qoỹenapec. 14Qaq nache chegoqchiguiña so vi'i veinte da nta'a so Artajerjes, co'ollaq aỹem ỹanagui da aỹem lta'a so netaña ye Judá, nache ivitta'a soua vi'iyi' treinta y dos da nta'a somaye, qaq nache ivittrauec soua doce vi'iye da aỹem, qataq so ỹalamaxat ỹalaqpi da saishet da so'ogoxonaxa aso ñesheetenaqte da aỹem nta'a. 15Qaq so nta'alpi maye hua'aulec co'ollaxa da ilotague' somayepi, ỹataqta qalota nataqa'en aso isheeten se'eso nalamaxat nhuo' le'ecpi, cha'aye ye 'oonolec na'a'q, nache ỹataqta iỹaxaataua'a na nallec, lataxa nache añi lasheue ivi' aso cuarenta lcatpiole plata. Nataqa'en so ltauapi somayepi ỹataqta ỹoqolavin so shiỹaxauapi. Aỹem, qalaxaye saishet da sheetec de'era, cha'aye souaxat da sauotec qataq huo'o naq 'enec ñaqa'en Ñim Lo'onatac 'Enauacna. 16Qalaxaye aỹem qataq so itauapi ỹataqta sepagaqchigui da ño'oxonaxasheguem so lpaqtaxat se'eso huaqta'a't nỹecpi, qataq saishet da sauo'o ca sesheenaxana ỹalamaxat 'alhua. 17Nataqa'en aỹem sequia'axaatac so ciento cincuenta ỹalleppi judiopi qataq so lataxala'pi, qataq saishet da qanaloqten so shiỹaxauapi maye ñamaxasoxoicpi, chegaqa'alo naua 'aleu' maye qarhuoreu'. 18Qaq 'enauaque soua na'axa'te da qanallec añi 'oonolec huaca qalaxaye maiche aỹem chegoqo'ot, qataq seis so ỹoqta no'on qagueta, qataq so maỹo, qataq da inoxoorec soua diez na'axa'te nache chochaq huañi so qandouo lataxa. Qalaxaye saishet da seỹaxaneua'a da so'onataxana aso ñesheetenaqte da aỹem nta'a, cha'aye mashe ỹapacauec aso isheetetac so shiỹaxauapi. 19Ime, nache ñatamnot Ñim Ñatamnaxala', sheeta': «¡'Am ñachoxonnot da ñaq aỹem 'auennata'a qome, souaxat 'enauac na so'otec ne'ena shiỹaxauapi!»
