Soua dos na'aqtaxanaxanaqa
1Ime, nache aỹem qoỹami' so ỹataqta 'eetegue 'epaq maye naloqnaxanaxat, nache Ñim Lo'onatac 'Enauacna aỹem 'enapega 'eeta':
«'Aue 'anqo'ona añi no'onaxanaxaqui late'erai, nache 'analoqten ye lalogaxa qataq añim nca'atoxonaxalate, qataq 'analoqten ca lcata nam Aỹem ỹo'oxoreetacpi maye hueta'a añimaye. 2Qalaxaye saishet qome da 'analoqten ye nqasoxoc añi no'onaxanaxaqui, cha'aye yi'iye ndaqa' sanem nam saishet da ỹa'amaqten Aỹem. Namayepi ilo'ogue qome ye Jerusalén iviraxattre'c caua tres vi'iye qataq laiñi ca lỹa vi'i. 3Nache Aỹem sama'q caua dos ỹa'aqtaxanaxanaqa, da yaqto' ỹa'axa't da ỹataqta 'eesa ỹa'aqtaxanaxac. Qaq caamaye qom sama'q qalaq ỹaatrañi ñaqa'e'n caua alogo lasouaxaqui', da yaqto' ỹa'axat da ỹa'aqtaxanaxac iviraxattre'c que'ecaua tres vi'iye qataq ca laiñi ca lỹa vi'i.»
4Qaq que'ecaua dos ỹa'aqtaxanaxanaqa, nachesoua soua dos nañiguishe Olivo qataq dos ncoỹaraxanaxaqui' maye huetra'a ye naloteuga Ñim Lo'onatac 'Enauacna maye lataxala' 'enauac nam huetalec ana 'alhua. 5Qaq da huo'otaq huo'o ca nshetaique da ỹauo'o ca 'ena'aque, nache caamaye iquetetre'c na norec, nache ỹavigaxat 'enauac na ipa'agueetacpi iviraxata'a da ỹalauat. 6Caamaye huo'o da la'añaxa'c, da saishet naqa'en da auot iviraxattre'c caua tres vi'iye qataq ca laiñi ca lỹa vi'i maye huetoigui da da'aqtaxaata'ape. Qataq nataqa'en huo'o da la'añaxa'c da ishet da nañigui naqa'en da ntago'q na 'etaxat, qataq da ỹo'otec 'enauac na shiỹaxauapi maye huetalec ana 'alhua na ỹotta'a't qauemsat. Qataq ỹataqta maiche ỹoiqueeta'ape da ỹe'eguelaqtaleguete cam ỹo'otec namayepi.
7Qalaxaye que'ecaua dos ỹa'aqtaxanaxanaqa qome da ima't dam ỹa'axattrac dam 'eesa ỹa'aqtaxanaxac, nache so shiguiỹac leguemaxaic maye chegaqaña som laponqa' nam leuaxaicpi, iloquiaxa'n caamaye. Ime, qaq loxonqa, nache ỹalaua't. 8Nache da lo'ocỹaxa'c caamaye qaỹachetrangui na laiñi so nqa'aic lta'araic ye nỹecpi maye huaña co'ollaq qaỹalauat So Qarataxala' qaiuaxaneguet so npe'enaxaqui. Qaq na shiỹaxauapi ỹamata'ac yi'iye nỹecpi da naigui naqa'en da Sodoma qataq Egipto. 9Nache ivittre'c caua tres na'axa'te qataq ca laiñi ca lỹa na'a'q da imeteetac da lo'ocỹaxa'c caamaye na ỹotta'a't shiỹaxauapi maye ỹotta'a't na la'aqtacpi. Qataq saishet da qaỹashe'n da qailalyiñi da lo'ocỹaxa'c. 10Qaq 'enauac qome nam shiỹaxauapi maye huetalec ana 'alhua ỹataqta huo'o da ntonaxac qome da ilota'alo caamaye qom mashe ileu', nache ỹauo'o ca ntonaxac namayepi da qantootaleguete da l-leuqa't. Qaq souaxat da ntonaxac, nache ñi 'oonolec ỹamaxa ca lachetaqtaxanaxat ca lỹa, cha'aye ỹataqta lta'araic naqa'en co'ollaxa da nque'eenaxac na shiỹaxauapi se'esoua dos na'aqtaxanaxanaqa.
11Qalaxaye da inoxoore'c que'ecaua tres na'axa'te qataq ca laiñi ca lỹa na'a'q, nache Ñim Lo'onatac 'Enauacna qaltaq nca'alaxatre'c, nache caamaye qaltaq nachaayiñi; nache 'enauac na shiỹaxauapi maye ỹauaachiguilo ỹataqta lta'araic da lcolanaxa. 12Ime, qaq se'esoua dos na'aqtaxanaxanaqa hua'axaỹalo so nvilỹaxac ỹataqta lamaxaraic, 'eeta': «¡Qauanaisheguemec ne'ena pa'asheguem!»
Nache soomaye taresheguemec na piguem, huenoorelec so lo'oc, ỹauaachigui 'enauac nam ipa'agueetacpi soomaye. 13Qaq nache huetoigui da huo'o so lta'araic qalagoxoñi 'alhua, nache ilaxachigui ñi 'oonolec nam diez nỹecpi se'eso lta'araic nỹecpi, qataq ivi' siete mil so ileu shiỹaxauapi. Qaq som lca'alaxaicpi ỹataqta lta'araic da lcolanaxa, nache cheta'ague da ỹo'oxoreetac Ñim Lo'onatac 'Enauacna maye neta'ague da piguem.
14Qaq se'eso nacheso so nca'ataxanauo maye qauem talec somayepi, qalaxaye saqaỹaloq da nvi' cam lỹa maye pa'atec.
Aso pa'atec soua siete nasheerel
15Nache so pa'atec soua siete namaxa'she piguem lashe', ỹashiiyigui aso lasheere, nache na piguem chemqot so ỹataqta lamaxaraic nvilỹaxac, 'eeta':
«Ñim Qarta'a maye Lo'onatac 'Enauacna qataq Ñi Lca'aguishec,
mashe ilo'ogue 'enauac ana 'alhua.
Qaq da lo'onataxanaxac, damaye chochaq tatec.»
16Nache soua veinticuatro nqueroxonqa maye nso'ootrañi datato'ot Ñim Lo'onatac 'Enauacna, ỹa'alyiñi naua l-llectel qataq iviraxatra'agueta naqa'e'n na latap na 'alhua. Nache ỹo'oxoreetrac Ñim Lo'onatac 'Enauacna, 17'eeta':
«'Am Qarataxala' maye 'Aro'onatac 'Enauacna, qataq qaica ca 'auqalanapec;
'am maye 'anca'altauec,
qataq nache 'eetai' da 'am huo'o.
Qana'achec, cha'aye 'auachaxan da lta'araic 'ara'añaxac,
qataq mashe 'auo'onataxan da 'alo'ogue
'enauac ana 'alhua.
18Qaq nam ỹotta'a't shiỹaxauapi maye saq 'am ỹa'amaqten,
ỹataqta dalemata,
qalaxaye mashe ivita na na'a'q
da 'am 'auauo'o ca nhuaxanaguec 'enauac namayepi
'arolec da lta'araic 'arayeloxo.
Qataq da 'anmit 'enauac
nam mashe ileu,
qataq 'auauo'o ca nsheetenaguec nam 'ara'aqtaxanaxanecpi,
qataq na 'aro'onataxanaxanecpi,
qataq 'enauac na 'aralamaxatpi,
qataq nataqa'en nam huo'o naq 'enec naqa'en 'am;
na'aictaxa da huo'otaq 'amaqtaqaicpi
huo'otaq qaica ca la'amaqchec;
namayepi 'am 'auauo'o ca nsheetenaguec.»
19Huaña, nache nauatoiguilo soua laso'omi añi lo'onaxanaxaqui late'erai Ñim Lo'onatac 'Enauacna maye neta'ague da piguem, qaq ỹataqta yo'oqta aso laỹe' soua naỹamaxataxaco Ñimaye. Nache huo'o so nqashelgaxa, qataq huo'o so lta'araic nalataxa, qataq so lta'araic lacholaxanaxa ana 'alhua, qataq anac aso late'erai lache.
