Da noinaxac co'ollaq nlaguiñi ye Jerusalén
1'Am Qanatamnaxala',
na ỹotta'a't shiỹaxauapi nnoxotaua'a na 'aralamaxatpi,
qataq ỹe'enai' ana qui'itta atamnaxaqui maye 'aralamaqte,
qataq nlaxatchiguiñi na Jerusalén.
2Qataq ỹasaxauec da lo'ocỹaxac
na 'aramaxashecpi maye ỹataqta 'am quetague',
da yaqto' chec na teguesanpi qataq na shiguiỹacpi maye huauec.
3Qataq 'enauac na Jerusalén da icorelec na ltago'q somayepi
'eeta'am naqa'en da icorec na 'etaxat,
nache qaica ca ilayiñi na leuaxaicpi.
4Nache ỹataqta qomi' ỹe'enai'salo na qarhuoreuapi,
qataq qomi' ne'eetapiguilo na qomi' coleesopa.
5'Am Nataxala',
¿chaq laguio' da vi'iiguet da 'aralemataic?
¿peta'a chochaq tatec da 'ettaigui
da 'arayeloxo da 'eeta'am ca norec?
6Ña 'auasaxalec taxa da 'aralemataic na ỹotta'a't shiỹaxauapi,
maye saishet da 'am ỹauatton qataq saishet da 'am natameetacot.
7Cha'aye namayepi ỹataqta nlaxaañi so Jacob,
qataq nlaxatchiguiñi ne'ena 'alhua.
8Saishet qome da qomi' 'auasaxaleguete
na lasouaxashetpi so hua'au qarta'alpi,
nache sa 'auaỹaloxon da 'auanacot
da 'archoxonnataxanaxa da shenaqta,
cha'aye ỹataqta huo'o da qarachoxoyec.
9'Am Atamnaxala', maye 'am qarca'alaxaqui,
ña qomi' 'autaua'n, qomi' huesochiyiñi 'anqa'en,
qataq 'auapalaxat na qarasouaxashetpi,
souaxat da llo'oxoyec da 'are'enaxat.
10Yaqto' na ỹotta'a't shiỹaxauapi saishet da 'eeta':
«¿Hueta'ague ca Qanatamnaxala'ai?»
Ñaq sauanaqchigui 'anqa'en qome
da 'apalaique ca lvi' da l-leuaxa so 'aramaxashecpi,
yaqto' na ỹotta'a't shiỹaxauapi ishet da ỹaỹateeta de'era.
11Ñaq 'aulo'oguet qome da nachoxonnaxac na ncoñeteguishecpi,
qataq 'anca'alaxatec, 'aurolec da lta'araic 'ara'añaxac,
nam taỹa'a da nalaataguec.
12'Am Nataxala', siete qome da 'avi'eguelaxalec
da nque'eteeta 'anqa'en na qarhuoreuapi,
souaxat na qauemsat maye 'am ỹasaxalec.
13Qaq qomi' nhuo' le'ecpi maye 'aralamaxatpi,
maye shenaqta'am 'anqa'en ana qagueta da huetaigui aca laỹe',
nache 'eetai' qome da 'am sanaqtacot da qana'achec,
qataq so'onaqtac da 'ayo'oxoyec 'enauaque naua vi'iye.
