No'onec souaxat da noxonaxanaxac
1'Am Nataxala', ñi nta'a ỹataqta
machiguiñi cha'aye 'aỹa'anem da la'añaxac,
ñimaye ỹataqta ntootapigui' cha'aye 'aỹa'anem da loxonaxanaxac.
2'Am 'aupacchigui da 'aỹa'anem
na 'eetapeguecpi da lquiyaqteỹaxac,
qataq saishet da 'aullapeguem na iỹaxanaiquepi.
3Qataq da 'am ivireua'a, nache 'aỹa'anem da lta'araic nchoxonnataguec,
qataq 'aỹa'anagui na lqaic aso naro'o oro.
4Da 'am iỹaxanot da lca'alaxa, nache 'aỹa'anem,
qataq da logoraic achaalataxac maye chochaq tatec.
5Chegoqchigui da 'artaunaxanaxac,
da ỹataqta lta'araic da la'añaxac,
nache 'aỹa'anem da llo'oxoyec qataq huo'o naq 'enec.
6Qataq 'aỹa'anem da chochaq tatec da nchoxonnataguec,
qataq nlaqchigui 'anqa'en da ntonaxac da qoueta'aguet.
7Qaq 'am nta'a, saishet qome da qouañi,
cha'aye 'aupi'iỹa'a Ñim Nataxala',
qataq 'aupi'iỹa'a da lsoxoyec Ñim qaỹoqotcheguemec.
8Da la'añaxac na 'arhuaq iviralec qome
'enauac na 'ampa'aguenaxauapi,
qataq na 'oic 'arhuaq iviralec qome na 'am nquiỹategapi,
9qaq nache 'auachaigui aca nqatelaxanaxaqui maye 'ettaigui,
qom ivita da 'anachaxan da yaqto' 'anmit 'enauacna.
Ñim Nataxala', de'era lalemataic nmatchiguiñi qome namayepi
ỹauota'a ca norec maye nlaxaañi 'enauacna.
10Nache ỹapalaxat da yaqto' saishet da huetalec naqa'en ana 'alhua
qataq saishet da ỹalecta'aguet na shiỹaxauapi,
na llalaqpi qataq cam chegoxoguet namayepi.
11Qaq ỹoqo'oye na'aictaxa da huotaique da 'am na'aqchet,
qataq da huotaique da huo'o ca 'am ỹo'otec,
qalaxaye saishet da ỹañoxot,
12cha'aye 'auo'otec qome da datauec 'anqa'en,
qom 'auauota'a ca 'archecnec da 'auareetagui namayepi.
13Ñaq 'anachalataxaañi qome da 'ara'añaxac 'Am Nataxala',
yaqto' so'onaq na no'onecpi da sho'oxorenaq da 'eetec da 'arauegaxanaxac.
