Da atamnaxac da yaqto' qanca'alaxatec na nhuo' le'ecpi
1'Am Ñatamnaxala', ¿ta'ainco' da qomi' 'auala't?
¿ta'ainco' da ỹataqta 'eroigui da 'aralemataic,
da 'aualemataỹa ana qaguetapi maye maiche 'arhuateguishe?
2Ñaq 'auennata'a qome na 'aralamaxat nhuo' le'ecpi,
maye 'arca'aguishecpi co'ollaq la'atchiguiñi na,
nam 'arca'alaqtacpi co'ollaxa da yaqto' 'aralamaxat,
qataq 'auennata'a qome añi qasoxonaxa Sión maye 'aranataqa' co'ollaxa.
3Ñaq 'auanac qome da 'aumeten
ana 'aralamaqte atamnaxaqui maye mashe nlachiguiñi,
'enauac anamaye da nlachiguiñi naqa'en na 'am ipa'agueetacpi.
4Qaq na 'ampa'aguenaxauapi do'onaxaatalec da lauegaxanaxac,
da hueta'a añi atamnaxaqui maye 'aralamaqte,
nache ỹanalec ana la'anaxanaqtepi maye chegaqauec,
5qataq 'eeta'am ca ldenaxaic da netaigui na aviaq,
da ỹauota'a aca nqachepe da iquesoqtac ana qo'oipaqpi,
6nache irolec aso qachepe qataq aso ntoqnaxanaqte,
da nlaxatchiguiñi 'enauac so qo'oipaqpi maye llo'oxoraxatpi.
7Ime, nache ỹavigaxat so npe'l maye 'aralamaxat,
qataq ỹataqta ỹe'enai' añi atamnaxaqui maye 'aralamaqte,
ivitta'a da huetaiya' naqa'en.
8Nache da lquiyaqteỹaxac, 'eeta':
«ỹataqta nlachiguiñi ñaqa'enaq.»
Nache ỹavigaxat 'enauac aso atamnaxaquipi,
maye netalec ne'ena 'alhua.
9Qaq mashe sa selaqa'a da netasheguem ana qara'anaxanaqtepi,
qataq qaica ca na'aqtaxanaxanec qataq sa saỹaanaq ca ivitta'ague qome de'era.
10'Am Atamnaxala',
¿chaq laguio' da vi'iiguet da qomi'
isheueeta'ape na depa'aguenataxaatacpi?
¿Peta'a nache 'eetai' qome da isheueetac
da 'are'enaxat namayepi?
11¿Ta'ainco' ye 'aña'axaneuo na 'arhuaq?
¿Ta'ainco' ye choche 'ansoxoreuo naua 'arhua'q?
12Qaq 'Am Atamnaxala', nache 'eetai' co'ollaxa
soua hua'au' vi'iye da nache 'Am Ita'a.
Qaq nache 'am da 'anda'a da lca'alaxa na huetalec ana 'alhua.
13'Am 'aucolaxachigui co'ollaxa aso auaxai,
'aurolec da 'ara'añaxac, qataq 'aulaxachigui na lqaicpi
so lta'araic shiguiỹacpi maye auaxai le'ecpi,
14qataq dapaxaguet 'anqa'en na 'alhua so lqaicpi,
so shiguiỹac lta'araic le'enaxat Leviatán,
nache 'aỹa'anem da aloq 'anqa'en na shiguiỹacpi,
maye huetauga ye toolec 'alhua.
15'Am 'auo'ot co'ollaxa na mpaxaatasheguem 'etaxat,
qataq na talapi qataq deqaqa 'anqa'en na tala maye saq 'emapec.
16'Am 'aralamaxat ye na'a'q qataq ye pe,
qataq 'auo'ot co'ollaxa ñi ca'agoxoic qataq añi nala',
17qataq 'aua'a'n co'ollaxa naua loga'te ana 'alhua,
qataq 'auo'ot ye cotap qataq ye no'omaxa.
18Ña 'auennata'a qome 'Am Nataxala',
da na 'am ipa'agueetacpi ỹataqta 'am ỹe'enai',
qataq na shiỹaxauapi maye qaica ca ỹaỹaanapec,
ỹataqta qauema naua la'aqtaqa da 'am detaqtega.
19Saishet qome da 'aỹa'anem na shiguiỹacpi,
dam sa da'añi nachaalataxac na 'aralamaxatpi,
maye 'eeta'am ca qoto' qataq saishet qome
da tatec da 'aucoua'ai da nque'eenaxac na 'aralamaxat nhuo' le'ecpi.
20'Auennata'a qome da 'anaỹamaxataxac,
cha'aye 'enauaque naua nma'ate ana'ana 'alhua,
mashe nlaxaleguete da loquiaxac.
21Qaq saishet qome da ỹe'eguelaxa da huo'o ca la'aloxo,
nam qaica ca nyacnataguecpi, nacherata da ỹo'oxoreetac qome
da 'are'enaxat ca choxoraq, qataq ca huo'o da lhuenaxanaxa.
22'Am Ñatamnaxala', 'anachaañi qome,
ña 'ampaxaalec da qoneta,
'auennata'a da 'enauaque naua na'axa'te
da 'am isheueetac na qaica ca ỹaỹaanapec.
23Saishet qome da 'aucoua'ai da la'alaxac na 'am ipa'agueetacpi,
cha'aye da lliỹa't la'alaxac namayepi ỹataqta nquictauec.
