Salmos 19

₁Na piguem, namaye ỹa'axattac

da llo'oxoyec Ñim Lo'onatac 'Enauacna,

qataq qomi' da'aqtaxaatapeguema

'enauac na lo'onatacpi Ñimaye.

₂Ye 'oonolec na'a'q, qalaq maiche na'aqtaxaatague' ye lỹa na'a'q,

qataq ye pe' qalaq maiche na'aqtaxaatague' ye lỹa pe.

₃Na'aictaxa da huo'otaq sa qaỹa'axaỹa na la'aqtacpi,

qataq saishet da qaỹa'axaỹa da lavilỹaxac,

₄qalaxaye da lavilỹaxac dellimigui naqa'en ana 'alhua,

qataq naua la'aqtaqa ivira'alo naua loga'te ana 'alhua,

maye huaña da qaỹauo'o lma' co'ollaxa añi nala'.

₅Qaq aña'añi nala' 'eeta'am naxa ca auonaq

da nnoxonec chegoqtoigui ca nỹec maye laronqa',

ỹataqta machiguiñi 'eeta'am ca qomitaxaic da ivita da quegue so nqa'aic.

₆Qaq da nnoxoosheguem añi nala' nache jec,

queto'ot na piguem nache ivitta'a ca loga't ana 'alhua,

nache qaica ca ishet da 'eteguet na le'eraxa.

₇Naua lqataxaco Ñim Nataxala' ỹataqta ỹaỹamaqchiyiñi,

cha'aye ỹan da dalaxaic achaalataxac.

Da lamaxasoxonaxac Ñim Nataxala' ỹataqta saishet da nqochen,

cha'aye damaye ỹo'ot da ỹaanaxanaxaic

ca shiỹaxaua huesota da lataxac.

₈Na lqataxacpi Ñim Nataxala' ỹataqta no'oitegue,

cha'aye ỹauo'o da ntonaxac aca nquiyaqte.

Qataq naua lamaxasoxonaxaco Ñim Nataxala' ỹataqta qui'itte',

qataq ỹataqta nauaachiyiñi naqa'en naua na'ai'te.

₉Da huo'o naq 'enec qanqa'en Ñim Nataxala'

damaye ỹataqta ỹaỹamaqchiguiñi, qataq nache 'eetai' qaica ca ldaxac.

Naua la'aqtaqa Ñim Nataxala' ỹataqta 'eesora,

qataq 'enauaque naamaye ỹataqta no'oiteguelo,

₁₀qataq ỹataqta napacalec da lashiichiỹaxac ca no'on oro,

qataq ỹataqta napacalec da lamaic na te'esaq lli'i maye huetagui ca lte'.

₁₁Qataq naamaye nataqa'en nache nhuogoctagueeco

ne'ena 'aralamaxat 'aramaxashec,

qataq ỹataqta huo'o da naigui da qaỹalaxagueta naamaye.

₁₂¿Negue't ca ishet da ila'a ca maiche lalamaxat lsomaxac?

Ỹoqo'oye aỹem 'auchoxoren qome,

'am Ỹataxala', souaxat na ỹasouaxashetpi maye saqcha'a.

₁₃Qataq aỹem 'anqateeguesop qome da ña'amqaanaxac,

qataq saishet qome da aỹem 'auashenem

da ña'amqaanaxac da aỹem loxonec.

Yaqto' nalochiguiñi da ỹataxac, qataq saishet da lta'araic ca ỹasouaxashet.

₁₄Nache ỹataqta 'auaỹamaxareete'

naua ỹa'aqtaqa qataq naua iuennataxaco,

'am Ỹataxala', nache 'am maye aỹem

'aupelteetalec qataq aỹem 'ampaxattalec.