Da atamnaxac da qaiỹaxanot Ñim Nataxala'
1'Am Nataxala', ñaq 'auataỹa'aguet qome na aỹem dataỹa'aguetpi,
ñaq 'aulogui' na aỹem iloquiaxaatacpi.
2Ñaq 'auacona aca 'arpaqtaxanaqte nache 'auanac da aỹem 'autauan,
3ñaq 'auacona aca 'arataquiaxai
nache 'auataỹa'aguet na aỹem icaatacpi,
aỹem ñeshetaique da 'am sa'axaỹa da qoneta':
«Nachaỹem 'arca'alaxaqui.»
4Nache 'auo'otec da la'aloxo qataq saỹaỹaten
ca 'eetec na huotaique da aỹem ỹalauat,
nam huotaique da ỹauo'o ca aỹem ỹo'otec qauem,
5nache 'eeta'am qome na 'auaqpi da ỹache na la'at,
qom ỹasaxauec namayepi so lamaxashec piguem le'ec Ñim Nataxala'.
6Nache napalñi qataq salvi so nqa'aic namayepi,
qom icanapec namayepi so lamaxashec piguem le'ec Ñim Nataxala'.
7Cha'aye qaica ca sasouaxat qalaq ỹauo'o aso lqoina da aỹem nqovin,
qataq ỹauo'o aso lshere da ỹauotaique da aỹem ỹasaxangui.
8Qaq ñaq ique'elaxat qome namayepi da qaica ca na'achecỹaxac,
qataq maiche tangui qome aca maiche lqoina namayepi,
qataq aca lshere maye ỹo'ot co'ollaxa namayepi.
9Huaña nache samachiguiñi souaxat Ñim Nataxala',
qataq ñetootapeguec da lca'alaqtaxanaxac Ñimaye.
10Nache imauec qome da iquiyaqteỹaxac
da sheeta': «¿Negue'tom ca 'eeta'am 'Am Nataxala'?
Cha'aye 'anca'alaxatec na choxoraqpi,
qataq na huo'o da lhuenaxanaxa, qataq 'anqateeguesop
na napacalec da la'añaxac namayepi qataq nhuottac.»
11Nachaañi na saq'en na'aqtaxanaxanecpi,
nache aỹem inattac denataxaateguec na saishet da saỹaten.
12Namayepi so'otec co'ollaxa da no'on
qalaxaye namayepi aỹem ỹo'otec da qauem,
qaq damaye ỹataqta huo'o naqa'en da ỹaquicoxo.
13Qaq naxa da sano'on namayepi
qalaq lta'araic da iuogoxo souaxat namayepi,
nache saayiñi naua anogo sansatte' qataq ñeqouaqchet
qataq nache shecto'ot da ñatameetapeguelec namayepi.
14Nache choche shequeuotapigui' da ỹaquicoxo,
qataq qaica ca ỹa'añaxac 'eeta'am da huo'otaq ileu aca ỹate'e,
huo'otaq ca ñauochaxaua huo'otaq ca ỹalamaxat ỹaqaỹa.
15Qalaxaye co'ollaq souañi,
nache 'enauac namayepi da aỹem lashetac,
'eeta'am ca ỹaqa'a ca chegaqa'ague qataq da saqaỹauatton,
nache ỹataqta ỹe'eguelaqtalec da aỹem saiyacnapec.
16Ỹataqta aỹem saiyacnapec qataq aỹem ỹe'enai',
da lmeenaxanaxac da aỹem ỹamato'ot qalaq huo'o da lquiỹaxa.
17'Am Nataxala', ¿chaq laguio' da ime,
da choche 'aumeteetac de'era?
Ñaq 'anca'alaxateeguesop da ñachaalataxac,
dam 'oonolec ñachaalataxac, ne'ena llonpi maye desoqtac.
18Yaqto' 'am sanem da ña'achecỹaxac
da salectaigui na lapoota'a't shiỹaxauapi maye 'aralamaxatpi,
qataq 'am sho'oxoreetac ỹauaachigui
ñaqa'en na qalota shiỹaxauapi.
19Saishet qome da aỹem ntootalec na ñepa'aguenaxauapi,
qataq saishet da naquiaxaatalec ana la'aite nam choche aỹem nquiỹatega.
20Cha'aye namayepi saishet da anac da ỹo'ot ca nlagaxayec,
nda'a't da lapaqtapiguiñi na latenataxanaxacpi,
da npa'agueetague' na shiỹaxauapi
maye lactapiguiñi da netalec ne'ena 'alhua,
21ỹataqta ỹauachiguilo naua ala'api da aỹem ỹe'eetac nache, 'eeta':
«¡Ña qauloỹa ñim seviraqta'a da seloqto'ot nagui!»
22¡Qaq ỹataqta 'auauaachigui de'era 'Am Nataxala'!
¡Qaq saishet qome da choche 'añe'emaxat!
¡Qataq saishet qome da aỹem qaỹoqtaique 'anqa'en!
23Ñaq 'anlouec 'Am Nataxala' qataq qoñisheguem 'Am Ñatamnaxala',
Ñaq aỹem 'auo'otec ca ỹaỹamaqchiguiñi, aỹem 'aueelec.
24'Am Nataxala', maye 'Am Ñatamnaxala', ñaq aỹem 'anmit,
'aupacchigui da nalochiguiñi lataxac da huo'o ca 'auo'ot,
yaqto' saishet da aỹem lashetac namayepi.
25Qataq saishet qome da lhuennataxac, da 'eeta':
«'Era da shenaqtapeguec»
qataq da, 'eeta': «Ñimaye mashe qoroxonec.»
26Ñaq huo'o qome da la'aloxo qataq saỹaỹaten ca 'eetec,
nam ntootalec de'era souaigui ỹachoxoyec,
qataq huo'o nataqa'en da la'aloxo
na ipi'itaxaatega da aỹem nataỹaña.
27Qalaxaye machiguiñi qome qataq ỹa'alaqtai' da ntonaxac
nam ỹayeeta'a da aỹem ỹauaachigui da soxonaxan,
qataq ỹe'eguelaxattalec da 'eeta':
«¡Ñim Nataxala' ỹataqta 'amaqtaqaic,
qataq ỹaỹamaxareeta da l-lagaxayec ne'ena lamaxashec!»
28Ỹoqo'oye ñi ỹachaxat
ỹa'axat qome dam nalochiguiñi lataxac,
¡qataq 'enauaque naua na'axa'te da 'am sho'oxoreetac!
