1Ime, nache sela'a so lỹa namaxashec piguem le'ec ỹataqta 'añaxaic, chegoqo'ot na piguem, huetaigui so lo'oc. Qaq huo'o so 'eeta'am da lo'oxoỹaxac na quemoxonalo coleesop na lqaic somaye. Qaq na lashec qalaq 'eeta'am na le'eraxa añi nala'. Qaq naua lchel 'eeta'am na le'eraxa na norec da nachatchiguiñi. 2Qaq na lhuaq qalaq nasoqta'a aso nerole ỹauattagui. Qaq so namaxashec piguem le'ec can vi'iiguet, nache na lapia' maye aloic petalec naqa'en aso auaxai, qaq na ne'emaq qalaq petalec naqa'en na 'alhua. 3Nache ỹataqta na'axannec da lavilỹaxac da detaqa, 'eeta'am na lỹa quiyoc da desoqtac; qaq can ỹa'alaq, nache qaỹa'axaỹalo soua siete nvilỹaxaco 'eeta'ama da l-lamaxa na nalataxa.
4Qaq aỹem mashe sauotaique da shiyiñi da la'aqta'c soua siete nvilỹaxaco co'ollaq sa'axaỹa so na'aqtac chemqot na piguem da aỹem 'enapega 'eeta':
«Saishet qome da 'iyiñi da la'aqta'c soua siete nvilỹaxaco maye 'eeta'ama na nalataxa, nachaqrata da qaica ca ỹaỹate'n 'anqa'en.»
5Qaq som namaxashec piguem le'ec maye selota'a petalec na 'etaxat qataq na 'alhua, somaye ỹachaxanot na piguem na lhuaq aloic. 6-7Nache ỹan da la'aqtac chegoqchigui da la'añaxac naqa'en Ñim Lo'onatac 'Enauacna da ipacchigui da ỹa'axat nache 'eeta': Ñim Lo'onatac 'Enauacna mashe saishet da huo'o ca iuatta'a. Qom ỹashiiyigui ara lasheere dam 'oonolec daua siete namaxa'she piguem lashe', nache Ñim Lo'onatac 'Enauacna ỹo'ot nam lapaqtañipi maye saishet da qaỹaỹaten. Qataq ỹo'ot 'enauac nam ỹa'axattac co'ollaxa som la'aqtaxanaxanecpi. Qaq se'eso namaxashec piguem le'ec ỹan da la'aqtac chegoqchigui da la'añaxac Ñim Lo'onatac 'Enauacna maye nache 'eetai' da nca'altauec qataq lo'onatac 'enauacna.
8Nache qaltaq sa'axaỹa so na'aqtac maye sa'aqtega co'ollaxa, chemaqtacot na piguem da ỹe'eguelaxalec da aỹem 'enapega, 'eeta': «'Asoma qome, 'auacona ara nerole maye ỹauattagui. 'Anqateeguesop na lhuaq da namaxashec piguem le'ec maye petalec ana auaxai qataq ana 'alhua.»
9Qaq aỹem ashec da ñeqo'ona so namaxashec piguem le'ec, nache seỹaxanot da aỹem ỹami' aso nerole. Qaq somaye aỹem 'enapega 'eeta': «Na', nache 'amatauo qome da qollec. Nache na 'ap qome ỹataqta ama, 'eeta'am na dapic lli'i da lamaic. Qaq na 'arhuel qome, qalaq ỹataqta chemgui.»
10Nache aỹem saconeguet aso nerole maye huetaigui na lhuaq so namaxashec. Ime, qaq sachec. Huaña, nache na aỹap ỹataqta ama, 'eeta'am na dapic lli'i da lamaic. Qalaxaye can lcopaguingui da sachec, nache ỹataqta chemgui naqa'en na iuel. 11Ime, nache aỹem qoỹenapega, qoỹeeta': «'Am iuen da 'aua'aqtaxanem na ỹotta'a't shiỹaxauapi ana 'alhua maye nataqa'en ỹotta'a't na la'aqtacpi qataq da lo'oxoỹaxac, nataqa'en na qalota nta'alpi ana 'alhua dam 'eetapeguec Ñim Lo'onatac 'Enauacna.»
