Ñim Nataxala' nacheñi ñi nmit 'enauacna
1Ñaq aỹem 'anca'alaxatec 'Am Nataxala',
cha'aye nache 'am, da 'am ñimittaique
da aỹem 'ampaxattalec qataq aỹem
'ausoueeguesop qome nam aỹem icaatacpi,
2ñaq aỹem 'eltaxaneguet namayepi,
ten ỹataqta 'eeta'am na llonpi, ten qom aỹem
icolaxattac cha'aye qaica ca aỹem npaxaalec.
3'Am Nataxala' maye 'Am Ñatamnaxala',
¿negue'tom ca so'ot co'ollaxa?
¿Peta'a huo'o co'ollaxa ca so'ot qauem?
4¿Peta'a so'otec co'ollaxa ca qauem ca ñauochaxaua?
¿Qalqo' huetaiya' ñaqa'en ca ñepa'aguenaxaua maye qaica ca ỹasouaxat?
5Qaq da nache 'eetec de'era, qaq ishet da 'aua'aqta'a
na ñepa'aguenaxauapi da aỹem icanapec,
nache ivitta'a da aỹem ivi', nache aỹem ỹauogoleelec na 'alhua,
qataq hueta'aguet naqa'en na 'alhua da ỹa'amaqchec.
6¡Ña 'anachaañi, 'Am Nataxala', ña 'aualemata,
nache 'auataỹa'aguet da lalemataic na ñepa'aguenaxauapi!
¡Ñaq 'anlouec 'Am Ñatamnaxala', nache 'auo'ot ca ỹaỹamaqchiguiñi lataxac!
7Qaq nache qonetasheguema qome na pa'asheguem da 'aulo'ogue namayepi,
nache lapona't qome da 'am dataỹot na ỹotta'a't nhuo' le'ecpi.
8'Am Nataxala', 'am maye 'anmit qome na ỹotta'a't shiỹaxauapi,
qaq da aỹem 'anmit qalaq 'aulochigui da no'on ỹataxac,
qataq 'aulochigui da qaica ca sasouaxat.
9'Am maye 'Aro'onatac 'Enauacna maye nalochiguiñi da 'arataxac,
maye 'aumeteeta'ape naua nhuennataxaco qataq añi nquiyaqte,
ñaq imeuo 'anqa'en da lle'etaxaloxo na qauemaicpi,
qalaxaye saishet qome da 'auraxanai' ca no'on da lataxac.
10Ñim ipaqtaxanaxat nacheñi Ñim Lo'onatac 'Enauacna,
Ñim nca'alaxatec cam ỹaỹamaqchiguiñi da lquiyaqteỹaxac.
11Ñim Lo'onatac 'Enauacna,
nacheñi Ñim nalochiguiñi da lataxac da huo'o ca nmit,
Ñimaye 'enauaque naua na'axa'te
da sa ihuooneguet na qauemaicpi.
12Ca qauemaic da sa naralaxat da lhuennataxa,
nache Ñim Lo'onatac 'Enauacna iqueuoc qome ca lainec,
qataq iqataxanai' ca lchecnec,
13qataq mashe lhuotta aca 'ettaigui lchecna,
qataq mashe iqataxanai' na dalaataxanapec lo'ogoxonaxatpi.
14Ña qauloỹa na hualaxaiguet na qauemsat,
nam hualaxaiguet da ñe'etaxaloxo
namayepi deco'oic qome da shepegaxanaxac,
15qataq ỹo'ot aca qaỹoqchiguingui lshere,
qalaxaye maiche tangui qome aca'aca maiche lshere.
16Qaq nam qauem maye ỹo'ottac
maiche talec qome namayepi,
qataq maiche que'emaxam qome da l-loquiaxac.
17Aỹem qalaq sho'oxoren Ñim Nataxala',
cha'aye Ñimaye nalochiyiñi da lataxac naua ỹo'o't,
qataq so'on da le'enaxat Ñim Nataxala', maye Nataỹaña 'enauacna.
