So shiguiỹac leguemaxaic maye chegaqangui aso auaxai
1Ime, nache sauaachigui da nnoxoosheguem so shiguiỹac leguemaxaic chegaqangui aso auaxai, somaye diez soua lcouel qataq siete soua lqaigo. Qaq añi 'oonole lcoue ỹaatañi ana naro'o na nta'a, qaq ñi 'oonolec naua lqaigo, nanettalec na ne'enaxatpi maye ỹataqta npa'agueneto Ñim Lo'onatac 'Enauacna. 2Qaq se'eso shiguiỹac leguemaxaic, 'eeta'am da lataxac na quiyoc, qaq naua lchel, qalaq 'eeta'ama ana potai. Qaq na alap qalaq 'eeta'am na lỹa quiyoc. Qaq se'eso hua'auñi shiguiỹac leguemaxaic maye 'eeta'am na na'araxanaq ỹanem da la'añaxac da damaxasoxonapec se'eso shiguiỹac leguemaxaic maye chegaqangui aso auaxai. 3Qaq so 'oonolec soua lqaigo se'eso shiguiỹac maye chegaqangui aso auaxai 'eeta'am da huo'o so lta'araic lque'emaxa maye ishet da ilem. Qalaxaye se'eso lque'emaxa no'oita; nache ỹo'otec da 'enauac nam huetalec ana 'alhua ỹataqta huo'o da la'aalaxa, qataq huaña, nache ỹa'amaqten se'eso shiguiỹac. 4Huaña, nache 'enauac qaỹo'oxoren se'eso hua'auchiguiñi shiguiỹac leguemaxaic maye 'eeta'am na na'araxanaq, cha'aye souaxat da ỹanem da la'añaxac da damaxasoxonapec se'eso lỹa shiguiỹac maye chegaqangui aso auaxai, qataq nataqa'en qaỹo'oxoren somaye qoỹeeta':
«Qaica ca lỹa da 'eeta'am da la'añaxac ñi'iñi shiguiỹac leguemaxaic maye chegaqangui aso auaxai. Qataq qaica ca ishet da delogui' ñimaye.»
5Qaq se'eso shiguiỹac leguemaxaic qaỹasheetem da 'eetega 'amaqtaqaic qataq da ỹa'axat da 'eetega nacheñi Ñim Lo'onatac 'Enauacna. Qataq nataqa'en qoỹami' da lo'onataxanaxac ca nta'a iviraxattre'c caua cuarenta y dos ca'agoxoiqa. 6Qaq da ivilde'c que'ecaua ca'agoxoiqa, nache chegoqchiguiña da isheueetac Ñim Lo'onatac 'Enauacna qataq añi lo'onaxanaxaqui late'erai qataq 'enauac nam hueto'ot na piguem. 7Nataqa'en qaỹasheetem se'eso shiguiỹac leguemaxaic da iloquiaxan 'enauac nam lalamaxatpi Ñim Lo'onatac 'Enauacna, qataq ivitta'a da 'enauac loxonec. Qataq qoỹami' da la'añaxac da yaqto' maiche ỹoiqueetac 'enauac nam ỹotta'a't shiỹaxauapi maye ỹotta'a't na la'aqtacpi qataq ỹotta'a't na netañapi ana 'alhua. 8Qaq se'eso shiguiỹac leguemaxaic, na shiỹaxauapi maye huetalec ana 'alhua ỹataqta ỹo'oxoreetac somaye, nam saishet da nanettalec ca le'enaxat aso lere Ñi Qagueta Llalec maye qaỹalauat co'ollaxa. Asa'aso nere asomaye qaỹo'ot co'ollaq saxanaxa da ỹo'ot ana 'alhua Ñim Lo'onatac 'Enauacna, qaq asomaye nanettalec 'enauac na le'enaxatpi nam chochaq tatec da lca'alaxa.
9Qaq cam huo'oi naua ltela lauaco, qaq no'on da ỹataqta na'axaỹaxaachigui de'era.
10«Cam taalec da taua'a qanqa'en añi ncoñetaxanaxaqui,
qalaq nachañi qaỹauegueua'a;
qaq cam taalec da qaira'a ca ỹeelonec da qaỹalauat,
qaq camaye qaỹauota'a ỹeelonec da qaỹalauat.»
Qaq de'era naigui da na lalamaxatpi Ñim Lo'onatac 'Enauacna, iuen da ỹaỹaten da na'añaxateguet da nque'eenaxac, qataq queto'ot da lpi'iỹaxac Ñimaye.
So shiguiỹac leguemaxaic maye chegaqaigui ana 'alhua
11Ime, qaltaq sela'a so lỹa shiguiỹac leguemaxaic, somaye chegoqtoigui ana 'alhua. Qaq somaye dos soua lcouel, 'eeta'am na qagueta llalec, qalaxaye naua la'aqtaqa 'eeta'am so shiguiỹac leguemaxaic maye 'eeta'am na na'araxanaq; 12qaq somaye ỹaconeguet co'ollaxa da la'añaxac ỹachegoxoto'ot som hua'auchiguiñi shiguiỹac leguemaxaic, qataq nache do'onataxaatacot somaye. Qaq somaye ỹamaxalec na shiỹaxauapi maye huetalec ana 'alhua da ỹo'oxoren se'eso hua'auchiguiñi shiguiỹac leguemaxaic, maye no'oita co'ollaxa so lta'araic lque'emaxa maye ishettaxa da ilem. 13Nataqa'en somaye ỹo'ot nam saq qaỹauanapega da ỹauachigui naqa'en na shiỹaxauapi, qataq ivira'a da chegoqo'ot naqa'en na piguem na norec da talec ana 'alhua. 14Qaq se'eso shiguiỹac leguemaxaic ỹatenachet na shiỹaxauapi da chegoqchigui naqa'en nam ỹo'otpi maye saq qaỹauanapega da do'onataxaatega da na'añaxac maye ỹachegoxoto'ot so hua'auchiguiñi shiguiỹac leguemaxaic. Ime, nache ỹamaxalec da ỹo'ot ca le'enaqtac maye lqui'i so hua'auchiguiñi shiguiỹac leguemaxaic, som huo'o co'ollaxa so lta'araic lque'emaxa, que'emaxam so ỹeelonec, qalaxaye saishet da ilem. 15Qaq Ñim Lo'onatac 'Enauacna ỹami' se'eso lỹa shiguiỹac leguemaxaic da ishet da ỹami' da lca'alaxa se'eso ne'enaqtac maye lqui'i som hua'auchiguiñi shiguiỹac leguemaxaic da yaqto' ishet da detaqa. Qaq 'enauac nam saishet da ỹo'oxoren se'eso ne'enaqtac maye lqui'i som hua'auchiguiñi shiguiỹac leguemaxaic qoỹaneguet da nalaataguec. 16Nataqa'en damaxasoxoolec da 'enauac na shiỹaxauapi da qaỹauo'o ca na'anaxat na lhuaq aloiguishec huo'otaq na latap. Saishet da qoỹectega da sallaxanecpi huo'otaq choxoraqpi, 'amaqtaqaicpi huo'otaq qaica ca la'amaqchec huo'otaq nam huesochiguiñipi qataq nam nlatacpi, 'enauac iuen da huo'o ca na'anaxat. 17Huaña, nache saishet da huo'o ca desheenaxana huo'otaq da imen cam saishet da hueto'ot asa'aso na'anaxanaqte, huo'otaq som le'enaxat som shiguiỹac leguemaxaic, huo'otaq ye lcata na leraxatpi so le'enaxat somaye. 18Qaq de'era iuen ca naỹaanec da yaqto' ishet da qaỹaỹaten: da huo'o ca huo'o na ỹaỹaten, nache iuen da npogoxoinapegue' da anata cam naigui ye lcata so le'enaxat so shiguiỹac leguemaxaic, cha'aye yi'iye lcata se'eso leraxat lalamaxat ca shiỹaxaua. Qaq ye lcata se'eso ne'enaxat ivi' seiscientos sesenta y seis.
