Qaỹo'oxoren Ñim Nataxala'
1¡Qavio'oxoyiñi qome Ñim Nataxala'!
Qavio'oxoyiñi qome Ñim Nataxala',
cha'aye Ñimaye ỹataqta soxoraic,
qataq chochaq tatec da lauotaxanaqtaic.
2Qaq ¿negue'tom ca ivi' da ỹa'axatec
na lta'araic ỹo'otpi Ñim Nataxala'?
qataq ¿negue'tom ca ishet da ỹa'axat da ño'oxonnataguec Ñimaye?
3Ỹoqo'oye machiguiñi qome ca ỹo'ottac da no'on lataxac,
qataq ca nache 'eetai' da ỹo'ottac da nalochiguiñi lataxac.
4Ñaq aỹem 'auennata'a qome 'Am Nataxala',
qom ivita da 'anqouaguec na 'aralamaxat nhuo' le'ecpi.
Ñaq aỹem 'auennata'a qom ivita ca na'a'q da 'auca'alaqtaxan.
5Yaqto' sauaachigui qom ỹaỹamaxañi na 'arca'aguishecpi,
qataq ñeuanaua'a ca ntonaxac qataq ca llo'oxonnataxanaxac
na 'aralamaxat nhuo' le'ecpi.
6Qomi' huo'o na qarasouaxashetpi shenaqta'am so qarta'alpi,
da so'otaqtac na qauemsat qataq na ñe'etaxaloxosat.
7So qarta'alpi co'ollaq hueta'a ye Egipto,
qalaq saishet da ỹaỹaaneguet co'ollaxa da 'ayo'oxoyec,
qataq saishet da iuennata'a da lta'araic 'arauotaxanaqtaic,
nacherata da 'am dataỹa'aguet co'ollaq huaña
ye loigue aso Auaxai Togaxarai.
8Qalaxaye Ñimaye nca'alaxatec somayepi,
da yaqto' huo'o naqa'en da llo'oxoyec da le'enaxat Ñimaye,
qataq yaqto' ỹachaxan da lta'araic la'añaxac.
9Nache nlaxa co'ollaxa aso Auaxai Togaxarai nache deqaqa naqa'en,
nache quichiguingui naqa'en somayepi na pa'aguiñi asa'aso auaxai,
nache 'eeta'am da quetalec ca toolec 'alhua.
10Nache nca'alaxateeguesop da la'añaxac so mpa'aguenaxauapi,
dam la'añaxac so nquiỹatega co'ollaxa somayepi.
11Nache se'eso 'etaxat ỹapolec so mpa'aguenaxauapi,
nache qaica ca no'onañi da nca'altauec somayepi.
12Huaña nache somayepi ỹataqta ỹa'amaqten da la'aqtac Ñimaye,
qataq do'onaxaatac da ỹo'oxoren Ñimaye.
13Qalaxaye saqaỹaloq co'ollaxa da icoua'ai na ỹo'otpi Ñimaye,
nache sa iuata'a nam huotaique ỹo'otpi Ñimaye.
14Qataq ỹo'ot 'enauac na maiche 'eetapeguecpi
co'ollaq huaña ye toolec 'alhua,
qataq huaña da ỹe'eguen Ñim Lo'onatac 'Enauacna.
15Qaq Ñimaye ỹanem somayepi na iỹaxanaique co'ollaxa,
qalaxaye namaxa so napiina maye dalaataxanapec.
16Qaq co'ollaq hueta'a so nmataqa' somayepi,
nache nquiỹa so Moisés qataq so Aarón
maye iỹotauga Ñim Nataxala'.
17Qaq huaña nache nauachigui na 'alhua,
nache pa'aguiñi naqa'en so Datán,
qataq ỹapolec so ca'attegue'pi so Abirán.
18Qataq 'eroigui so norec
nache ỹavigaxat 'enauac somayepi,
nache na le'eraxa somaye
nmatchiguiñi se'eso 'etaxaloxoicpi.
19Qataq co'ollaq huaña añi qasoxonaxa ye Horeb
nache ỹo'ot so le'enaqtac huaca llalec,
nache somayepi natamnot se'eso
lqatelleguishec maye le'enaqtac.
20Qaq 'era da 'eetec da nquigaxat da lataxac
Ñim ỹo'ot da llo'oxoyec somayepi,
nmeneguet naqa'en so le'enaqtac huaca llalec
maye aloq na 'auaqpi.
21Nache icoua'ai Ñim Lo'onatac 'Enauacna
maye nca'alaxatec co'ollaxa somayepi,
qataq ỹo'ot na lta'araic da la'amaqchec
co'ollaq huaña ye Egipto,
22qataq na ỹo'ot da na'aalaxa
co'ollaq huaña ye 'alhua Cam,
qataq na qaica ca 'ena'am co'ollaq huaña aso Auaxai Togaxarai.
23Nache Ñim Lo'onatac 'Enauacna
detaxaỹa co'ollaxa da ilaxachigui somayepi,
qalaxaye souaxat so Moisés maye lca'aguishec Ñimaye,
dataỹa'aguet co'ollaxa da yaqto' nqanaxat da lalemataic,
nache Ñimaye saishet da ipaca'a da ilaxachigui.
24Qataq co'ollaq qaỹata'ague nache somayepi
ỹo'otan yi'iye 'onaxaic 'alhua,
qataq saishet da ỹa'amaqte'n naua ỹa'n la'aqtaqa
Ñim Lo'onatac 'Enauacna.
25Nache huetaiguilo naua lpele'ete
da qauema naua la'aqtaqa,
nache saishet da ỹalaxagueta naua lamaxasoxonaxaco Ñim Nataxala'.
26Ỹoqo'oye Ñimaye ỹanem da la'aqtac somayepi,
da ileualec naqa'en ye toolec 'alhua,
27qataq ỹo'ot da nlagaxattac naqa'en nam chegoxoguetpi somayepi,
qataq lagoigui naqa'en nam ỹotta'a't shiỹaxauapi.
28Qataq somayepi nañanot so Baal Pegor,
nache chec co'ollaxa aso nachetaqtaxanaqte
maye qoỹanot so atamnaxala'pi maye saishet da nca'altauec.
29Nache ỹo'ot da dalemata Ñim Nataxala',
souaxat na qauem maye ỹo'ot somayepi,
nache talec naqa'en na ỹotta'a't napiina.
30Qalaxaye so Finés nachaañi co'ollaxa,
nache ỹalauat som dasouaqtaxan
nache vi'iiguet se'eso napiina.
31Qaq ỹoqo'oye Ñim Lo'onatac 'Enauacna
ỹalecneua'a dam nalochiguiñi lataxac de'era ỹo'ot somaye,
da yaqto' sa icoua'ai na nta'alpi qataq cam chegoxoguetpi namayepi.
32Qataq inogoqchet Ñim Nataxala',
co'ollaq hueto'ot na loigue so 'etaxat ye Meribá,
nache so Moisés ỹataqta qaica ca laỹamqa' souaxat somayepi,
33nache ỹataqta qaỹaỹallaqchet somaye,
ỹoqo'oye sa ilo'oguelo naua la'aqtaqa co'ollaq detaqa.
34Qataq somayepi saishet co'ollaxa da ilaxachigui so nhuo' le'ecpi,
maye Ñim Nataxala' ỹamaxalec co'ollaxa da ilaxachigui.
35Nacherata da ỹaleeguet na ỹotta'a't shiỹaxauapi,
qataq quegue na no'onataxacpi.
36Qataq natamnot so natamnaxala'pi namayepi,
qaq nachera da ỹo'ot da lque'emaxa,
37souaxat da ỹaneuo na llalecpi qataq ana llalepi,
da yaqto' lachetaqtaxanaxat da ỹanot se'eso leguemaxaicpi atamnaxala'pi.
38Qataq icorec so ntago'q maye qaica ca ỹasouaxat,
ltago'q so llalecpi qataq aso llalepi maye ỹavigaxat
da ỹanot se'eso natamnaxala'pi na netaña ye Canaán,
nache se'eso ntago'q maye qaicorec na'aqchet na 'alhua.
39Nache somayepi maiche na'aqchet ne'ena ỹo'otpi,
qataq nquisheshigui nam ỹo'otpi.
40Nache Ñim Nataxala' 'eroigui da lalemataic
da dalemataỹa so lalamaxat nhuo' le'ecpi,
qataq deqaiga na lalamaxat logoxoshetpi somayepi.
41Ỹoqo'oye ỹaneguet na ỹotta'a't shiỹaxauapi,
da yaqto' loxonec somayepi nam maiche lquiỹaxatpi co'ollaxa.
42Nache se'eso mpa'aguenaxauapi huetaiya' naqa'en somayepi,
qataq ỹo'ottac nam lamaxosoxonaxacpi.
43Qaq Ñim Lo'onatac 'Enauacna ỹataqta qalota co'ollaxa da nca'alaxatec,
qalaxaye somayepi dataỹa'aguet naxa na lqataxacpi Ñimaye.
Ỹoqo'oye ivira'a da huetaiya' souaxat na qauempi.
44Qalaxaye Ñim Lo'onatac 'Enauacna naxa da ila'a da nque'eenaxac,
qataq da hua'axaỹa da nachoxonnaxac,
45nache tachigui naxa ye lauel da naỹamaxataxac co'ollaq naỹamaxate' somayepi,
nache naralaxat da lhuennataxac
souaxat da lta'araic lauotaxanaqtaic.
46Nache ỹo'ot da ivira'a da 'enauac
som mpa'aguenaxauapi somayepi,
huo'o da lchoxonnataxanaxa somayepi.
47'Am Nataxala' maye 'Am Qanatamnaxala',
ñaq qomi' 'anca'alaxatrec qome, qataq qomi' 'anqateua'alo
da salegaqta'aguet na ỹotta'a't shiỹaxauapi na souaqta'alo,
yaqto' sanaqot da qana'achecỹaxac da qui'itta 'are'enaxat,
qataq so'otaq da qayo'oxonnataxanaxac.
48Ỹataqta 'am qaỹo'oxoren qome, 'Am Nataxala',
maye 'Am Natamnaxala' na Israel le'ecpi,
'am maye nache 'eetai', qataq chochaq tatec qome da 'am qaỹo'oxoreetac,
qaq 'enauac qome na ỹotta'a't nhuo' le'ecpi, 'eeta':
«¡Aja', nache 'eetec!»
¡Qaỹo'oxoren qome Ñim Nataxala'!
