Salmos 78

₁Qami' ỹalamaxat nhuo' le'ecpi,

ỹataqta qauloỹeeguet qome da ỹapaxaguenataxanaxac,

ỹataqta qana'axaỹaxañiichigui de'era shenapec.

₂Aỹem setaqa qalaxaye sauota'aisalo naua ỹaloqnaxanaqa'ate,

ñanoldec naua na'aqtaqa maye saqcha'alo,

maye huetoiguilo soua ỹoxoguelo vi'iye.

₃Nam sa'axasoqchiguilo co'ollaxa qataq mashe saỹatena'q,

nam qomi' da'aqtaxaatapeguema som qarta'alpi,

₄naamaye saishet qome da soxotaqtaisopa nam qoyalaqpi,

sa'aqtaxanaxam nataqa'en cam ñaq naỹa'acna,

da ño'oxonnataguec Ñim Nataxala',

da la'añaxac qataq nam ỹo'ot da na'aalaxa maye ỹo'otpi co'ollaxa.

₅Ñimaye lapaxañi co'ollaxa da llec na la'aqtacpi da yaqto' ỹanem so Jacob,

qataq na lqataxacpi da yaqto' ỹanem so Israel,

nache ỹamaxalec so hua'au qarta'alpi da ỹapaxaguenec na llalaqpi.

₆Yaqto' cam ñaq natauo ishet da ỹaỹaten damaye,

qataq cam llalaqpi maye ñaq taỹa'a da ñiguiñi,

nataqa'en ỹapaxaguenec qome damaye cam llalaqpi,

₇yaqto' ỹataqta ỹauo'o da naquitaxac Ñim Lo'onatac 'Enauacna,

nache saishet da icoua'ai nam ỹo'otpi Ñimaye,

qataq ỹataqta ỹalaxalec na lamaxasoxonaxacpi.

₈Yaqto' saishet da 'eeta'am som hua'au chegoxoguetpi,

maye sa ỹalaq qataq qaica ca ỹaỹaanapec,

saishet da ỹataxalec da lquiyaqteỹaxac

qataq naua lhuennataxaco, som shiỹaxauapi

maye saishet da ỹoqta quetegue Ñim Lo'onatac 'Enauacna.

₉Na maiche nhuo' le'ecpi maye chegoxoguet so Efraín,

maye na'atchiguiñi na lo'ogoxonaxat

qataq na lchecnecpi qataq ana lchecnapi,

qalaq namayepi datauec so na'a'q maye huaigui so loquiaxac.

₁₀Saishet da ipaguelec da la'aqtac

co'ollaq naỹamaxate' Ñim Lo'onatac 'Enauacna

qataq saishet da ỹalaxalec da lapaxaguenataxanaxac Ñimaye.

₁₁Qataq icoua'ai na ỹo'otpi co'ollaxa Ñimaye.

Nam qaica ca 'ena'am da llo'oxoyec maye ỹachaxana namayepi.

₁₂Ñim Lo'onatac 'Enauacna ỹo'ot co'ollaxa

nam ỹo'ot da na'aalaxa ỹauaachigui naqa'en so qarta'ailpi

huaña ye 'alhuapi ye Soán maye huaigui ye Egipto.

₁₃Ñimaye icolaxachigui co'ollaxa na 'etaxat aso auaxai,

qataq qaỹa'axasoxoolec naqa'en asomaye,

qataq vi'iiguet naqa'en na 'etaxat 'eeta'am na mpaqtaxanaxat.

₁₄Ye na'a'q qalaq ỹauecta'aguet naqa'en somayepi so lo'oc na piguem,

qataq ye pe qalaq ỹauecta'aguet naqa'en na le'eraxa so norec.

₁₅Qataq huaña ye toolec 'alhua da ipoxoỹaxachigui aso coma',

nache ỹanem somayepi da nỹomigui se'eso qalota 'etaxat.

₁₆Ñim Lo'onatac 'Enauacna ỹachegoxottoigui

so coma' so la'auaxac na 'etaxat, maye 'eeta'am na tala da la'auataxa.

₁₇Qalaxaye somayepi co'ollaxa queto'ot da ỹo'ottac

na saỹaỹamaxarenpi Ñim Lo'onatac 'Enauacna,

qataq sa ỹalaxaguet Ñim Nataỹaña 'enauacna

co'ollaq huaña ye toolec 'alhua.

₁₈Qataq ỹe'eguen Ñimaye,

nache iỹaxaataique ca nallec maye nshetaique.

₁₉Nache detaqtega Ñimaye, 'eeta':

«¿Peta'a isheto' Ñim Lo'onatac 'Enauacna

da ỹo'ot ca nquia'axac da huaña ne'ena toolec 'alhua?

₂₀Qaq 'eesa co'ollaxa da Ñim Lo'onatac 'Enauacna

ipoxoỹaxachigui aso coma' qataq chegaqaigui

naqa'en so la'auaxac 'eeta'am na tala,

nache ipaxaalec naqa'en ana 'alhua,

qalaxaye, ¿isheto' peta'a da ỹan ca nallec?

qataq ¿isheto' peta'a da ỹanem ca lapat ne'ena lalamaxat nhuo' le'ecpi?»

₂₁Nache Ñim Nataxala' co'ollaq hua'axaỹa de'era nache dalemata,

qaq de'era lalemataic 'eeta'am ca norec,

da dalemataỹa so Jacob.

₂₂Souaxat da saishet da pi'iỹa'a Ñim Lo'onatac 'Enauacna,

qataq sa ỹa'amaqten da ltaunaxanaxac Ñimaye.

₂₃Qalaq ñaqaiyeta Ñim Lo'onatac 'Enauacna

ỹamaq co'ollaxa so lo'oc na piguem

qataq ỹauatoigui ca lasom na piguem,

₂₄nache talec naqa'en so lalamaxat nhuo' le'ecpi so nallec,

qataq so trigo piguem le'ec da yaqto' deque'e naqa'en somaye.

₂₅Nache so shiỹaxauapi chec so nallec maye aloq na 'añaxaicpi.

Ñim Lo'onatac 'Enauacna ỹanem da lquia'axac choche huañi naqa'en.

₂₆Ñimaye ỹauota'a da la'añaxac da anacot na la'at,

chegaqa'ague naqa'en da yo'oxoñi qataq da la'añaxa,

da ỹasheerelec naqa'en na 'alhua.

₂₇Nache 'eeta'am na 'etaxat da talec naqa'en

na lapat se'eso maiche lalamaxat nhuo' le'ecpi,

nataqa'en talec na qalota maỹopi,

'eeta'am ye lcata na lsoche na 'alhua aso auaxai.

₂₈Ñim Lo'onatac 'Enauacna tatelec naqa'en so lanataqa' somayepi,

nache coleesopa naua naloteugalo naua lanataxaqui'.

₂₉Nache deque'etac somayepi ivitta'a da comaraxaicpi,

nache Ñim Lo'onatac 'Enauacna ipacchigui

naqa'en da 'eetapeguec somayepi.

₃₀Qalaxaye co'ollaq ñaq saxanaxa da nme de'era lquia'axac lamaic,

ñaq huetaigui na alap na aloq,

₃₁nache da lalemataic Ñim Lo'onatac 'Enauacna talec naqa'en somayepi,

nache ỹalauat so ỹalleppi maye ỹataqta 'añaxaicpi.

Nache ileu naqa'en so ỹataqta no'on ỹalleppi Israel le'ecpi.

₃₂Qalaxaye ñaqaiyeta namayepi qaltaq ỹe'eguelaxalec

da ỹo'ot na lasouaxashetpi, saishet da ỹa'amaqte'n

naua qaỹa'aalaque ỹo'o't Ñim Lo'onatac 'Enauacna.

₃₃Qaq ỹoqo'oye Ñim Lo'onatac 'Enauacna

ỹo'otec da saqaỹauec ye loga't da nachaalataxac,

'eeta'am da choche qanaue'c naua na'a'che,

qataq huaigui naqa'en na qaica ca 'ena'am da lchec.

₃₄Ñim Lo'onatac 'Enauacna naxa da ỹo'otec da l-leuaxa somayepi,

nache somayepi qaltaq ỹe'eguelaxa da nmittaique Ñimaye.

₃₅Qaq huaña nache tachigui lauel co'ollaxa

Ñim Lo'onatac 'Enauacna maye Nataỹaña 'enauacna

maye mpaxattalec qataq nca'alaxattapeguec somayepi.

₃₆Qalaxaye na alap qataq ñi lachaxat,

choche nanoldec naua 'onaxaiqa latenataxanaxaco,

₃₇cha'aye saishet da ỹoqta 'eesa namayepi,

qataq saishet da qanayectelec da aỹamaxataxac.

₃₈Qalaxaye Ñimaye huo'o da lchoxonnataxanaxa namayepi,

nache ichoxoren da ỹapalaxat na qauemsat,

maye ỹo'ot namayepi qataq saishet da nlaxaañi,

qataq qalota naxa da choche ỹacha'ague da laỹe da lalemataic.

₃₉Cha'aye Ñim Lo'onatac 'Enauacna

tachigui lauel naxa da namayepi choche shiỹaxauapi,

qataq 'eeta'am na la'at da jec nache saishet da ñe'eguelaq.

₄₀Ỹataqta qalota da ỹe'eguelaxalec da saỹalaxaguet Ñim Lo'onatac 'Enauacna

qataq ỹo'otec da nqui'ic Ñimaye co'ollaq hualec ye toolec 'alhua.

₄₁Qataq nache queto'ot da ỹe'eguelaqtalec da ỹe'egueetac Ñimaye,

nache ỹaquicoqchettac Ñim qui'itta Natamnaxala' na Israel le'ecpi.

₄₂Qaq saishet da tagui lauel se'eso na'a'q,

co'ollaq Ñim Lo'onatac 'Enauacna irolec da la'añaxac,

da nca'alaxateeguesop na mpa'aguenaxauapi,

₄₃co'ollaq huaña ye no'onaxa maye huaigui ye Soán, ye Egipto,

da ỹo'ot co'ollaxa na lta'araicpi maye ỹo'ot da na'aalaxa.

₄₄Qataq co'ollaq nañigui naqa'en

na ntago'q na 'etaxat maye huetangui na talapi,

nache na Egipto le'ecpi saishet da nỹomigui se'eso 'etaxat.

₄₅Qataq namaxa aso ncoga da chec namayepi,

qataq ana miỹo da nlaxaañi namayepi.

₄₆Qataq na qoche'l da chec na lañiguishec ala,

qataq ana shiiquioxoi da yaqto' chec na lañiguishec.

₄₇Qataq irolec ana lache da nlaguiñi naqa'en ana lañiguishepi uvapi,

qataq irolec ana aloñi da nlaxaañi ana lañiguishepi higopi.

₄₈Nache ana lalo huaca qataq ana qagueta ileu,

souaxat ana lache qataq na nqashelgaxa.

₄₉Ñim Lo'onatac 'Enauacna namaxa somayepi da lta'araic layeloxo,

qaq de'era lalemataic, lhuaxanaxanaxac, que'eenaxac,

damaye 'eeta'am ca na'aqtaxanaxanec,

maye ỹa'axatta'aguet na que'eenaxaguesat.

₅₀Ỹataqta ỹaxaateueegue de'era lalemataic,

saishet da ichoxoreetac da nachaalataxac somayepi,

nacherata da ỹaneguet da l-leuaxa,

₅₁qataq ileu naqa'en so la'auaxanec llalec so lma' ye Egipto

so hua'auchiguiñi la'auaqteguishec llalec,

co'ollaq huaña na lanataxaquipi namayepi ye Cam.

₅₂Nache nqatec so Israel le'ecpi, 'eeta'am naqa'en ana nlo qagueta,

nache ỹauec se'eso lalamaxat nhuo' le'ecpi

quetalec naqa'en so toolec 'alhua.

₅₃Ỹataqta no'on naqa'en da lqauaxac,

yaqto' saishet da huo'o ca lcolanaxa,

qaq so mpa'aguenaxauapi qalaq ỹapolec naqa'en na 'etaxat aso auaxai.

₅₄Ñim Lo'onatac 'Enauacna nauega

so lalamaxat nhuo' le'ecpi na na'alhua maye qui'itta,

anam qasoxonaxa maye maiche lhuotaxanaqte Ñimaye.

₅₅Qataq nqateua'a na ỹotta'a't shiỹaxauapi

ỹauaachigui naqa'en na Israel le'ecpi,

qataq naloqchiichiguiñi na ỹanem 'alhua na maiche nhuo' le'ecpi,

nache ỹanaña na maiche lalamaxat lanataqa'pi.

₅₆Qalaxaye namayepi ñaq queto'ot,

da ỹe'egueetac Ñim Lo'onatac 'Enauacna,

maye Nataỹaña 'enauacna,

saishet da ỹalaxaguet Ñimaye

qataq sa ỹalaxaleguete naua lamaxasoxonaxaco.

₅₇Cha'aye nache 'eeta'am so lta'alpi,

da ca'ai naxa Ñimaye qataq ỹalat,

ỹataqta saq ỹataxalec 'eeta'am na checnec da namaxagui.

₅₈Qataq inogoqchet Ñimaye,

souaxat ana lca'atoxonaxalate na ỹotta'a't shiỹaxauapi,

da natameetacot na ỹaqa'a atamnaxala'pi,

nache ỹo'otteua'a da dalemata Ñimaye.

₅₉Nache Ñim Lo'onatac 'Enauacna

denoỹa somayepi souaxat da ỹauaachigui de'era,

nache sa ilo'oguet 'enauac ne'ena Israel le'ecpi,

₆₀qataq ca'ai so npe'l maye naña ye Silo,

maye lanataqa' naxa da netangui na shiỹaxauapi.

₆₁Huaña nache Ñimaye ỹasheetem na mpa'aguenaxauapi namayepi,

da ishet da loxona aso la'anaqte da llo'oxoyec qataq la'añaxac.

₆₂Ỹataqta dalemataỹa Ñimaye ne'ena lalamaxat nhuo' le'ecpi,

nache ỹaneguet na lainecpi na mpa'aguenaxauapi.

₆₃So nsoxoppi qalaq ileu, ỹavigaxatta so norec,

nache qaica ca do'onaxaalec da laronaxac ana huaron.

₆₄So ltaxaỹaxanaxanecpi qalaq ilem na ỹeelonec,

qaq ana pa'aipi qalaq saishet da nỹeelec so lamoxouapi.

₆₅Qaq huaña nache nlouec Ñim Nataxala' maye 'eeta'am da do'ocheta,

nache 'eeta'am ca loquiaxaic da nloueeguesop na ltaxa,

₆₆nache loxonec so mpa'aguenaxauapi qataq datauec naqa'en,

nache ỹo'otec da tatec naqa'en da la'aloxo somayepi.

₆₇Nataqa'en sa ilo'oguet na llalaqpi so José,

qataq saishet da lca'ateua'a na nhuo' le'ecpi maye chegoxoguetpi so Efraín.

₆₈Qalaxaye lca'ateua'a co'ollaxa na nhuo' le'ecpi maye chegoxoguetpi so Judá,

qataq añi lauotaqte qasoxonaxa ye Sión.

₆₉Nache no'oxoosheguem añi qui'itta atamnaxaqui,

ỹataqta qaỹoqotcheguemec 'eeta'am na piguem,

nache no'oxoochiguiñi 'eeta'am naqa'en ana 'alhua.

₇₀Qataq lca'ateua'a so lamaxashec David,

som ilotague' co'ollaxa ana qaguetapi,

₇₁nache nqateeguesop da ilotague' aso qaguetapi,

da yaqto' ilo'ogue na lalamaxat lauo' le'ecpi,

da yaqto' ilotague' na Israel le'ecpi.

₇₂Nache so David ilo'ogue co'ollaxa

na lalamaxat nhuo' le'ecpi Ñim Lo'onatac 'Enauacna,

nache ilotague' qataq ỹauecta'aguet,

qaica da nqalaate' da ilotague',

qataq da lquiyaqteỹaxac ỹataqta huesota.