Da natamnaxac so ỹa'axaiquiolec
1'Am Nataxala',
'am she'eguenot da yaqto' aỹem 'ampaxattalec,
saishet qome da 'auo'ot da ỹa'aloxo.
2Cha'aye ỹataqta no'on da 'arataxac,
nache aỹem 'anca'alaxatec qataq aỹem 'ampaxattalec,
aỹem 'aua'axaỹa qome qataq aỹem 'anca'alaxatec.
3Aỹem 'ampaxaalec qome qoneta'am aca coma' maye ỹe'eguenaxaqui,
acam coma' maye nache 'eetai' naxa da ỹe'eguenaxaqui.
Ỹoqo'oye 'aỹa'an qome ca 'ara'aqtac da aỹem 'anca'alaxatec,
cha'aye 'am qoneta'am aca coma' maye ỹe'eguenaxaqui.
4'Am Ñatamnaxala',
ñaq aỹem 'anca'alaxateeguesop da lhuaqỹaxac na qauemaicpi,
qataq da la'añaxac na laataxanaxaicpi,
qataq loquiaxaicpi.
5Cha'aye 'Am Nataxala', nache chegoqchiguiña,
co'ollaq ñaq aỹem nsoqolec da ỹataqta 'am ipe'et qataq aỹem 'antela'a.
6Cha'aye co'ollaq ñaq sootaigui na lauel aso ỹate'e,
nache nale'ena da 'am sepe'etega.
Qaq nache 'am maye ñañiguiñi 'anqa'en,
qaq ỹoqo'oye nache 'eetai' qome da 'am sho'oxoreetac.
7Qaq ỹataqta qalota co'ollaxa na aỹem ỹa'aalac,
qalaxaye 'am maye nache 'am ỹe'eguenaxala'.
8Ỹoqo'oye 'enauac ye na'a'q da 'am sho'oxoreetac,
qataq da sa'axattac da 'ayo'oxoyec.
9Qaq saishet qome da aỹem 'auo'otan qom mashe aỹem ỹa'axaiquiolec,
qataq saishet da aỹem 'aualat qom mashe qaica ca ỹa'añaxac.
10Cha'aye na aỹem ipa'agueetacpi
qauema naua la'aqtaqa da aỹem detaqtega,
qataq huaxaỹa't da aỹem detaqtapigui.
11Nache 'eeta': «Ña qaucañiỹapec qataq qauacoñiiua'a,
cha'aye Ñim Lo'onatac 'Enauacna mashe ca'ai,
nache qaica ca ishet da nca'alaxatec.»
12'Am Ñatamnaxala', saishet qome da aỹem qaỹoqtaique 'anqa'en,
sa 'anaỹaloxon qome da 'auanac da aỹem 'autauan.
13Ñaq na'aloxoota'acra' 'anqa'en na aỹem ipa'agueetac,
ña 'auauo'o qome da na'aloxonaxac
na huotaique da aỹem ỹo'otec ca qauem.
14Qaq aỹem qalaxaye nache 'eetai' qome da 'am ñaquitto'ot,
qataq nache ñequigaxattauec da 'am sho'oxoreetac,
15qaq 'enauac qome ye na'a'q da 'am sa'axattac,
da nache 'am da qomi' 'anca'alaxatrec,
qataq qomi' 'anema da ỹaỹamaqchiguiñi lataxac.
Qaq na'aictoxo' da sa sevi' da saỹaten ca lcata damaye.
16Qalaxaye sa'axattac qome na lta'araicpi maye 'auo'ot 'Am Nataxala',
sa'axattapeguec qome da nachaq 'amta da no'on da 'arataxac.
17'Am Ñatamnaxala',
nache chegoqchiguiña co'ollaq ñaq aỹem nsoqolec
da aỹem 'auapaxagueetac,
qaq nache ivitta'a nagui da sa'axattapeguec
na 'auo'otpi maye ỹo'ot da na'aalaxa.
18'Am Ñatamnaxala',
saishet qome da aỹem 'aualat,
na'aictoxo' da mashe aỹem ỹa'axaiquiolec,
qataq ỹapagaq na iqaic cha'aye sauotaique
da shecto'ot da sa'aqtaxaateguem
da lta'araic 'ara'añaxac ne'ena shiỹaxauapi,
qataq ca ñaq natauo maye chegoxoguetpi namayepi.
19'Am Atamnaxala', da ỹaỹamaqchiguiñi 'arataxac
ỹataqta iviro'ot na piguem,
'Am Atamnaxala' ỹataqta lta'araic na 'auo'otpi co'ollaxa,
qaq ỹataqta qaica ca 'am 'eeta'am.
20Qaq na'aictoxo' da qalota co'ollaxa na aỹem 'auauanaqchetec,
que'eenaxaguesat qataq na sa ỹaỹamaxañisat,
qalaxaye qaltaq aỹem 'auachegoxotchiguiña qome,
na qaỹoqchiguiña ana 'alhua da qaltaq aỹem 'anca'alaxatec,
21qataq 'anquigaxatec qome da ỹa'amaqchec,
qataq 'avi'eguelaxalec da aỹem 'aua'añaqchet.
22Qaq aỹem 'am sho'oxoreetac qome,
sauota'a ana nvique arpa qataq ana salterio,
so'onaxaatalec da 'aupacchiguilo naua qona'ape,
'Am Ñatamnaxala' maye qui'itta Natamnaxala' na Israel le'ecpi.
23Ỹataqta samachiguiñi da 'am so'onaxaato'ot,
cha'aye 'anca'alaxatec da ñachaalataxac.
24Qataq 'enauac ye na'a'q da sa'axattac,
da ỹataqta nalochiguiñi 'arataxac,
cha'aye na nmittaique da aỹem ỹo'otec ca qauem,
ỹataqta nsomaxana't qataq huo'o da la'aloxo.
