Salmos 121

₁Qaq da samato'ot naxa ana qasoxonaxapi, nache sheeta':

«¿Chaq hua'ago' qome ca chegaqa'ague ca ñetaunaguec?»

₂Qomye ca ñetaunaguec chegoqo'ot qome Ñim Nataxala',

maye lo'onatac na piguem qataq ana 'alhua.

₃Ñimaye saishet qome da 'am hua'aqta'a da qouañi,

cha'aye saishet da do'oche Ñim 'am ilotague'.

₄¡Aja'! Ñimaye saishet da do'oche,

saishet da do'oche Ñim ilotague' na Israel le'ecpi.

₅Ñim Nataxala', nacheñi Ñim 'am nteltega,

Ñim Nataxala', nacheñi Ñim 'am npaxattalec,

qataq nacheñi Ñim 'am itauaatac.

₆Ỹoqo'oye añi nala' saishet da 'am na'aqchet ye na'a'q,

qataq ñi ca'agoxoic ye pe.

₇Ñim Nataxala', 'am ntelaqna'aguet qome 'enauac na qauemsat,

Ñimaye npaxattalec qome da 'anachaalataxac.

₈Ñim Nataxala', ntela'a qome 'enauac da 'arqauaxac,

chegoqchiguiña nagui, qataq nache 'eetai' qome.