Salmos 72

₁'Am maye 'Aro'onatac 'Enauacna 'aỹa'anem qome

na nta'a, da ỹaỹamaqchiguiñi qataq nalochiguiñi 'arataxac.

₂Yaqto' da nmit na 'aralamaxat nhuo' le'ecpi qataq na choxoraqpi,

qalaq ỹo'otec da ỹaỹamaqchiguiñi qataq nalochiguiñi lataxac.

₃Qataq ana qasoxonaxapi ỹanem qome ca nlagaxayec na nhuo' le'ecpi,

qataq ana comarelecpi ỹan ca no'on nataxac.

₄Qataq ca nta'a ỹo'otec qome ca nalochiguiñi lataxac na choxoraqpi,

qataq nca'alaxatec na llalaqpi na huo'o da lhuenaxanaxa,

qataq huetaiya' naqa'en na sa iyacnapec namayepi.

₅Qaq que'eca nta'a nache 'eetai' qome,

da huo'o naq 'enec naqa'en da qoneta,

qom ñaq huo'o añi nala' qataq ñi ca'agoxoic.

₆Qataq 'eeta'am qome na auot da ipettalec ca nanaxanaqa',

qataq na sheue da ipettalec ana 'alhua.

₇Qataq caua na'axa'te maye huaiguilo da lo'onataxanaxac,

da nta'a ỹataqta no'on qome da lataxac,

qataq chochaq huañi da nlagaxayec,

choche ivitta'a da qaica so ca'agoxoic.

₈Qataq imata'a't qome da ilo'ogue ana auaxai,

chegoqchiguiña ye tala Éufrates,

nache ivitta'alo naua loga'te ana 'alhua.

₉Qataq nañanot qome camaye na mpa'aguenaxauapi,

maye netalec ye toolec 'alhua.

₁₀Qataq na nta'alpi maye lma' ye Tarsis

qataq nam netalec ana ỹaqauga 'alhuapiole,

qataq na nta'alpi maye lma' ye Sabá qataq ye Sebá,

ndotega qome camaye na lachetaqtaxanaxatpi.

₁₁Qataq 'enauac na nta'alpi ỹa'aroto naua l-llecte camaye,

qataq 'enauac na ỹotta'a't shiỹaxauapi do'onataxanot qome.

₁₂Cha'aye que'eca nta'a nca'alaxatec qome,

ca choxoraq maye iỹaxaataique ca ntaunaguec,

qataq ca deuenaxaatac maye qaica ca itauan.

₁₃Qataq ichoxoren ca choxoraq qataq ca deuenaxaatac,

qataq nca'alaxatec da nachaalataxac na choxoraqpi.

₁₄Qataq nca'alaxateeguesop ca ipataqtañi qataq saiyacnapec namayepi,

qataq da nloquiaxanataguec,

cha'aye ỹaỹaten da ỹataqta huo'o naq naigui da nachaalataxac.

₁₅Qaq nache 'eetai' qome da nca'altauec que'eca nta'a,

qataq qoỹanem na lcat oro maye chegaqa'a ye Sabá,

qataq saishet qome da vi'iiguet da qanatameetalec,

qataq 'enauaque naua na'axa'te da qaỹasaqtapeguelec da nchoxonnataguec.

₁₆Qataq chochaq huañi qome na trigo 'enauac ana 'alhua,

qataq imattalec qome na trigo na pa'asheguem ana qasoxonaxapi.

Qataq ana ala ñaxat qome 'eeta'am na huetalec ye Líbano,

qataq ỹataqta qalota ana ala, 'eeta'am

ana huoue maye no'onaxa lashe.

₁₇Qataq nache 'eetai' qome da sa imeuo da le'enaxat,

qataq da na'aqtaguec nache 'eetai' qome 'eeta'am añi nala'.

Qataq chegoqchigui qome da le'enaxat camaye,

da 'enauac na ỹotta'a't shiỹaxauapi ỹaconeguet da nchoxonnataguec,

qataq 'enauac namayepi da ỹamata'ac da machiguiñi.

₁₈Ỹataqta qaỹo'oxoren qome Ñim Lo'onatac 'Enauacna,

Ñim Nataxala' maye Natamnaxala' na Israel le'ecpi,

cha'aye nacheñita ỹo'ot na lta'araicpi maye ỹo'ot da na'aalaxa.

₁₉Nache 'eetai' qome da no'on da ỹo'oxoraic le'enaxat.

Qataq 'enauac ana 'alhua imattalec da llo'oxoyec.

¡Aja' nache 'eetec!

₂₀Qaq 'ena na tachiguiña da natamnaxac so David, maye llalec so Yesé.