Da la'añaxac qataq da llo'oxoyec Ñim Nataxala'
1Qavio'oxoyiñi qome Ñim Nataxala',
qami' piguem le'ecpi: qavio'oxoyiñi da la'añaxac
qataq da llo'oxoyec Ñim Nataxala',
2qavio'oxoyiñi da ỹo'oxoraic le'enaxat Ñim Nataxala'
qavio'oxoyiñi Ñim Nataxala' da huaña
ye 'onaxaic qataq qui'itta lanataqa'.
3Da lavilỹaxac Ñim Nataxala' huetaigui
da l-llimiaxa na 'etaxat aso auaxai.
Ñim Lo'onatac 'Enauacna maye ỹo'oxoraic ỹo'ot na nalataxa,
Ñim Nataxala', Ñimaye huetalec aso qalochiguiñi auaxai.
4Da lavilỹaxac Ñim Nataxala' ỹataqta lta'araic da la'añaxac.
Da lavilỹaxac Ñim Nataxala' ỹataqta lta'araic da llo'oxoyec.
5Da lavilỹaxac Ñim Nataxala' huacaguec
naqa'en ana lcouepi ana qo'oipaq pino.
Ñim Nataxala' ỹataqta huacaguec
naqa'en ana lcouepi ana qo'oipaq pino ye Líbano.
6Qataq ỹataqta cholaxan naqa'en,
ana qasoxonaxapi ye Líbano qataq ye Sirión
'eeta'am naqa'en da parenaxaatac
na huaca no'onaxa le'ec qataq na huaca llalec.
7Da lavilỹaxac Ñim Nataxala', nasaxauec na le'eraxa na norec.
8Da lavilỹaxac Ñim Nataxala' ỹataqta
ỹacholaxan naqa'en ye toolec 'alhua.
Ñim Nataxala' ỹataqta cholaxan naqa'en ye toolec 'alhua ye Cades.
9Da lavilỹaxac Ñim Nataxala' ỹataqta
inoxon ana qo'oipaqpi le'enaxat encina,
nache ỹataqta qaca naqa'en ana qo'oipaq na aviaq.
Qaq huaña añi lalamaqte atamnaxaqui
da 'enauac qaỹo'oxoreetac Ñimaye.
10Ñim Nataxala' nacheñi ñi ilotague' na auot,
Ñim Nataxala' nache 'eetai' da chochaq tatec da lo'onataxanaxac.
11Ñim Nataxala' ỹanem da la'añaxac na lalamaxat nhuo' le'ecpi,
qataq ỹanem da nqouagaxa na lalamaxatpi qataq lactapiguiñi naqa'en.
