Da lataxac da huo'o ca qui'itta qanqa'en
1Ñim Nataxala' 'enapega so Moisés qataq so Aarón, 'eeta':
2«Aỹem Nataxala', 'era da san ỹamaxasoxonaxac, 'eeta': Qonapega qome na Israel le'ecpi da nauegueuo aca huaca tocalec da lo'oxoỹaxac, qataq qaica ca lque'emaxa, qataq saxanaxa da qaỹauegaxaalec. 3Nache qami' qaỹa'añim qome so ntaxaỹaxanaxanec Eleazar, nache somaye ỹauegueega qome ca pa'auec ca qanayeetaña nanataqa', nache damaxasoxoolec da qaipelecot na lqosot acamaye qaq ỹauaachigui somaye. 4Nache so ntaxaỹaxanaxanec Eleazar ỹa'ayingui qome ana llaxaata ca ltago'q acamaye, nache siete da ichegoxogue da pa'aỹa'ague ñi npe'l maye naỹonqa'. 5Qaq da ime, nache damaxasoxoolec da qaỹavigaxat aca huaca, qaq ỹauaachigui somaye, nataqa'en qaỹavigaxat ca lo'oc, ltago'q, qataq ca lauel le'ec. 6Qaq so ntaxaỹaxanaxanec ỹacona qome aca lcoue ana cedro, qataq ca nchegoxosoxonaxat, qataq ca hualoq laỹe togaxaraic, nache 'enauaque caamaye da ỹasaxayingui ca norec maye huetangui aca huaca maye ỹavictac. 7Qaq ime, nache so ntaxaỹaxanaxanec iỹoi' caua alogo qataq nachel, qaq da ime, nache ishet da ỹe'eguelaxaua'a ca qanayeetaña, qalaxaye ñaq saxanaxa da qui'itta ivitta'a da pe. 8Qaq nataqa'en que'eca ỹavigaxat aca huaca, iỹoi' qome caua alogo qataq nachel, qalaxaye camaye saxanaxa da qui'itta ivitta'a da pe. 9Qaq ca lỹa shiỹaxaua maye qui'itta da lataxac, laỹona't qome ca no'onañi alo aca'aca huaca maye qaỹavigaxat, nache ỹachaña ca qui'ittelec ca pa'auec que'eca nanataqa'. Qaq na Israel le'ecpi ỹaỹamaxat qome que'eca alo, yaqto' do'onataxana da qui'itta naqa'en ca 'etaxat, maye nachelaxat da huo'o ca qaiỹouec na lasouaxashetpi. 10Nache que'eca shiỹaxaua maye laỹona't ca alo aca huaca, camaye iỹoi' nataqa'en caua alogo, qalaxaye saxanaxa da qui'itta ivitta'a da pe. Qaq 'era lataxac maye nache 'eetai' qome da ỹo'ottac na Israel le'ecpi, qataq ca chegaqauecpi maye ỹalectaigui namayepi.
11Qaq ca ipoteua'a ca camachaqca shiỹaxaua leuaxaic, camaye saishet da qui'itta da lataxac ivittrec caua siete na'axa'te. 12Nache camaye nqui'itaxaala't ca na'a'q tres, nachelgui que'eca 'etaxat, qaq ca na'a'q siete nache qui'itta. Qaq da huo'otaq saishet da nỹo que'eca na'a'q tres, nache camaye saishet da qui'itta da lataxac ca na'a'q siete. 13Qaq da huo'o ca ipoteua'a ca shiỹaxaua leuaxaic, nache da saishet da nỹola't camaye, nache ishet da na'aqchet ñi npe'l maye lanataqa' Ñim Nataxala'. Qaq que'eca shiỹaxaua iuen da ca'ai qanqa'en na Israel, cha'aye saxanaxa da qaiquetegaxaalec que'eca 'etaxat maye ishet da iqui'itaxatta, nache camaye nache 'eetai' da saishet da qui'itta da lataxac.
14Qaq da qalapaxañi lataxac da huo'o ca ileuaigui ca maiche lpe'l, 'eeta': 'Enauac na netaiguipi que'eca npe'l qataq ca pa'aigui camaye, nache saishet da qui'itta da lataxac ivittrec caua siete na'axa'te. 15Qataq 'enauac qome aca naco'oñapi maye nauattangui huo'otaq sa ỹaỹamaxañi ca lapoxot saishet qome da qui'itta.
16Qaq da huo'otaq huo'o ca huetauga ca no'onaxa, nache da ipoteua'a ca shiỹaxaua nalaatac, huo'otaq ca maiche ivita ye laloqo' da ileu, huo'otaq caua npi'ineqa, huo'otaq huachiqui, nache camaye saishet da qui'itta da lataxac ivittrec caua siete na'axa'te.
17Qaq da qaiqui'itaxat da lataxac que'eca shiỹaxaua maye saishet da qui'itta da lataxac, nache qaỹacona ca laỹe ca alo aca'aca huaca maye qaỹavigaxat da yaqto' qaỹapalaxat na nasouaxashet, nache que'eca alo qaỹasaxangui aca naco'oña, nache qaicoyingui ca 'etaxat maye chegaqangui ca la'auaxac. 18Ime, nache cam shiỹaxaua maye qui'itta da lataxac, ỹacona aca nchegoxosoxonaqte, nache ishiiñigui que'eca 'etaxat da ỹapapiaxat, nache ichegoxolec que'eca npe'l, qataq aca naco'oñapi, qataq na laỹepi nogoxoshetpi, qataq ca shiỹaxauapi maye netaigui camaye, nataqa'en ca ipoteua'alo caua npi'ineqa, nalaatac, huo'otaq ca leuaxaic maye maiche ivita ca laloqo' da ileu, huo'otaq aca huachiqui. 19Qataq que'eca shiỹaxaua maye qui'itta da lataxac, camaye ichegoxolec nataqa'en ca shiỹaxaua maye saishet da qui'itta da lataxac, ca na'a'q tres qataq ca na'a'q siete. Qaq ca na'a'q siete nache mashe qui'itta naqa'en que'eca shiỹaxaua, qalaxaye que'eca shiỹaxaua maye saishet da qui'itta da lataxac iuen da iỹoi' caua alogo qataq nachel, qalaxaye saxanaxa da qui'itta ivitta'a da pe. 20Qaq ca shiỹaxaua maye saxanaxa da qui'itta, da saishet da nqui'itaxat, nache camaye iuen da ca'ai qanqa'en ne'ena nhuo' le'ecpi, cha'aye na'aqchet ñi npe'l maye lanataqa' Ñim Nataxala'. Souaxat da saxanaxa da qaichegoxolec na 'etaxat maye ishet da qui'itta naqa'en da lataxac, nache camaye nache 'eetai' da saishet da qui'itta da lataxac. 21Qaq 'era da qalapaxañi lataxac maye nache 'eetai' qome da qaỹo'ottac. Qaq que'eca shiỹaxaua maye qui'itta da lataxac maye dechegoxosoxona ca 'etaxat maye ishet da iỹouec ca nasouaxashet, camaye iuen qome da iỹoi' caua alogo. Qaq ca lỹa shiỹaxaua da ỹashelgui ca 'etaxat qui'itta maye iqui'itaxat da nataxac, camaye saishet da qui'itta'a ivitta'a da pe. 22Nache 'enauac na ipoteua'a que'eca shiỹaxaua maye saishet da qui'itta, nache nataqa'en saishet da qui'itta, qataq ca ipoteua'a camaye, nataqa'en saishet da qui'itta da lataxac ivitta'a da pe.»
