Salmos 61

₁'Am Ñatamnaxala', ñaq 'aua'axaỹa da ñachoxonnaxac,

qataq 'auqocha'a da ñatamnaxac.

₂Aỹem soota'a na pa'atec ana 'alhua da seỹaxaatac,

cha'aye añi iquiyaqte mashe qaica ca la'añaxac,

qaq aỹem 'anca'alaxatec qome, nache aỹem 'aỹa'analec aca qaỹoqotcheguemec coma',

₃cha'aye nache 'am maye 'am ỹe'eguenaxala'.

'am 'eeta'am ñaqa'en aca nalloxolate qaramta,

maye mpaxateguet na ñepa'aguenaxauapi.

₄Cha'aye ñeshetaique da nache 'eetai' qome da sootaña ñi 'arma',

nache aỹem mpaxattaleguete naua 'araua't.

₅Cha'aye 'Am, Ñatamnaxala',

'am 'aua'axaỹalo co'ollaxa naua san' ỹa'aqtaqa,

qataq aỹem 'aỹa'anem na 'auqataxaatapigui' da 'aỹa'anem,

na huo'o naq 'enec naqa'en da 'are'enaxat.

₆Ñaq 'aỹa'anem qome ne'ena nta'a da qaỹoqtec da nachaalataxac,

qaỹoqteguelo 'anqa'en naua vi'iye da nachaalataxac,

₇qataq da lo'onataxanaxac da nta'a,

nache 'eetai' qome da 'am hueta'aguet.

Qataq da 'arsoxoyec qataq naua 'eesora 'ara'aqtaqa mpaxattaleguete qome.

₈Yaqto' nache 'eetai' qome da so'ootac na no'onec,

da sho'oxoren da 'are'enaxat,

qataq sepacteleguete naua ỹa'aqtaqa maye san'

'enauaque naua na'axa'te.