So dalaxaic no'onec
1Qaq can ime, nache qaltaq ñamatasheguem, nache sela'a So Qagueta Llalec petalec añi qaỹoqotcheguemec 'alhua le'enaxat Sión. Qaq Somaye nache hueta'aguet som ciento cuarenta y cuatro mil shiỹaxauapi maye quetague' Somaye, som qoỹettalec na latap da le'enaxat som Qagueta Llalec qataq da le'enaxat Ñim Lo'onatac 'Enauacna maye Lta'a. 2Ime, qaq sa'axaỹa so nvilỹaxac chemqot na piguem. Somaye 'eeta'am da l-lamaxa na lta'araic la'auaxac, qataq 'eeta'am na lta'araic nalataxa; qataq 'eeta'am na l-lamaxa ana qalota nviquepi da qaiviqueetapigui. 3Qaq som ciento cuarenta y cuatro mil shiỹaxauapi maye nachattaua'a aso so'onaxaqui qataq soua cuatro shiguiỹa'c maye nca'altraue'c qataq soua veinticuatro nqueroxonqa soomaye ỹo'ootac so dalaxaic no'onec maye saishet da huo'o ca na'a'q nache qaỹa'aqtega. Se'eso no'onec qaica ca ishet da ỹaỹaten na leraxat, nachaqsota som shiỹaxauapi maye qanca'alaxatec, chegoqtoigui na laỹepi shiỹaxauapi maye huetalec ana 'alhua. 4Qaq somayepi nacheso som saishet da ỹo'oxoreetac nam qanatameetacotpi maye choche ne'enaqtacpi qataq saq 'en qataq saishet da sa ỹalaxaguet Ñim Lo'onatac 'Enauacna; 'enauac somayepi ca'attague' ñi Qagueta Llalec cam dataigue, qataq qanca'alaxatec somayepi da yaqto' la'auaxanec nachetaqtaxanaxat da qoỹanot Ñim Lo'onatac 'Enauacna qataq ñi Qagueta Llalec, 5cha'aye ỹataqta saishet da nauane' da datenataxan, huo'otaq da ỹo'ot ca qauem.
Da la'aqtaxanaxa'c soua tres namaxa'she piguem lashe'
6Ime, qataq sela'a so lỹa namaxashec piguem le'ec, huaỹotac, queto'ot na piguem. Ỹachetac da no'on na'axaỹaxac maye huo'o naq 'enec qataq qaica ca loga't, da yaqto' da'aqtaxanem 'enauac na ỹotta'a't shiỹaxauapi maye netalec na ỹotta'a't 'alhuapi qataq ỹotta'a't na la'aqtacpi. 7Somaye ỹataqta na'axannec da la'aqtac, 'eeta':
«Ỹataqta huo'o naq 'enec qanqa'eñi Ñim Lo'onatac 'Enauacna, qataq qavio'oxoyiñi;
cha'aye mashe ivita ye laloqo'
da Ñimaye nmit na shiỹaxauapi ana 'alhua.
Qavio'oxoyiñi Ñim lo'onatac
na piguem qataq ana 'alhua,
qataq aso auaxai, qataq anam npaxaatasheguem na le'ec 'etaxat.»
8Qaq ca'attaueegue so lỹa namaxashec piguem le'ec nataqa'en detaqtac, 'eeta':
«Mashe noxonec ye lta'araic nỹecpi le'enaxat Babilonia,
mashe sogote da qailaxachigui yemaye,
cha'aye yemaye ỹapaxaguenec 'enauac nam ỹotta'a't shiỹaxauapi
da lasouaxashet, qataq da ỹalaxaguet naqa'en nam qanatameetacotpi maye saq 'en.»
9Ime, qataq ca'attalec so lỹa namaxashec piguem le'ec, nataqa'en ỹataqta na'axannec da la'aqtac, 'eeta':
«Da huo'o ca ỹo'oxoreetac ñi shiguiỹac leguemaxaic qataq som lqui'i ñimaye qataq da huo'otaq ỹasheeta da qaỹauo'o ca na'anaxat na latap, huo'otaq na lhuaq, 10nache Ñim Lo'onatac 'Enauacna ỹataqta dalemataỹa camaye qataq ỹataqta lta'araic ca nque'eenaxac naqa'en. Qaq que'eca nhuaxanaguec saishet da isotta, nachaqrata da nque'etaxangui na norec le'eraxa qataq nam quiquiaxaraic maye ỹavictaigui. Qaq nam qui'itta namaxashecpi piguem le'ecpi qataq Ñi Qagueta Llalec ỹauaachigui da nque'eenaxac camaye. 11Qaq na lmala'q ca norec maye ỹo'ot da nque'eenaxac qalaq nache 'eetai' da ncheteguisheguem, cha'aye nam natameetacot som shiguiỹac leguemaxaic qataq so ne'enaqtac maye lqui'i somaye qataq na qaỹa'an da qaỹa'anaxana da le'enaxat somaye, saishet da vi'iiguet da nque'eenaxac ye na'a'q qataq ye pe.»
12Qaq ỹoqo'oye na lalamaxatpi Ñim Lo'onatac 'Enauacna, iuen da ỹaỹaten da lhueneguet qataq na'añaxateguet na lqalaiguesat qataq na nque'eenaxacpi. Nataqa'en iuen da ỹalaxaguet nam lamaxasoxonaxacpi Ñim Lo'onatac 'Enauacna qataq queto'ot da ỹa'amaqteetac So Jesús.
13Ime, nache sa'axaỹa so na'aqtac chemqot na piguem, aỹem 'enapega, 'eeta':
«'Iyiñi qome de'era: ‹¡Ỹataqta machiguiñi qome nagui ca ileu, da huo'otaq na'attaua'a So Qarataxala' Jesucristo!›»
Qaq som Saqcha'a La'añaxac Ñim Lo'onatac 'Enauacna 'eeta': «Aja', nache 'eetec, cha'aye namayepi nmateeguesop 'enauac nam nque'eenaxacpi qataq lqalaiguesat, qaq Ñim Lo'onatac 'Enauacna ỹauo'o ca nsheetenaguec namayepi souaxat nam qalota no'on maye ỹo'ot.»
Ca pa'atec nmitaguec 'enauacna
14Ime, qaltaq ñamatasheguem, nache sela'a so lo'oc na piguem lapagaxaic, qaq se'eso lo'oc nso'ootalec so 'eeta'am na shiỹaxaua llalec. Somaye ỹaatañi aso naro'o na nta'a maye chegaqaigui na oro, qataq lasoqta'a so lpetegaxanaxat ỹataqta ỹaxaraic. 15Qaq so lỹa namaxashec piguem le'ec chegoqtoigui aso no'onaxanaxaqui, somaye ỹataqta na'axannec da la'aqtac da 'enapega som nso'ootalec so lo'oc, 'eeta': «¡'Aquesoxoñi na 'arpetegaxanaxat. Ime, qaq 'aqataxan! Cha'aye ana ala na nañiguishec mashe ỹe qataq mashe ivita ye laloqo' da qalaỹona't.»
16Qaq som nso'ootalec so lo'oc na piguem, nache iquesoxoñi so lpetegaxanaxat da yaqto' nqat ana ala na nañiguishec maye huetalec ana 'alhua.
17Ime, nache chegoqtoigui aso no'onaxanaxaqui so lỹa namaxashec piguem le'ec, nataqa'en ỹachetac so lpetegaxanaxat ỹataqta ỹaxaraic. 18Qaq aso nca'atoxonaxalate, nache chegoqtelec so lỹa namaxashec piguem le'ec maye hueto'ot da la'añaxac na norec, nache 'enapega so namaxashec lỹa piguem le'ec maye ỹachetac so lpetegaxanaxat maye ỹataqta ỹaxaraic 'eeta': «¡Ña 'aquesoxoñi na 'arpetegaxanaxat maye ỹataqta ỹaxaraic! Ime, qaq 'alapona't ana ltaxale ana uva maye huetalec ana 'alhua, cha'aye anamaye mashe ỹataqta ỹeta.»
19Nache se'eso namaxashec piguem le'ec, somaye iquesoxoñi so lpetegaxanaxat da nqat ana ala ana uva maye huetalec ana 'alhua. Ime, nache ỹasaxangui aso late'erai laponaxaqui anamaye, da yaqto' nlom na lli'i. Qaq damaye, nache naigui dam qaica ca 'ena'am lalemataic Ñim Lo'onatac 'Enauacna. 20Qaq asa'aso uva can qanlom na lli'i, qalaq huaña qanqa'en som pa'aueegue da laỹe ye nỹecpi. Nache asa'aso laỹe' da qanlom anamaye, chegaqangui so ỹataqta lta'araic ntago'q, nache ivi' un metro y medio ye ivirasheguema, qaq ye lcachiguiñi se'eso ntago'q ivi' trescientos kilómetros.
