Salmos 6

₁'Am Nataxala', saishet qome da aỹem 'anlaxa

qom 'aunotac, qataq saishet da 'auauo'o

ca ñeuaxanaguec qom huo'o da 'arayeloxo.

₂'Am Nataxala', aỹem 'auchoxoren qome cha'aye qaica ca ỹa'añaxac.

'Am Nataxala', aỹem 'anataren qome cha'aye mashe iviloxol da ỹo'ocỹaxac.

₃Ỹataqta aỹem iviloxolaqchet da icolanaxa,

qaq 'Am Nataxala', ¿chaq laguio' da 'auanac da aỹem 'autauan?

₄Ña 'añe'eguelaq 'Am Nataxala', 'anca'alaxatec da ñachaalataxac,

ñaq aỹem 'anca'alaxatec cha'aye lta'araic da 'arsoxoyec.

₅Cha'aye ca mashe ileu qalaq saishet da 'am iuennatega,

qataq ca mashe huetangui aca huachiqui saishet da 'am ỹo'oxoreetac.

₆Aỹem ỹataqta ñasamiisop da ñenoinaxac,

'enauaque naua pesa'ache da ñeỹeetac,

nache naua ỹache' ỹataqta dapapta naqa'en ye imala'.

₇Da ñiqui'ic mashe 'omaleguete naqa'en naua ỹa'ai'te,

mashe nquictrañi da la'añaxa'c naua ỹa'ai'te

souaxat na ñepa'aguenaxauapi.

₈Ñaq aỹem qauỹocheelec qami' maye qauo'ocheetac na qauem,

cha'aye Ñim Nataxala' mashe hua'axaỹa da ñenoinaxac.

₉Ñim Nataxala' mashe hua'axaỹa da ñachoxonnaxac,

Ñim Nataxala' mashe ỹasateguet da ñeqouagaxaunaxac.

₁₀Qaq 'enauac qome na ñepa'aguenaxauapi

da huo'o da la'aloxo qataq lcolanaxa,

nache sanaỹaloxon da datauec, souaxat da la'aloxo.