1Da ntoonaxac ca nta'a da huetaiguilo naua lhua'q Ñim Nataxala',
qalaq 'eeta'am na 'etaxat so tala da jec,
nache taigue cam ỹamaxague Ñim Nataxala'.
2Ca shiỹaxaua 'eeta'am da ỹaỹamaqchiguiñi naqa'en 'enauac nam ỹo'otpi,
qalaxaye Ñim Nataxala', nacheñi ñi nmit na 'eetapeguecpi camaye.
3Da qaỹo'ot ca no'on qataq ca nalochiguiñi lataxac,
qalaq ỹaỹamaxareeta Ñim Lo'onatac 'Enauacna,
qaq saq 'ena'am da qoỹaatapegueuo ana nachetaqtaxanaqtepi.
4Naua na'ai'te ño'oxonnaxaiqa qataq da toonaxac maye na'amqaanaxaic,
qataq da lhuennataxac na qauemaicpi
damaye ỹo'ot na nasouaxashet.
5Da ỹataqta qaiuennataxaalec na qalapaxañipi
nache huo'o ca naigui,
qaq da nỹalaqtoc ca qaỹo'ot qalaq taỹa'a da nlaguiñi.
6Da nsallaxa maye qaỹachegoxotaigui da natenataxanaxac,
damaye saqaỹauec
qataq imeuo naqa'en ca nmitta'a da nleuaxa.
7Na qauemaicpi qalaq nlaxaañi da maiche nloquiaxac,
souaxat da saishet da ỹo'ot da nalochiguiñi lataxac.
8Da lataxac ca qauemaic namaqtapigui qataq saq ỹataxalec,
qaq na ỹo'otpi ca shiỹaxaua ỹo'oxoraic qalaq ỹaỹamaqchiguiñi.
9Na'aictoxo' da qanayeeta'a aca lallemaqhuo na pa'asheguem ca nỹec,
qalaxaye saq 'ena'am da qanayeetaigui ca lta'araic
nỹec da nhuoreua aca 'alo maye petaxai.
10Ca qauemaic qalaq nacherata da iuennatega da ỹo'ot ca qauem,
saishet da ichoxoreetac ca lỹa maye 'eeta'am.
11Da qaỹo'ot da nhuaxanaguec ca sa lhuanguit,
nache ỹo'ot da huo'o na ỹaỹaten ca qaica ca ỹaỹaanapec,
qaq da qaỹapaxaguen ca ỹaanaxanaxaic
nache huo'o da lauattonaxanaxac.
12Ñim nalochiguiñi da lataxac Nacheñi ñi imeteetac da lma'ỹaxac ca qauemaic,
ỹoqo'oye ỹauaachigui da nlaguiñi ca lma' camaye.
13Ca saishet da hua'axaỹa da nachoxonnaxac ca choxoraq,
qaq camaye nataqa'en saishet da qaỹa'axaỹa
da ivita da iỹaxanaique ca ntaunaguec.
14Ca nachetaqtaxanaxat maye qoỹoxotchiguiñi da qoỹan,
nmooñi naqa'en ca lta'araic nalemataic.
15Da qaỹo'ot da nalochiguiñi lataxac,
nache machiguiñi naqa'en ca no'on da lataxac,
qaq na qauemaicpi qalaq taỹa'a da nlaguiñi qanqa'en.
16Qaq ca shiỹaxaua da ca'ai da llecỹaxac da naỹaanataxanaxac,
camaye taỹa'a da ỹalectaigui na leuaxaicpi.
17Qaq ca ỹagaqnauec da lqopitaxanaqtaic na na'ashaxacpi,
qataq na lataxa huo'otaq na coraxat ama na laita,
camaye taỹa'a da lachoxoyec.
18Ca ỹale qauemaic pa'aiguet da nque'eenaxac ca no'on da lataxac,
qataq ca que'elaqtaxanaxaic qalaq pa'aiguet
da nque'eenaxac ca ỹaỹamaqchiguiñi da lataxac.
19Qataq na'aictoxo' da qanayeetalec ca toolec 'alhua
qalaxaye saq 'ena'am da qanayeeta'aguet aca 'alo yeloxoi qataq petaxai.
20Ca lma' ca ỹaanaxanaxaic qalaq huo'o da nsallaxa,
qataq huo'o na coraxat ama na laita
qaq ca qaica ca ỹaỹaanapec qalaq nda'a't
da imetaxateuo 'enauac na hueto'ot.
21Ca quetegue da no'on nataxac
qataq da nchoxonnataxanaxa,
qalaq camaye ỹanata da lca'alaxa,
naỹamaxa qataq ño'oxoyec.
22Ca ỹaanaxanaxaic ishet da loxonec
ca huaqta'a't nỹecpi maye lalamaxat na 'añaxaicpi,
qataq ishet da nlaxaañi da la'añaxac ca qanteetacot.
23Ca ỹaỹaten da ilotague' ca 'enapec,
qalaq saishet da ivireguet ca nque'eenaxac.
24Ca ño'oxonnaxaic, na'amqaanaxaic,
qataq ca sairen ca lỹa, camaye qailonec da sancherapec,
souaxat da ỹagaqnauec da napagaqaanaxac.
25Qaq ca hualaic qalaq ỹalauat da lyaxa,
souaxat da saishet da do'onataxanaxa'n naua lhua'q,
26cha'aye 'enauaque naua na'axa'te da choche iyaqtapigui'.
Qaq ca no'on da lataxac qalaq saishet da
ỹachetaigui da lashemataic da huo'o ca ỹan.
27Ñim Nataxala' ỹaỹemec aca lachetaqtaxanaqte na qauemaicpi,
lamaaxa da qauem da qoỹaataigui da qoỹaneuo.
28Ca saq 'en ca ỹa'axat taỹa'a da qailaxachigui,
qaq ca ỹaỹaten da na'axaỹaxanaxac
qalaq lhuotta'a ca la'aqtac.
29Ca qauemaic qalaq 'eetega qaica cara da lataxac,
qaq ca no'on da lataxac qalaq ỹaỹamaxatchiguiñi da llecỹaxac.
30Ỹataqta qaica ca naigui ca naỹaanec, naỹaanataxanaxac,
qataq ca no'o'n nqataxac da qaỹataỹa'aguet Ñim Nataxala'.
31Ca caaỹo qalaq qaiqataxanai'
da yaqto' lhuotta da huo'o ca loquiaxac,
qalaxaye Ñim Nataxala' nacheñi ñi ỹo'ot ca nauegaxanaxac.
