So Coré dataỹa'aguet Ñim Nataxala'
1So Coré, maye llalec so Isar, som laual so Quehat, maye chegoxoguet so Leví, qataq so Datán, Abirán maye llalqa so Eliab, qataq so On som llalec so Pelet, maye chegoxogueta so Rubén, 2soomaye dataira'aguet co'ollaxa so Moisés, nache huaxaiguet so doscientos cincuenta Israel le'ecpi. Qaq se'eso ỹalleppi ỹataqta huo'o naq 'enec, qataq nataxala'pi. 3Nache 'enauac somayepi huaxaỹa't da dataỹa'aguet so Moisés qataq so Aarón, nache 'enapegalo soomaye, 'eeta':
¡Nache a'aye ctaxa da qauapaquiitapeguec qami'! Cha'aye 'enauac ne'ena shiỹaxauapi, mashe qaiỹotauga da lalamaxat Ñim Nataxala'. Qataq Ñimaye hueta'aguet namayepi. ¿Qaq ta'ainco' da ỹataqta qanpa'axañiilec da qaralamaxache qanqa'eñi na lalamaxatpi Ñim Nataxala'?
4Qaq so Moisés co'ollaq hua'axaỹa de'era, nache ỹa'alyiñi naua l-llecte, nache iviraxata'aguet naqa'en na latap na 'alhua, 5nache 'enapega so Coré qataq so laỹepi, 'eeta':
Qonte' nte'eta, nache Ñim Nataxala' ỹa'axat qome chaq negue't que'eca lalamaxat, qataq ca iỹotauga Ñimaye, qaq que'eca lca'ateua'a, nacheca qome ca ishet da taua'a ye lanataqa' Ñimaye. 6Qaq 'am Coré, qataq na 'araỹepi, 'era da qauo'oche qonte', qandoiuo aca laỹe'pi ca nchenaxanaxat, 7nache qauachiỹangui aca poqo, qataq ca nchenaxanaxat, nache qauachiỹaña ye lanataqa' Ñim Nataxala'. Qaq que'eca shiỹaxaua maye lca'ateua'a Ñimaye, nacheca ca iỹotauga. ¡Nache a'aye da qanapagaqaanaxaqui qami' leviitapi!
8Nache so Moisés 'enapega so Coré, 'eeta':
¡Qami' leviitapi, ñaq aỹem qana'axaỹaxañiỹa nagui! 9¿Peta'a saq 'amaqtaq qanqa'eñi da qami' ỹo'oteque Ñim Nataxala', da qami' ỹachegoxottoiguilo na laỹepi Israel le'ecpi da ỹataqta qami' iỹotaugalo, da yaqto' saqaỹapeque Ñimaye, qataq da qauo'ocheetac na no'onatacpi da huaña ñi npe'l, qataq da qauloitapeeguet ne'ena nhuo' le'ecpi? 10Qataq Ñim Nataxala', ỹo'ot da sa qaỹapeque naqa'en 'am, qataq na 'arqaỹañecpi leviitapi, ¿Qaq nagui qalaq nataqa'en qansheetaique da qami' ntaxaỹaxanaxanaqa? 11Cha'aye 'am qataq na 'araỹepi qalaỹoñiita'a't da qauataiỹa'aguet Ñim Nataxala', qaq ¿Negue'to' so Aarón da qoquiitapeguelec?
12Ime co'ollaxa, nache so Moisés damaxasoxona so Datán qataq so Abirán, som llalqa so Eliab, qalaxaye soomaye 'ena'apo':
Qomi' saishet da qolaq. 13Peta'a ¿'Aupi'itaxaatega da saq 'amaqtaq da 'auo'ot, da qomi' 'anqateeguesopa ye 'alhua maye chochaq huañi na huaca lche', qataq na te'esaq lli'i, nache qomi' 'anauegalo na toolec 'alhua, da yaqto' seleuaqaña 'anqa'en, qataq da qomi' 'ampa'axaaleguete da qomi' 'aralamaxatpi? 14Qataq saishet da 'auañoxot da qomi' 'auauegalo ca 'alhua maye sa qoue na huaca lche', qataq na te'esaq lli'i, qataq da qomi' 'anema ca qana'alhua maye hualec ana nañiguishe uva. ¿Peta'a 'aupi'itaxaatega da qanamaicpi ne'ena shiỹaxauapi da yaqto' maiche 'oiqueetac? Qaq ỹoqo'oye saishet da qolaq.
15Nache so Moisés ỹataqta dalemata, nache 'enapega Ñim Nataxala', 'eeta':
¡Saishet qome da 'auaconeguet da 'Am ndoua'a aca lachetaqtaxanaqte namayepi! Cha'aye aỹem, saishet da sacona ca 'oonolec 'ashena maye lalamaxat namayepi, huo'otaq da so'otec ca qauem.
16Qaq ime, nache so Moisés 'enapega so Coré, 'eeta':
'Am qataq na 'araỹepi, qanqo'oñiiua'a qonte' ye lanataqa' Ñim Nataxala'. Qaq so Aarón, nataqa'en hueta'a qome yemaye. 17Nache ñi 'oonolec ỹacheuo qome aca laỹe' ca lchenaxanaxat, nache ỹachetangui ca lchenaxanaxat da taua'a ye lanataqa' Ñim Nataxala'. Nataqa'en 'am qataq so Aarón, qauacheeuo qome aca laỹe' ca qarchenaxanaxache, qaq da ỹalega't aca'aca laỹe' ca nchenaxanaxat, nache ivi' doscientos cincuenta. 18Nache ñi 'oonolec ỹacona aca laỹe' ca lchenaxanaxat, nache ỹachangui aca poqo qataq ca nchenaxanaxat, nache namayepi nachaateua'a ye ñegueuo ñi npe'l maye naỹonqa', qaq nataqa'en so Moisés qataq so Aarón.
19Qaq so Coré co'ollaq mashe laỹona't 'enauac se'eso shiỹaxauapi da yaqto' dataỹa'aguet so Moisés, qataq so Aarón, huaña so ñegueuo so npe'l. Nache Ñim Nataxala', yo'oq da llo'oxoyec ỹauaachigui 'enauac se'eso laỹoota'a't shiỹaxauapi. 20Nache Ñim Nataxala' 'enapega so Moisés qataq so Aarón, 'eeta':
21¡Qoquiỹa'ai qome ne'ena shiỹaxauapi, yaqto' Aỹem ñematchiguiñi da selaxachigui namayepi! 22Qalaxaye soomaye ỹa'alyiñi naua l-llectel, nache iviraxata'agueta naua lata'pi na 'alhua, nache 'ena'apo':
'Am Nataxala' maye 'Am Natamnaxala' 'enauac na shiỹaxauapi, ¿Peta'a 'aualemataỹa 'enauac ne'ena shiỹaxauapi maye laỹoota'a't, ye 'oonolec som huo'o da lasouaxashet?
23Nache Ñim Nataxala' 'enapega so Moisés, 'eeta':
24Qonapega 'enauac na Israel le'ecpi da ca'aisalo naua lpele'ete da Coré, Datán qataq da Abirán.
25Nache so Moisés qataq so nqueroxonecpi maye lataxala'pi so Israel le'ecpi, nqo'ona co'ollaxa so hueta'a so Datán qataq so Abirán. 26Nache so Moisés 'enapega 'enauac se'eso laỹoota'a't shiỹaxauapi, 'eeta':
Qoquiỹa'aisalo naua lpele'ete ne'enaua na'amqaanaxaiqa shiỹaxau', qataq saishet da huo'o ca qauacoñiỹa na lalamaxat logoxoshetpi, yaqto' saishet da qaullivi souaxat na lasouaxashetpi naamaye.
27Nache se'eso shiỹaxauapi ca'ai so netañalo soua lpele'ete so Coré, Datán qataq so Abirán. Qaq so Datán qataq so Abirán nachattrañi, huetra'a soua lleguereuo soua lpele'ete, nataqa'en soua lamoxou' qataq soua llalqa soomaye. 28Nache so Moisés qaltaq 'enapec:
Nagui nache qauaỹachiñiita da Ñim Nataxala' nacheñi Ñim aỹem ỹamaxalec da so'ot 'enauac de'era, qaq saishet da so'ot ca maiche sheetapeguec. 29Qaq ne'enaua shiỹaxau' da ileu', nache da l-leuaxa da 'eeta'am da l-leuaxa ca camachaqca shiỹaxaua, qache saishet da aỹem lamaxashec Ñim Nataxala', 30qalaxaye Ñim Nataxala' da ỹo'ot ca sa qaỹauanapega da ỹauachigui naqa'en na 'alhua, nache ña nca'altraue'c naqa'en da tayingui aca huachiqui, lỹachiyiñi' nataqa'en na logoxoshetpi, qaq huaña, nache qauaỹachiñiita da de'eraua shiỹaxau' maiche inogoqche't Ñim Nataxala'.
31Qaq co'ollaq ime da ltaxaỹaxac so Moisés, nache nauachigui na 'alhua so hueta'a somayepi, 32nache l-llañe' 'enauac so llalaqpi se'eso shiỹaxauapi, maye huaxaiguet co'ollaxa so Coré, qataq so logoxoshetpi somayepi. 33Nache nca'altauec co'ollaxa da taigui na 'alhua somayepi, nache lỹachiguiñi' so logoxoshetpi. Ime, nache na 'alhua ỹe'eguelaxa't, nache ỹapolec somayepi. Qaq 'era da 'eetec da qanqateeguesop somayepi na Israel le'ecpi. 34Qaq co'ollaq qaỹa'axaỹa de'era la'alaxac somayepi, nache so Israel le'ecpi maye hueta'a so saqaỹapeque somayepi datauec, nache 'eeta': «¡Qolaq sataxauec! ¡Ten qom nataqa'en qomi' ihuoxoorañi ana 'alhua!» 35Qalaxaye so lanataqa' Ñim Nataxala' nataqa'en chegoqteua'a so norec, nache ỹavigaxat, nache nmichiguiñi naqa'en 'enauac se'eso doscientos cincuenta shiỹaxauapi, maye ỹavigaxattac co'ollaxa so lchenaxanaxat.
36Nache Ñim Nataxala' 'enapega so Moisés, 'eeta':
37Qonapega da Eleazar, dam llalec so ntaxaỹaxanaxanec Aarón, da ỹacona aca laỹe'pi na nchenaxanaxat maye mashe ỹavic, nache qaỹatauga naqa'en da icorec ana poqo maye huetangui, cha'aye anamayepi mashe qui'itta. 38Nache ana'ana laỹe' so lchenaxanaxat se'eso shiỹaxauapi maye ileu souaxat da lasouaxashet, nache qairapaqchen qome, da yaqto' qalapaxalec añi nca'atoxonaxalate. Cha'aye anamaye mashe qaiỹotauga da qoỹanot Ñim Nataxala'. Qataq yaqto' nachera qome da ỹo'ot da lvitaxa na Israel le'ecpi.
39Nache so ntaxaỹaxanaxanec Eleazar, ỹacona asa'aso laỹe'pi so nchenaxanaxat maye chegaqaigui na lcat bronce, maye irouo co'ollaxa se'eso ileupi shiỹaxauapi, nache qairapaqchen da qalapaxalec aso nca'atoxonaxalate, 40yaqto' so Israel le'ecpi saishet da icoua'ai de'era, da ca chegaqauec shiỹaxaua da saishet da chegoxoguet so ntaxaỹaxanaxanec Aarón, nache saishet da ỹo'ot ca nchenaxanaxat da ỹanot Ñim Nataxala', cha'aye ishet da 'eeta'am da huaigui so Coré qataq so laỹepi. Cha'aye nache la'aqtac Ñim Nataxala' co'ollaq hueqattega so Moisés.
41Qaq so lỹa na'a'q nache 'enauac se'eso Israel le'ecpi, qaltaq quetapeguelec so Moisés qataq so Aarón, nache 'eeta':
Qami', qauo'ochec da l-leuaxa se'eso nhuo' le'ecpi maye lalamaxat Ñim Nataxala'.
42Qaq co'ollaq lapona't so shiỹaxauapi da qaỹataỹa'aguet so Moisés qataq so Aarón, nache co'ollaq namatasheguem somayepi, nache ila'a so lo'oc, imattalec so npe'l, nache yo'oq da llo'oxoyec Ñim Nataxala'. 43Nache so Moisés qataq so Aarón, taỹalo co'ollaxa so ñegueuo so npe'l maye naỹonqa', 44nache Ñim Nataxala' 'enapega so Moisés 'eeta':
45¡Qoquiỹa'ai qome ne'ena shiỹaxauapi, cha'aye selaxachigui nagui!
Nache soomaye ỹa'alyiñi naua l-llecte, nache iviraxatra'aguet naqa'en naua lata'api na 'alhua. 46Nache so Moisés 'enapega so Aarón, 'eeta':
'Auacona aca nchenaxanaxat laỹe', nache 'auachangui aca poqo maye chegaqalec añi nca'atoxonaxalate, qataq 'auachangui ca nchenaxanaxat, nache 'anqalgoqta'a qome ye hueta'a da lapoota'a't shiỹaxauapi, nache 'auo'ot ca 'archenaxanaxat da yaqto' qaỹapalaxat na lasouaxashet, ten mashe ỹapacauec da layeloxo Ñim Nataxala', nache talec naqa'en da nhuaxanaguec damayepi.
47Nache so Aarón ỹacona aso nchenaxanaxat laỹe', ỹalaxaguet da la'aqtac so Moisés, nache nqalgoqta'a so netaña se'eso shiỹaxauapi. Qaq mashe nvi' co'ollaxa da nhuaxanaguec so nhuo' le'ecpi, nache so Aarón ỹo'ot co'ollaxa so lchenaxanaxat da yaqto' qaỹapalaxat na lasouaxashet se'eso nhuo' le'ecpi. 48Nache somaye hua'a co'ollaxa so huetaña so leuaxaicpi qataq so ñaq nca'altauecpi. Nache vi'iiguet naqa'en se'eso nleuaxa. 49Qaq da ima'a't se'eso ileupi, nache ivi' catorce mil setecientos, qaq saishet da qanaloqteneuo so leuaxaicpi maye huaigui so ncotaxac so Coré. 50Qaq co'ollaq vi'iiguet so nleuaxa, nache so Aarón ỹe'eguelaxa so ñegueuo so npe'l maye naỹonqa' som hueta'a so Moisés.
