Da lyacỹaxac qataq da llo'oxoyec ye Sión
1Ñim Nataxala' ỹataqta 'amaqtaqaic,
qataq 'itchiguiñi da ño'oxonnataguec da huaña yem huaqta'a't nỹecpi,
maye lalamaxat Ñim Qanatamnaxala', qataq añim qui'itta nqasoxonaxa.
2Ỹataqta qaica ca 'ena'am da lyac ye lshequitcheguema
añi qasoxonaxa Sión da huetaña na loga't da sheu',
yemaye ỹo'ot da ntonaxac na netalec ana 'alhua.
Yem lalamaxat nỹecpi ñim lta'araic Nta'a.
3Ñim Lo'onatac 'Enauacna, hueta'a ñim nma' lta'araic ye Jerusalén,
Ñim Lo'onatac 'Enauacna nachaxan co'ollaxa
da nacheñi ñim qaica ca 'ena'am da ñe'eguenaxala'.
4Ỹoqo'oye huo'o co'ollaxa so nta'alpi ỹo'ot so laponaxac,
nache huaxaỹa't da qanqo'oneua'a yemaye,
5qalaxaye co'ollaq ila'a yi'iye huaqta'a't nỹecpi,
nache ỹataqta huo'o da la'aalaxa,
nache saỹaỹaten ca 'eetec nache datauec.
6Da lcolanaxa ỹataqta ỹalauat somayepi,
nache huo'o da nqui'ic, 'eeta'am ana 'alo da deco'otapigui'.
7Qataq 'eeta'am na la'at maye chegoxogue da yo'oxoñi,
da nlaxaañi ana notaxaquipi maye quelec na 'etaxat
maye lalamaqtepi na lma' ye Tarsis.
8Yi'iye huaqta'a't nỹecpi maye lalamaxat Ñim Qanatamnaxala',
Ñim Nataxala' maye Qaica ca Ỹaqalanapec,
qaq qomi' ỹataqta sauanaqchigui qataq nachera
da 'eetec naxa da qomi' qaỹa'axattapeguema.
Ñim Lo'onatac 'Enauacna nache 'eetai' qome naqa'en yi'iye Jerusalén.
9'Am Qanatamnaxala', naxa da souaqtaigui
na pa'auo añi atamnaxaqui maye 'aralamaqte,
qalaq tachigui qarhuel de'era 'arsoxoyec.
10'Am Qanatamnaxala',
'enauac na huetalec ana 'alhua 'am ỹo'oxoreetac,
cha'aye nachera da 'eetec da lataxac da 'are'enaxat.
Qataq 'auo'onataxana da 'ara'añaxac
da 'auo'ot da nalochiguiñi lataxac.
11Qaq ỹataqta ntootapigui' qome añi qasoxonaxa Sión,
qataq parenaxaatac qome da ntonaxac
na lma' ye huaqta'a't nỹecpi ye Judá,
souaxat naua ỹaỹamaqchiyiñi maye 'auo'o't.
12Qauconñeetecoto qome naua loiguiye añi qasoxonaxa Sión,
nache qaua'axacheetac qome naua nalloxolatel maye netaleguete añimaye,
13nache qaumichiñeetac qome na npaqtaxanaxatpi qataq na nma' lta'araicpi,
yaqto' ishet da qaua'axacheetapeguem qome
nam dalaxaicpi maye ñaq taỹa'a da ñiguiñipi.
14Da Ñim Qanatamnaxala', Ñimaye chochaq tatec.
Qaq Ñimaye nache 'eetai' qome da qomi' ỹauecta'agueta.
