Salmos 77

₁Ỹataqta ña'axannec da ivilỹaxac

da seỹaxanot Ñim Lo'onatac 'Enauacna,

yaqto' Ñimaye ishet da aỹem hua'axaỹa.

₂Da huo'o da ỹaquicoxo qalaq ñimittaique Ñim Nataxala',

qataq sachaxaato'oto naua ihuaxaye da ñeqouagaxaueetac ye pe,

qalaxaye sa sanata ca ỹo'ot da ỹamaxayec.

₃Qaq naxa da tachigui ye iuel Ñim Lo'onatac 'Enauacna, nache ñeỹeetac

da seuennataxaatac qalaq qaica ca ỹa'añaxac.

₄'Am Nataxala' ỹataqta qaica 'anqa'en ca ỹo'ochaxa,

qataq qaica ca ñaỹanqa', ivira'a da saishet da setaqa.

₅Qaq huo'o naxa da tachigui ye iuel soua hua'au' na'axa'te,

qataq soua hua'au' vi'iye,

₆qataq tachigui naxa ye iuel da so'onaxaatac ye pe,

nache seuennataxaatapeguelec de'era,

nache ñenattapeguela't, sheeta':

₇«¿Peta'a chochaq tatec qome da denotac Ñim Nataxala',

nache saishet da qaltaq ỹe'eguelaxa da qomi' nqouagueeque?

₈¿Mashe imeuo peta'a da lsoxoyec?

Qataq ¿mashe imereuo peta'a naua ỹa'n la'aqtaqa co'ollaxa?

₉Ñim Lo'onatac 'Enauacna,

¿peta'a mashe icoua'ai da lqouagaxanaqtaic?

¿Peta'a ỹataqta dalemata Ñimaye, nache saishet da huo'o ca ichoxoren?»

₁₀Qaq nagui da seuennataxaatac qalaq

ỹataqta huo'o da lqui'ic ñaqa'en da Ñim Nataỹaña 'enauacna

saishet da 'eeta'am so hua'autec lataxac

da qomi' ilo'ogueta.

₁₁Qaq nacherato' da seuennate,

nam qaica ca 'ena'am da llo'oxoyec maye ỹo'otpi Ñimaye,

nam ỹo'otpi co'ollaxa soua hua'au' vi'iye.

₁₂Qataq seuennataxaalec 'enauac nam ỹo'otpi co'ollaxa Ñimaye,

qataq sa'axatec 'enauac qome damaye.

₁₃'Am Atamnaxala', ỹataqta qui'itte' naua 'aro'onataxanaxaco,

¿negue'tom ca lỹa Atamnaxala' da 'eeta'am da 'ara'amaqchec?

₁₄'Am maye 'Aro'onatac 'Enauacna

nache 'am da 'auo'ot na qaica ca 'ena'am da llo'oxoyec,

qataq 'auauattonaxanaxanec co'ollaxa da 'ara'añaxac,

na ỹotta'a't shiỹaxauapi ana 'alhua.

₁₅Qataq 'auauota'a co'ollaxa de'era 'ara'añaxac,

da 'anca'alaxatec na 'aralamaxat nhuo' le'ecpi,

nam llalaqpi so Jacob qataq so José.

₁₆'Am maye 'Aro'onatac 'Enauacna,

co'ollaq 'am ilo'ot na 'etaxat nache huo'o da lcolanaxa,

qataq cholaxan na 'etaxat maye ỹataqta qaỹoqchiguingui,

₁₇nache na lo'oc na piguem anacot na auot,

qataq ỹalachigui na piguem,

qataq hueteguelo na lqashelgaxa.

₁₈Nache qaỹa'axaỹa na lalataxa Ñimaye,

chemaqtapoigui ana daua'ache,

nache ana 'alhua yo'oqchiguiñi souaxat na lqashelgaxa,

nache ana 'alhua deraỹapec souaxat na nacholaxanaxa.

₁₉Nache 'auo'otegue so ñec huangui aso auaxai,

nache 'aua'axasoxoolec na qalota 'etaxat,

qalaxaye qaica da huo'o ca ỹanata so lliguiyiñi naua 'arapia'ate.

₂₀Qataq 'auauecta'aguet na 'aralamaxat nhuo' le'ecpi,

'eeta'am 'anqa'en ana nlo qagueta,

'auachegoxotchiguilo soua Moisés qataq so Aarón.