Salmos 138

₁'Am Nataxala', aỹem imauec da iquiyaqteỹaxac da 'am sho'oxoren,

qataq so'on nam no'onecpi qom satato'ot ca atamnaxala'pi.

₂Qataq sa'alyiñi qome naua illecte satategue da pa'aỹa'ague

añi qui'itta atamnaxaqui maye 'aralamaqte, sho'oxoreetac qome da 'are'enaxat

souaxat da 'arauotaxanaqtaic qataq da 'arsoxoyec,

cha'aye 'auo'ot da la'amaqchec da 'are'enaxat,

qataq naua 'ara'aqtaqa nataỹaña 'enauac na huetalecna.

₃Co'ollaq 'am seỹaxanot qalaq aỹem 'auasateguet,

aỹem 'aua'añaqchet qataq dalaxaic 'anqa'en da ỹa'añaxac.

₄'Am Nataxala', 'enauac qome na nta'alpi

maye netalec ana 'alhua da 'am ỹo'oxoren,

qom na'axaỹaxanalo naua 'ara'aqtaqa.

₅Do'onaxaatac qome da ỹo'oxoreetac da 'icỹaxac,

cha'aye da 'ayo'oxoyec 'Am Nataxala', ỹataqta lta'araic.

₆Ñim Nataxala', qaỹoqotcheguema, qalaxaye ilo'oguet cam qaica ca ye,

da lmeenaxanaxac Ñimaye qaỹoqta naqa'en na ño'oxonnaxaicpi.

₇Naxa da huo'o da ỹachetataic qalaq aỹem nca'alaxattauec,

na 'arhuaq qalaq npaxateguet da layeloxo na ñepa'aguenaxauapi,

na 'arhuaq 'oiguishec aỹem nca'alaxatec.

₈Ñim Nataxala', ipacchigui qome ca 'eetapeguec dam sheeta,

da 'arauotaxanaqtaic 'Am Nataxala', chochaq tatec,

qaq saishet qome da qoca'ai nam lo'onatacpi naua 'arhua'q.