Da ñaquitaxac hueto'ot Ñim Lo'onatac 'Enauacna
1Ỹataqta sheeta'am ana chegaxango da ilem na laquip,
nache nmittaique ca la'auaxac na 'etaxat,
qaq 'era da 'eetec 'Am Ñatamnaxala', da 'am ñimittaique.
2Ỹataqta huo'o na ỹaquip da ñimittaique Ñim Lo'onatac 'Enauacna,
Ñim Lo'onatac 'Enauacna maye chegoqo'ot da nca'alaxa.
Qaq ¿chaq laguio' da ñachaateua'a Ñimaye?
3Naua ỹache' qalaq 'eeta'am ca anoq,
ye na'a'q qataq ye pe, qataq imauec
ye na'a'q da aỹem qainattac, qoỹeeta':
«¿Hueta'ago' ca 'Anatamnaxala'?»
4Qaq naxa da tachigui ye iuel se'eso hua'au,
nache ỹataqta nỹen da ivilỹaxac co'ollaq shectaigui
so shiỹaxauapi da sauectaua'a añi atamnaxaqui
maye lalamaqte Ñim Lo'onatac 'Enauacna,
ỹataqta ỹa'alaqtagui da ntonaxac da ỹaatac da na'achec.
Qaq ỹataqta lta'araic da ño'oxonnataxanaxac se'eso na'a'q.
5Qaq ¿ta'ainec taxa da seqalvi?
Qataq ¿ta'ainec taxa da huo'o da iuogoxo?
Ye da ñaquitaxac mashe sacheto'ot Ñim Lo'onatac 'Enauacna,
qaq Ñimaye nache shecto'ot da sho'oxoreetac.
Ñim Ñatamnaxala' qataq ica'alaxaqui.
6Qaq aỹem ñanomteguet da qaica ca ỹa'añaxac.
Qaq ỹoqo'oye seuennata'a qome da qoneta 'Am Nataxala',
qom huaña ye 'alhua ye tala Jordán,
qataq da huaña aye qasoxonaxapi ye Hermón qataq ye Mizar.
7Nam qaỹoqchiguingui tocotpi maye huaña da qaỹa'axaỹa,
da l-lamaxa na la'auaxac na 'etaxat maye 'anamaq,
nache namaye aỹem quelec.
8Qalaxaye ye na'a'q nache Ñim Nataxala'
aỹem namaxa da lchoxonnataxanaxa,
qaq ye pe qalaq saishet da vi'iiguet da ỹo'onaxanaxac,
qataq da ñatameetacot Ñim Lo'onatac 'Enauacna
maye aỹem ỹanem da ica'alaxa.
9Qataq shenapega Ñim Lo'onatac 'Enauacna
maye aỹem mpaxattalec, sheeta':
«¿Ta'ainco' ye aỹem 'aucoua'ai?
¿Ta'ainco' da saquicotac
qataq da aỹem ipataqtañi na ñepa'aguenaxauapi?»
10Qataq ivira'alo naua ipi'ineqa ỹataqta seue't,
souaxat da lviraqtaxanaxac na ñepa'aguenaxauapi,
maye imauec ye na'a'q da aỹem inattac, 'eeta':
«¿Cam hueta'ago' ca 'Anatamnaxala'?»
11Qaq ¿ta'ainec taxa da seqalvi?
Qataq ¿ta'ainec taxa da huo'o da iuogoxo?
Ye da ñaquitaxac mashe sacheto'ot Ñim Lo'onatac 'Enauacna,
qaq Ñimaye nache shecto'ot da sho'oxoreetac.
Ñim Ñatamnaxala' qataq ica'alaxaqui.
