Ñim Lo'onatac 'Enauacna ỹaỹaten 'enauac nam huo'o
1'Am Nataxala', aỹem 'auchemaxatta co'ollaxa,
'Am, aỹem 'auauattoota,
2'Am, ỹataqta 'auauattoota 'enauac na so'ottacpi,
na'aictaxa da aỹem qaỹoqta, qalaq 'am 'auaỹate'n naua iuennataxaco.
3'Auaỹaten 'enauac da iqauaxac qataq da ñemataxac,
'Am 'auaỹaten 'enauac na ỹecỹaxacpi.
4Na'aictaxa da saxanaxa da ñasaxauec ca ỹa'aqtac,
qalaq 'Am Nataxala', mashe 'auaỹaten.
5'Aulotalec 'enauac da ñachaalataxac,
aỹem huetalec da 'arhuaqỹaxac.
6De'era 'arauattonaxanaxac ỹataqta ỹapac da llo'oxoyec,
napacalec da ỹauattonaxanaxac,
damaye ỹataqta qaỹoqotcheguemec, saishet da sevi' da saỹaten.
7¿Hua'agom ca saigue da qaỹoqta ñaqa'en so Saqcha'a 'Ara'añaxac?
¿Hua'agom ca she'eguenegue da yaqto' 'am qaỹoqta ñaqa'en?
8Da sasheguema na piguem qalaq 'Am qoueta'a,
Da saña ca qaỹoqchiguiña pa'aguiñi ana 'alhua,
qalaq nataqa'en 'Am qoueta'a.
9Da ñaỹosheguem da saigue da nala' lliguisheguem,
da sonaña ca loga't aso auaxai maye pa'aigue da nala' lliguiñi,
10qalaq nache 'ena'am aỹem ỹauecta'aguet na 'arhuaq,
na 'arhuaq 'oiguishec aỹem nasoqtañi.
11Da iuennataxa da ñeqañoxotoigui ca napalaxa,
huo'otaq da nañigui ca pe na yo'oqchiguiñi maye aỹem coleesop,
12qaq ñaqaiyeta na napalaxa saishet da aỹem ỹoxochiisop da qoneta,
cha'aye ye pe qalaq yo'oqchiguiñi nache 'eeta'am ye na'a'q.
Cha'aye na napalaxa qataq na yo'oqchiguiñi nache 'eeta'a't 'anqa'en.
13'Am, 'aro'onatac da ỹo'ocỹaxac,
aỹem 'analoqteetapiguiñi co'ollaq ñaq sootaigui na lauel aso ỹate'e.
14Ỹoqo'oye 'am sho'oxoreetac cha'aye lta'araic da ỹa'aalaxa,
cha'aye huo'o da llo'oxoyec 'enauac na 'auo'otpi.
Qaq damaye ỹataqta saỹateeta.
15'Am 'aulotagui co'ollaxa da lañaxataxac da ỹo'ocỹaxac,
co'ollaq ñañaxattac huaña ca saqcha'a,
co'ollaq ñaq na'attega't da ỹo'ocỹaxac
huaña ca qaỹoqchiguiña pa'aguiñi ana 'alhua.
16Naua 'ara'ai'te ỹauaachiguilo da ỹo'ocỹaxac co'ollaq no'oxootac,
qaq 'enauac de'era mashe nanettalec co'ollaxa aca 'ere.
'Am ivira'a da 'auaỹaten ca loga't da ñachaalataxac,
na'aictoxo' da saxanaxa da huo'o ca yo'oq damaye.
17'Am Ñatamnaxala', huo'o da lya'c ñaqa'en naua 'arhuennataxaco,
naamaye ỹataqta qalochiyiñi, qataq qaica ca loga't.
18Da ñaloqten qalaq saishet da sevi',
cha'aye napacalec ye lcata na lsoche na 'alhua,
taxa da sematta da ñaloqten, qaq ñaqaiyeta 'am soota'aguet.
19'Am Ñatamnaxala',
'anqat qome da nachaalataxac na qauemaicpi,
'auỹoteuga qome da sheeta 'enauac na laataxanaxaicpi,
20nam qauema na la'aqtaqa da 'am detaqtega,
nam qaica ca naigui da nachaañi da 'am dataỹa'aguet.
21'Am Nataxala',
¿peta'a sa sequiỹo' na 'am nquiỹatega?
¿Peta'a sa saỹemeco' na 'am npa'agueetega?
22Aỹem ỹataqta imauec da sequiỹa namayepi,
namayepi ỹataqta ñepa'aguenaxauapi.
23'Am Nataxala',
aỹem 'auchemaxata qome yaqto' 'auaỹaten da iquiyaqteỹaxac,
aỹem 'avi'iguen qome yaqto' 'auaỹaten na iuennataxacpi,
24'aumeten qome da iqauaxac da shectague' ca qauem nqa'aic,
nache aỹem 'auauecteuga so nqa'aic maye chochaq tatec.
