Nam ỹo'otpi co'ollaxa Ñim Lo'onatac 'Enauacna
1Qaỹa'añiỹot da qana'achecỹaxaqui Ñim Nataxala',
qauỹaxañiỹa da le'enaxat qataq qaua'aqtaxañim
na ỹotta'a't shiỹaxauapi na ỹo'otpi Ñimaye.
2Qauo'onaxañiito'ot da qauo'oñi na no'onecpi,
qataq qaua'axache 'enauac na ỹo'otpi maye ỹo'ot da na'aalaxa.
3Qavio'oxoyiñi da qui'itta le'enaxat Ñimaye,
qataq machiguiñi qome da lquiyaqteỹaxac
na nmittaique Ñim Nataxala'.
4Qataq qanmichiỹaique qome Ñim Nataxala' qataq da la'añaxac,
qataq nache 'eetai' qome da qanmichiitaique da lashiguiỹaxac.
5Qataq qauennachiỹa'a na ỹo'ot da na'aalaxa maye ỹo'ot co'ollaxa,
qataq na lapaxañi lataxacpi maye ỹan co'ollaxa Ñimaye.
6Qami' maye qauachegoqoiguet so Abraham
som lamaxashec Ñimaye,
qataq qami' llalaqpi so Jacob maye qami' lca'aguishecpi Ñimaye.
7Ñimaye nacheñi Ñim Nataxala' maye Qanatamnaxala',
qaq Ñimaye ilo'ogue 'enauac ana 'alhua.
8Ñimaye saishet da icoua'ai da naỹamaxataxac,
dam ỹan la'aqtac maye ỹamaxalec
nam shiỹaxauapi qataq cam chegoxoguetpi.
9Dam naỹamaxataxac co'ollaq naỹamaxate' so Abraham,
qataq da ỹan la'aqtac maye ỹanem so Isaac.
10Nache lapaxañi damaye da 'eco' lamaxasoxonaxac da ỹanem so Jacob,
qataq da 'eco' chochaq tatec naỹamaxataxac da ỹanem so Israel,
11co'ollaq 'eeta': «Aỹem, 'am sanem qome ye 'alhua ye Canaán,
yem 'alhua maye taỹa'a da 'aralamaxat.»
12Co'ollaq saq 'amaqtache ye lcate' soomaye,
qataq chegoqrauec co'ollaq netralec yi'iye 'alhua,
13qataq chochaq queta'aguelo na na'alhuapi na ỹotta'a't shiỹaxauapi,
qataq queta'aguelo na ỹotta'a't nta'alpi,
14qalaxaye Ñim Lo'onatac 'Enauacna
saishet da ỹashenem da huo'o ca saỹaỹamaxatapec soomaye,
nacherata da nhuogaxa so nta'alpi, 'eeta':
15«Saishet da qaupocheeua'a na lleca'aguishecpi,
qataq saishet da qauo'ochec ca qauem na ỹa'aqtaxanaxanecpi.»
16Nache Ñim Lo'onatac 'Enauacna
ỹo'otec na lqouaxa 'enauac so netalec yi'iye 'alhua,
qataq nlaxaañi 'enauac na lma'pi so trigo.
17Qalaxaye Ñimaye ỹa'auaxan da ỹamaq so José,
maye qaimen co'ollaxa da yaqto' nlatac.
18Qaq somaye qoỹanaguilo co'ollaxa naua lchel so ncoñetaxanaxat lcat,
qataq qaicoñe' qoỹanaigui aso ncoñetaxanaxaqui.
19Nache ivitta'a da ipacchigui dam ỹa'axata'a co'ollaxa so José,
nache da la'aqtac Ñim Nataxala' ỹachaxan da ỹoqta 'eesa somaye.
20Nache so nta'a damaxasoxoolec da qaisouec somaye,
som ilotague' so qalota nhuo' le'ecpi isouec somaye.
21Huaña nache ỹanagui da nataxala'
da yaqto' ilo'ogue so lma' somaye,
qataq da ilo'ogue 'enauac nam lalamaxatpi somaye.
22Qataq ỹanem da ỹapaxaguen so nataxala'pi,
qataq da ỹapaxaguenec da naỹaanec so nqueroxonecpi.
23Huaña nache so Jacob maye nataqa'en
le'enaxat da Israel taỹa co'ollaxa ye Egipto,
qaq somaye chegaqauec co'ollaq netaña ye 'alhua ye Cam.
24Nache Ñim Nataxala' ỹo'ot da nquictauec
ye lcata som lalamaxat lauo' le'ecpi somaye,
qataq napacalec naqa'en da la'añaxac so mpa'aguenaxauapi,
25ỹoqo'oye na Egipto le'ecpi nquiỹa
se'eso nhuo' le'ecpi maye lalamaxatpi Ñimaye,
nache ỹataqta dataỹa'aguet se'eso lamaxashecpi Ñimaye.
26Huaña nache Ñim Lo'onatac 'Enauacna
ỹamaq so lamaxashec Moisés qataq so Aarón
maye lca'agui'she co'ollaxa,
27nache soomaye ỹo'o't na la'anaxatpi
nam ỹo'otpi Ñim Lo'onatac 'Enauacna,
qataq na ỹo'ot da na'aalaxa co'ollaq huaña ye 'alhua ye Cam.
28Ñimaye namaq co'ollaxa so napalaxa
nache imauec da napalñi naqa'en yi'iye 'alhua,
qalaxaye so Egipto le'ecpi saishet co'ollaxa
da iqocha'a da la'aqtac Ñimaye.
29Qataq nañigui naqa'en na ntago'q so 'etaxat,
nache ỹalauat so nỹaqpi.
30Qataq 'enauac ye Egipto nlaqtelec ana miỹo,
nache iviraigui na pa'auo naua lma'ate so nta'alpi.
31Qataq co'ollaq detaqa Ñim Lo'onatac 'Enauacna,
nache imattalec 'enauac yi'iye 'alhua ana lotaxañipi qataq ana 'aỹatpi.
32Qataq so auot nañigui naqa'en ana lache,
qataq talec naqa'en na norec le'eraxa yi'iye 'alhua,
33Qataq nlaxaañi aso nañiguishe uva qataq aso higo,
qataq huacac naqa'en aso qo'oipaqpi yi'iye 'alhua.
34Qaq co'ollaq qaltaq detaqa Ñim Lo'onatac 'Enauacna,
nache anac aso qalota shiiquioxoipi.
35Nache chec 'enauac so ñaxattalecpi yi'iye 'alhua,
qataq ỹauta 'enauac so chegaqaigui yi'iye 'alhua.
36Qataq ỹo'otec da l-leuaxa som la'auaxanec llalaqpi so Egipto le'ecpi,
som la'auaxanec llalaqpi som chegoxoguetpi somayepi.
37Ñim Lo'onatac 'Enauacna nqatec co'ollaxa so lalamaxat nhuo' le'ecpi,
lỹatec naqa'en so qalota oro qataq plata,
nache qaica ca nqanaxattac somayepi.
38Nache so Egipto le'ecpi ỹataqta ntootapeguec
da ỹauaateueegue da jec somayepi,
cha'aye ỹataqta ñi'iỹa somayepi.
39Qaq Ñim Nataxala' ipelteetalec naqa'en somayepi so lo'oc,
qaq ye pe qalaq icoỹattalec na le'eraxa so norec.
40Qaq co'ollaq iỹaxanaique aloq somayepi,
nache Ñimaye namaq so qalota dachemipi,
qataq ỹo'ot da icomatec naqa'en so nallec piguem le'ec.
41Qataq chegaqaigui naqa'en aso coma' so 'etaxat,
nache 'eeta'am na tala da quelec so toolec 'alhua.
42Cha'aye Ñim Lo'onatac 'Enauacna saishet da icoua'ai som ỹan la'aqtac,
maye ỹanem co'ollaxa so lamaxashec Abraham.
43Qaq 'era da 'eetec Ñim Lo'onatac 'Enauacna,
co'ollaq nqatec so lalamaxat nhuo' le'ecpi maye lca'aguishecpi,
ỹataqta ỹa'alaqtai' naqa'en da ntonaxac.
44Qataq Ñimaye ỹanem somayepi
so na'alhua som ỹotta'a't shiỹaxauapi,
qataq da alaỹaxac da lo'onataxanaxac som ỹaqa'a nhuo' le'ecpi,
45da yaqto' ỹaỹamaxattec
qataq ilotelec da llec na lqataxacpi,
qataq na lapaxaguenataxanaxacpi Ñim Nataxala'.
¡Qaỹo'oxoren qome Ñim Nataxala'!
