Salmos 75

₁'Am sanaxam da qana'achec 'Am Atamnaxala',

'am sanaxam da qana'achec,

cha'aye sa qaỹapeque da 'are'enaxat

qataq so'onaqtac da 'ayo'oxoyec, maye ỹo'ot da na'aalaxa.

₂Ñim Nataxala', 'eeta':

«Qom ivita ca na'a'q maye sacooteua'a,

da so'ot ca nalochiguiñi lataxac,

₃nache cholaxan ana 'alhua qataq 'enauac na netalec anamaye,

cha'aye nachaỹem da ñelletañi anamaye.»

₄Nache na na'amqaanaxaicpi shenapega da: «Saishet da na'amaqten»

qataq na qauemaicpi shenapega da: «Saishet da ño'oxoren»

₅qataq «saishet da ỹo'oxoreetac da la'añaxac,

qataq saishet da na'amaqten da detaqtac.»

₆Cha'aye da 'amqaanaxac,

saishet da chegaqa'ague da nala' lliguisheguem huo'otaq da avit,

huo'otaq ye toolec 'alhua huo'otaq aye qasoxonaxapi,

₇cha'aye Ñim Lo'onatac 'Enauacna nacheñi ñi nmit 'enauacna,

nache ishet da huo'o ca huetaiya' naqa'en,

qataq ishet da huo'o ca nauaxaỹaxaasheguem.

₈Ñim Nataxala' nasoqta'a aso ỹomaxaqui,

huetagui na lataxa maye ỹotta'a't na lalegue

qaq Ñimaye qom icorec somaye,

nache 'enauac na qauemaicpi maye huetalec ana 'alhua,

nỹomigui qome nache ivitta'a da ỹauta.

₉Qalaxaye aỹem nache 'eetai' qome da sa'axattac

Ñim Natamnaxala' so Jacob,

qataq sho'oxoreetac Ñimaye da so'onaxaatac.

₁₀Cha'aye Ñimaye ilaxachigui qome da la'añaxac na qauemaicpi.

Qalaxaye nquiguisheguem naqa'en da la'añaxac ca no'on da lataxac.