Da lataxac na nachetaqtaxanaxatpi
1Ñim Nataxala' 'enapega so Moisés, 'eeta':
2«Qonapega na Israel le'ecpi, qoneta': Qom qaunoxoñiiua'a ye 'alhua maye qami' sanema qome da qoñiỹalec, 3nache qaỹa'añeeuo qome aca qarachetaqtaxanaxache huaca, huo'otaq qagueta da qaỹavigaxat da qoỹanot Ñim Nataxala', huo'otaq ca lỹa nachetaqtaxanaxat maye qaỹavigaxatta, qataq da qaipacchigui ca qoỹan na'aqtac, qataq ca maiche qoỹaneuo, qataq ca nachetaqtaxanaxat maye ama da laitaỹaxac, da yaqto' ỹamaateguet Ñim Nataxala', 4nache que'eca ỹaneuo ca lachetaqtaxanaxat, iuen da ỹaneuo ca dos kilos ca ỹataqta no'on 'ayiiña maye qairaqneguet ca un litro na aceite. 5Nache 'enauac que'eca nachetaqtaxanaxat qagueta llalec, huaqtalec qanqa'en ca un litro ca lataxa. 6Qaq da nachetaqtaxanaxat ca peenaq, nache huaqtalec qanqa'en ca cuatro kilos ca 'ayiiña maye qairaqneguet ca napactelec ca un litro na aceite, 7qataq ca napactelec ca un litro na lataxa, da yaqto' nachetaqtaxanaxat maye ama da laitaỹaxac, da yaqto' ỹamaateguet Ñim Nataxala'. 8Qaq da huo'otaq huaca llalec que'eca nachetaqtaxanaxat qaỹavigaxatta, huo'otaq da qanhuaachigui, da yaqto' qaipacchigui ca qoỹan na'aqtac, huo'otaq da qanmane' Ñim Nataxala' 9nache huaqtalec qanqa'en ca seis kilos ca 'ayiiña maye qairaqneguet ca dos litro na aceite, 10qataq dos litro na lataxa cam nachetaqtaxanaxat qaỹavigaxat, da yaqto' da ama laitaỹaxac ỹamaateguet Ñim Nataxala'. 11Qaq 'era da lataxac da ishet da qaỹo'ot, da qoỹaneuo ca huaca llalec, peenaq, qagueta llalec, qataq ca quetaq llalec. 12Qaq na'aictaxa ca lcata ca qoỹaneuopi shiguiỹacpi, qalaq nache qaỹe'enaxatchigui de'era lataxac ñi 'oonolec camayepi. 13Nache 'enauac qome na Israel le'ecpi ỹo'ot de'era qalapaxañi lataxac, da ivita da ỹaneuo ca lachetaqtaxanaxat qaỹavigaxat, da yaqto' da ama laitaỹaxac ỹamaateguet Ñim Nataxala'.
14Qaq da huo'o ca 'oonolec ca qami' netaiguilo chegaqauecpi da huotaique ỹaneuo ca lachetaqtaxanaxat maye qaỹavigaxat, yaqto' da ama laitaỹaxac ỹamaateguet Ñim Nataxala', nache camaye ỹe'enaxatchigui qome da qoñiitec da qaỹa'añiiuo ca qarachetaqtaxanaxache. 15Qaq de'era qalapaxañi lataxac, nacherata 'oonolec da qauo'ocheetac qome, qataq ca chegaqauecpi maye qami' ỹalectaiguilo. Qaq 'era da chochaq tatec lataxac maye qalapaxañi, da yaqto' qami' qataq ca qami' chegoxogueta, nache 'eetai' qome da ỹo'ottac. Cha'aye qami' qataq ca chegaqauecpi, nache qoñiita'a't da qoviito'ot Ñim Nataxala'. 16Nache 'oonolec de'era namaxasoxonaxac, qataq nqataxac maye qalapaxañi lataxac, da qauo'ocheetac qami' qataq ca chegaqauecpi.»
17Ñim Nataxala' 'enapega so Moisés, 'eeta':
18«'Aua'aqtaxanem na Israel le'ecpi, qoneta': Qom mashe qaunoxoñiiua'a yi'iye 'alhua maye qami' sauegalo qome, 19nache da ivita da qollequi da alaỹaxac ca trigo, nache qaỹa'añiỹot ca qarachetaqtaxanaxache Ñim Nataxala'. 20Qataq ca la'auaxanec ndaqñiguishec 'ayiiña, qaỹa'añiiuo qome aca 'oonole nauole da nachetaqtaxanaqte maye chegaqaigui ca nsoiguishec ala ca nañiguishec. 21Qaq nache 'eetai' qome da qauo'ocheetac aca'aca nachetaqtaxanaqte, nataqa'en ca qami' chegoxogueta.
22Qaq saiuena'a da huo'o ca sa qaipaguelec ne'ena namaxasoxonaxacpi maye samaxalec so Moisés da qami' da'aqataxanema, 23chegoqchiguiña so la'auaxanec na'a'q da qami' qaỹa'aqtaxanema da yaqto' qami' qataq ca qami' chegoxogueta de'era, 'eeta':
24Da huo'otaq huo'o ca nasouaxashet da saq noma na ỹalecta'a't nhuo' le'ecpi, nache 'enauac namayepi ỹaneuo ca 'oonolec huaca llalec da lachetaqtaxanaxat qaỹavigaxatta, yaqto' da ama laitaỹaxac ỹamaateguet Ñim Nataxala', qataq lỹateuo qanqa'en aca nauole, qataq ca lataxa. Nache qaipacchigui da lqataxac Ñim Nataxala', qataq qoỹaneuo nataqa'en ca quetaq da yaqto' qaỹapalaxat ca nasouaxashet. 25Qaq da ime, nache ca ntaxaỹaxanaxanec ỹo'ot de'era lataxac da yaqto' qaỹapalaxat ca lasouaxashet na Israel le'ecpi. Huaña nache qaỹapalaxat ca lasouaxashet namayepi, cha'aye saq noma que'eca nasouaxashet, nache namayepi Aỹem ỹanot qome ca lachetaqtaxanaxat qaỹavigaxatta, qataq ca sa imauaq da qaỹavigaxat. 26Nache qaỹapalaxat qome ca lasouaxashet 'enauac ne'ena ỹalecta'a't nhuo' Israel le'ecpi, qataq ca chegaqauecpi maye netaigui namayepi, cha'aye sa nanoma que'eca nasouaxashet.
27Qaq da huo'otaq 'oonolec shiỹaxaua, ca ilamaqalec ca lasouaxashet, nache camaye ỹaneuo aca quetaq llale maye ivi' ca 'oonolec vi'i, da lachetaqtaxanaqte, yaqto' qaỹapalaxat ca lasouaxashet. 28Nache ca ntaxaỹaxanaxanec ỹo'ot de'era lataxac, da qaỹapalaxat ca lasouaxashet maye ilamaqalec que'eca shiỹaxaua, nache Ñim Nataxala' ỹapalaxat qome ca lasouaxashet camaye. 29Qaq nache 'oonolec de'era qalapaxañi lataxac da ỹo'ot qome na Israel le'ecpi, qataq ca chegaqauecpi maye netaigui namayepi, da ivita da huo'o ca ilamaqalec ca lasouaxashet. 30Qalaxaye da huo'o ca shiỹaxaua da nache 'ena'anac da ỹo'ot ca lasouaxashet, na'aictaxa da Israel le'ec, huo'otaq chegaqauec, nache camaye Aỹem inogoqchet. Nache que'eca shiỹaxaua qanqateeguesop na lauo' le'ecpi, 31souaxat da qaica ca naigui naqa'en da ỹa'aqtac, qataq ỹo'otan na ỹamaxasoxonaxacpi, nache camaye ỹataqta qaỹo'orauec, qataq maiche nque'etaxangui que'eca lasouaxashet.»
Da nhuaxanaguec ca saishet da ỹo'ot ye na'a'q mataxaqui
32So Israel le'ecpi co'ollaq netaña ye toolec 'alhua, nache ilalec so ỹale, ldeetac so na'a'q mataxaqui. 33Nache so ilalec se'eso ldeetac, somayepi ỹauegueua'a co'ollaxa so Moisés, Aarón qataq so lapoota'a't nhuo' le'ecpi, 34nache somaye choche qaỹapoua'a, cha'aye ñaq saxanaxa da qaỹaỹaten ca qoỹeetec somaye. 35Nache Ñim Nataxala' 'enapega so Moisés, 'eeta': «Ñi'iñi ỹale iuen da qaỹalauat, qaq 'enauac qome na Israel le'ecpi irolec ca coma'pi da ỹasaq, huaña ye pa'auec ye qanayeuta'a.» 36Nache so Israel le'ecpi ỹauegueuga somaye so pa'auec so qanayeuta'a, nache qairolec so coma'pi da qaỹasaq ivitta'a da ileu, qaq nache ipacchigui da lamaxasoxonaxac Ñim Nataxala' maye ỹamaxalec so Moisés.
Aso lauoxo maye llo'oxoraqte na nogoxot
37Ñim Nataxala' 'enapega so Moisés, 'eeta': 38«Qonapega na Israel le'ecpi qataq 'enauac nam chegoxoguetpi da ỹo'ot qome ana lauoxo maye llo'oxoraqte naua laỹel na logoxot, nache da nteteuo anamayepi, nache ỹauota'a na ntetaxanaxat imalaqalec da lo'oxoỹaxac. 39Yaqto' namayepi da ilota'a anamayepi, nache iuennata'a 'enauac na ỹamaxasoxonaxacpi maye samaxalec da ỹo'ot. Nache saishet da ỹo'ot ca maiche lquiyaqteỹaxac, huo'otaq da quetague' da maiche lmeenaxanaxac, maye ỹo'ot da nquisheshigui da la'amqaanataxanaxac. 40Yaqto' ntoueeta'ac qataq ỹo'ot 'enauac na iqataxacpi, qataq ỹataqta Aỹem ỹalaxaguet, yaqto' namayepi qui'itta da lataxac, cha'aye Aỹem Lataxala'. 41Aỹem Nachaỹem Nataxala' maye Qanatamnaxala'ai, maye qami' ñeqateeguesopa co'ollaxa ye Egipto da yaqto' Aỹem Qanatamnaxala'ai. Nachaỹem Nataxala' maye Qanatamnaxala'ai.»
