Da ño'oxonnataguec ye Jerusalén
1Aỹem, ỹataqta samachiguiñi da aỹem qoỹenapega, qoỹeeta':
¡Qolaq ñeqo'onaxaua'a añi atamnaxaqui maye lalamaqte Ñim Nataxala'!
2Qomi' mashe souaqta'a na 'anasom, 'am Jerusalén.
3'Am Jerusalén, 'am qano'oxoosheguem co'ollaxa,
da yaqto' 'am laponqa' na shiỹaxauapi.
4'Am, nache 'am natapegueua'a na maiche nhuo' le'ecpi
maye lalamaxatpi Ñim Nataxala',
da yaqto' ỹo'oxoren da le'enaxat Ñimaye,
cha'aye nachera da ỹamaxalec co'ollaxa so Israel.
5Qataq nache 'am naña ye no'onataxanaqa'
da qaỹo'ot da nalochiguiñi lataxac,
qataq nache lo'onataxanaqa' na nta'alpi maye chegoxoguetpi so David.
6Qaq qaỹaxañiiua'a qome da nlagaxayec na Jerusalén,
yaqto' lactapiguiñi 'enauac nam ỹauotec ne'ena Jerusalén.
7Ñaq huo'o qome da l-lagaxayec
na huetaigui na pa'auo na lpaqtaxat namaye,
qataq no'on da nmataxac ca netaiguilo naua nỹeco lta'al.
8Qaq souaxat da ỹauotaxanaqtaic na ỹaqaỹañicpi,
qataq na ñauochaxauapi, nache sheeta':
«Ñaq huo'o qome da nlagaxayec, 'am Jerusalén.»
9Qaq souaxat da ỹauotaxanaqtaic añi atamnaxaqui,
maye lalamaqte Ñim Nataxala' maye Qanatamnaxala',
nache ñimitaique qome da qaica camachaqca da qoneta.
