Ñim Lo'onatac 'Enauacna ỹataqta huegaxanaxaic
1Na lma' ye Judá ỹataqta ỹauattoota Ñim Lo'onatac 'Enauacna,
qataq na lma' ye Israel ỹataqta ỹo'oxoraq naqa'en da le'enaxat Ñimaye.
2Qaq ye Jerusalén nache naña añi atamnaxaqui
maye lalamaqte Ñimaye, yem lanataqa' maye naña ye Sión.
3Qaq nache huaña yemaye da ỹacagaxachigui
aso checnapi, checnecpi, npaqtaxanaqtepi, ỹeelonecpi,
qataq 'enauac so no'ogoxonaxatpi.
4'Am, ỹataqta 'am ỹo'oxoraic,
da 'ara'amaqchec qalaq napacalec
ana choche tatec qasoxonaxapi.
5Som ỹataqta 'añaxaicpi qalaq ỹataqta qanhuotta,
som ỹataqta 'añaxaicpi qalaq sa ỹañoxot
da huo'o ca ỹo'ot, souaxat da do'ochaañi.
6Qaq 'am maye Natamnaxala' so Jacob, co'ollaq 'aviraxato'ot somayepi,
nache saishet da deraỹapigui' aso laigonapi qataq so lalo caipi.
7Cha'aye ỹataqta 'am chaqaic,
¿qaq negue'tom ca ishet da nachattañi da 'am nachatto'ot,
da ivita da 'eroigui da 'aralemataic?
8Qaq chegoqtot na piguem da 'auachaxan
da nalochiguiñi lataxac da huo'o ca 'anmit,
nache ana 'alhua huo'o da lcolanaxa nache ỹataqta ỹe'emaqtom.
9'Am maye 'Aro'onatac 'Enauacna,
da ivita da 'anachaañi da 'auo'ot ca nalochiguiñi lataxac
da yaqto' 'anca'alaxatec 'enauac na choxoraqpi maye huetalec ana 'alhua.
10Da lalemataic ca shiỹaxaua qalaq nmeneguet
da 'año'oxonnataguec, ivira'a ca saq 'amaqtaq
lalemataic qalaq ỹo'ot da 'ayo'oxoyec.
11Qami' qaỹa'añiỹot ca qara'aqtaqui Ñim Nataxala',
maye Qanatamnaxala'ai, qalaxaye qaupaquiichigui.
Nataqa'en qami' maye qoñiitaña na saqaỹapeque,
qandoiua'a qome aca qarachetaqtaxanaqche,
ñim ỹataqta huo'o da lchec.
12Cha'aye Ñimaye ishet da nqat da nachaalataxac
na llalaqpi na nta'alpi, qataq ỹo'otec
da lcolanaxa na nta'alpi maye netalec ana 'alhua.
