Salmos 20

₁Ñim Nataxala' 'am hua'axaỹa qom qouetapoigui da 'arhuogoxo,

qataq 'am iueelec qome Ñim Natamnaxala' so Jacob.

₂Qataq chegoqchiguiña ye lma' qui'itta

da 'am namaxa qome ca 'antaunaguec,

qataq chegoqchiguiña ye Sión da 'am ỹa'añaqchet.

₃Qataq Ñimaye ntoueeta'ac qome 'enauac ana 'arachetaqtaxanaqte,

qataq ỹaỹamaxareeta da ỹaconeguet ca 'auavigaxat 'arachetaqtaxanaxat.

₄Qataq ipacchigui naqa'en 'enauac na qonetapeguecpi,

qataq imeta naqa'en 'enauac na huotaique da 'auo'otpi.

₅Nache so'otaq ca qantonaxac souaxat da 'oxonaxanaxac,

qataq ñauaxaỹaxanaxasheguem aca qara'anaxanaqte,

souaxat da le'enaxat Ñim Qanatamnaxala'.

Qaq Ñim Nataxala' 'am ỹanem qome 'enauac ca 'auỹaxaataique.

₆Nagui aỹem saỹateeta da Ñim Nataxala'

dauegaxan naqa'en so lca'aguishec nta'a,

qataq huaña ye qui'itta lma' na piguem da ỹasateguet,

qataq ỹauota'a da lta'araic la'añaxac da dauegaxan naqa'en.

₇Huo'o na pe'etega ana nnotaxaqui maye nalaataxaqui,

qataq huo'o na pe'etega na lalo caipi,

qomi' qalaxaye sepia'aqtega Ñim Nataxala' maye Qanatamnaxala'.

₈Qaq namayepi ỹa'aldañi qome naua l-llecte, nache huañi,

qomi' qalaxaye ñachaataqchiguiñi, saishet da souaqañi.

₉'Am Nataxala', ñaq 'aỹa'anem da doxonaxan qome ñi nta'a,

qataq qomi' 'auasategueta da 'am seỹaxanaqtacot.