Salmos 49

₁Qana'axaỹaxañiichigui qome de'era, qami' ỹotta'a't nhuo' le'ecpi

qataq qana'axaỹaxañiichiguiñi 'enauac qami' maye qoñiitalec ana 'alhua,

₂qami' sallaxanecpi qataq na choxoraqpi,

na 'añaxaicpi qataq na qaica ca ye.

₃Aỹem ñanoldec naua ỹa'aqtaqa ỹaanaxanaxaiqa,

qataq naua iuennataxaco ỹaanataxanaxaiqa.

₄Aỹem ñasaxarec qome naua na'aqtaqa ỹaanaxanaxaiqa,

qataq sa'axat na saqcha'a iuennataxacpi da ñaq qaivictapigui ana nvique.

₅¿Ta'ainco' taxa da huo'o ca icolanaxa,

da ivita da ana'c naua na'axa'te maye qauema,

qataq da aỹem coleesop da lle'etaxaloxo na ñepa'aguenaxauapi?

₆Nam pe'etega da lsallaxa,

qataq ño'oxoreetapigui na qalota lalamaxatpi,

₇namayepi saishet da nca'alaxatec ca lỹa,

qataq saishet da isheeten Ñim Lo'onatac 'Enauacna da yaqto' nca'alec camaye.

₈Cha'aye qaca aca anom aca nalotalec

da qaisheeten da nachaalataxac ca shiỹaxaua,

₉da yaqto' nache 'eetai' da nca'altauec,

qataq da nca'aleeguesop da nleuaxa.

₁₀Cha'aye 'enauac da ileu namayepi,

ivira'a na ỹaanaxanaxaic qataq na qaica ca ỹaỹaanapec,

nache ỹaqa'a ca no'ona'aguet da lsallaxa.

₁₁Na'aictoxo' namayepi da nanettalec da le'enaxat ca na'alhua,

qalaxaye añi huachiqui nachañi añi chochaq tatec da lanataqa',

añimaye nache tatec qome da huetangui.

₁₂Na'aictoxo' da lta'araic da lsallaxa ca shiỹaxaua,

qalaxaye saishet da nache 'eetai' da nca'altauec,

'eeta'am na shiguiỹac maye taỹa'a da ileu.

₁₃Qaq 'era da 'eetec da loga't na maiche mpe'etapeguela't,

qataq 'enauac na maiche ño'oxoreetapeguela't.

₁₄'Eeta'am ana qagueta namayepi da qaỹauecta'a añi huachiqui,

qaq de'era nleuaxa nache ỹauecta'a añimaye,

huaña nache nlaguiñi da lo'ocỹaxac da huetangui añimaye,

nache qaỹoqtalo naua 'onaxaiqa lma'ate lta'al,

qaq na no'on da lataxac nache ilo'ogue namayepi da ñaq nte'eta.

₁₅Qalaxaye Ñim Lo'onatac 'Enauacna

aỹem nca'alaxateeguesop qome da la'añaxac aña'añi huachiqui,

nache Ñimaye aỹem ỹauec qome.

₁₆Saishet qome da 'aue'elaxa da 'aulota'a ca huo'o da lsallaxa,

qataq da nquictasheguem na lqashelgaxa ca lma',

₁₇cha'aye da ivita da ileu nache qaica da huo'o ca ỹache,

qataq saishet da quetañi' de'era llo'oxoyec.

₁₈Na'aictoxo' da ỹataqta machiguiñi da ñaq nca'altauec,

qataq da ỹo'oxoreetac camaye na shiỹaxauapi souaxat da sallaxanec,

₁₉qalaxaye huo'o ca na'a'q da ỹe'eguelaxa

da ỹalecta'aguet so hua'au lta'alpi,

huaña nache saishet da qaltaq nauane' na yo'oqchiguiñi.

₂₀Ca ỹale saishet da nache 'eetai',

na'aictoxo' da ỹataqta sallaxanec,

camaye ileu 'eeta'am na shiguiỹacpi.