Aso 'alo qataq so shiguiỹac leguemaxaic
1Ime, nache na piguem qaltaq huo'o so yo'oq lta'araic qataq sa qaỹauanapega: Huo'o aso 'alo nachattaigui añi nala', 'eeta'am da lapo'. Qaq ñi ca'agoxoic, qalaq petalec. Qataq asomaye ỹaatañi aso naro'o na nta'a. Qaq asa'aso aro'o netaguilo soua doce huaqaañi. 2Qaq asa'aso 'alo, asomaye hualaxai. Qaq ỹataqta dachetattac, nache ỹa'alaqtac, souaxat da huotaique da deco'o.
3Ime, qataq yo'oq so lỹa huo'ot na piguem, lta'araic qataq sa qaỹauanapega: Yo'oq so lta'araic shiguiỹac leguemaxaic togaxaraic da lo'oxoỹaxac, qaq somaye siete naua lqaigo, qataq diez soua lcouel. Qaq ñi 'oonolec soua lqaigo ỹaatañi ana naro'o na nta'a. 4Qaq so la'araxashet somaye ira'a da ỹanataxaalec ana 'alhua, som 'oonolec lpa'axac ana huaqaañipi maye neto'ot na piguem. Qaq se'eso shiguiỹac leguemaxaic, somaye nachatto'ot asa'aso 'alo maye huotaique da deco'o, da huotaique da chec so llalec da choche ñiguiñi.
5Qaq asa'aso 'alo ñiguiñi so llalec ỹale, som ỹataqta lta'araic da la'añaxac da ilo'ogue 'enauac nam ỹotta'a't shiỹaxauapi ana 'alhua. Qalaxaye se'eso llalec asomaye qaiuotaxanec, nache qaira'a cam hueta'a Ñim Lo'onatac 'Enauacna. 6Qaq asa'aso 'alo qalaq datauec, taỹa cam toolec 'alhua, qaq huaña da Ñim Lo'onatac 'Enauacna ỹami' ca lma' qataq ilo'ogue, iviraxattre'c caua tres vi'iye qataq ca laiñi ca lỹa vi'i.
So namaxashec piguem le'ec maye le'enaxat Miguel qataq so shiguiỹac maye leguemaxaic
7Ime, nache huo'o so lta'araic loquiaxac, huo'ot na piguem. Qaq huo'o so 'oonolec maye lataxala' na namaxashec piguem le'ecpi, le'enaxat Miguel, nnaictague' so nalleppi da delogui' so shiguiỹac leguemaxaic. Qaq se'eso shiguiỹac qataq so nalleppi ỹataqta deloctac. 8Qalaxaye saishet da ỹañoxot da dauegaxan, nache saishet da qaỹashenem da queta da neto'ot na piguem. 9Nachaqrata da qaỹamaqauec se'eso shiguiỹac leguemaxaic maye nacheso som na'araxanaq maye la'atchiguiñi: som le'enaxat da pa'aguenataxanaxaic. Somaye qataq so lamaxashecpi qaỹamaqauec da yaqto' talec ana 'alhua, nache somaye nalemaqte' da ỹatenachet 'enauac na huetalec ana 'alhua.
10Nache sa'axaỹa so na'aqtac ỹataqta alam, chemqot na piguem, 'eeta':
«¡Ñim Qarta'a maye Lo'onatac 'Enauacna
nca'alaxatec na lalamaxatpi;
qataq ỹachaxan da la'añaxac,
qataq nachaqñita da Nta'a!
Ñi Lca'aguishec Ñimaye, mashe do'onataxan,
ilo'ogue 'enauac na huetalec ana 'alhua.
Cha'aye so pa'aguenataxanaxaic mashe
qaỹamaqauec na piguem,
cha'aye ima'ape naua na'axa'te qataq naua pesa'ache,
da nachattaua'a Ñi Qarta'a maye Lo'onatac 'Enauacna
da ỹa'axattauo na 'eetega lasouaxashetpi na qarqaỹañicpi.
11Cha'aye da l-leuaxa Ñi Qagueta Llalec,
qataq da na'aqtaguec Ñimaye,
nachera da iqallem.
So qarqaỹañicpi saishet co'ollaxa da ñe'etac,
nachaqrata da ỹan da nachaalataxac da qaỹalauat.
12¡Qaq ỹoqo'oye iuen da ntonapigui' na piguem,
qataq 'enauac nam hueto'ot namaye!
Qalaxaye ¡ỹataqta qauem da taỹa'ague
nam huetalec ana 'alhua,
qataq nam huetangui aso auaxai!
Cha'aye so pa'aguenataxanaxaic ỹataqta dalemata;
taña na huetalec ana 'alhua da iloquiaxan.
¡Cha'aye somaye ỹaỹateeta da
sa qaỹalec ye ldaqa'!»
13Qaq se'eso shiguiỹac leguemaxaic, co'ollaq noma da mashe qanasaxaña ana 'alhua, nache icanapec aso 'alo maye cheta'ague da huo'o so llalec. 14Qalaxaye Ñim Lo'onatac 'Enauacna ỹanema asomaye soua dos laua't na vi'ic, da yaqto' huaỹo da datauec, nache qaỹoqta naqa'en so shiguiỹac leguemaxaic, taỹa so toolec 'alhua da yaqto' Ñim Lo'onatac 'Enauacna ilotague' asomaye iviraxattre'c caua tres vi'iye, qataq ca laiñi ca lỹa vi'i. 15Qaq se'eso shiguiỹac leguemaxaic iquetetec na 'etaxat chegaqaigui na alap, qaq nache chegoqchigui da huo'o so tala da huotaique da huaỹoxon naqa'en asa'aso 'alo. 16Qalaxaye ana 'alhua itauan asa'aso 'alo: nache huo'o so lauac anamaye, 'eeta'am da alap, nache iuoxonañi 'enauac se'eso 'etaxat maye iquetetec so shiguiỹac leguemaxaic. 17Qaq ỹoqo'oye se'eso shiguiỹac leguemaxaic ỹataqta dalemataỹa asa'aso 'alo, nache jec da iloquiaxan na no'onañi llalaqpi asomaye, qaq damaye 'eeta', nam ỹataqta ỹalaxaguet nam lamaxasoxonaxacpi Ñim Lo'onatac 'Enauacna, qataq saq ỹaxanec da lpi'iỹaxac So Jesús. 18Qaq se'eso shiguiỹac leguemaxaic vi'iiguet co'ollaq ivita so loigue aso auaxai.
