1Qaq aỹem sela'a so hueto'ot na piguem ỹataqta sa qaỹauanapega: soua siete namaxa'she piguem lashe', ỹacheta'ape soua pa'atre'c napaxaco maye talec naqa'en qome ana 'alhua. Qaq qom ime de'era, nache da layeloxo Ñim Lo'onatac 'Enauacna vi'iiguet.
2Nataqa'en sela'a so 'eeta'am ana auaxai ye lcachiguiñi ỹataqta chauec ỹalecteguet na norec. Qaq asa'aso 'eeta'am aso auaxai nachattalec som nauec co'ollaxa so shiguiỹac leguemaxaic, qataq saishet da nashen da qaỹauo'o ca na'anaxat na lo'oc da qaỹa'anaxana da le'enaxat so shiguiỹac leguemaxaic qataq saishet da natamnot som ne'enaqtac maye lqui'i somaye. Qaq Ñim Lo'onatac 'Enauacna ỹami' aso lviquepi somayepi. 3Nache somayepi ỹo'ootac som lo'onec so Moisés da qaỹo'oxoren So Qagueta Llalec maye 'eeta':
«'Am Qarataxala' maye 'Aro'onatac 'Enauacna, qataq qaica ca 'auqalanapec,
'enauac nam 'auo'otpi
ỹataqta lta'araicpi, qataq huo'o da llo'oxoyec.
'Am maye 'am Lataxala' 'enauac nam huetalec ana 'alhua,
'enauac na 'auo'otpi
ỹataqta ỹaỹamaqchiguiñi, qataq nalochiguiñi.
4'Am Ita'a,
'enauac da huo'o naq 'enec qanqa'en 'am qataq 'am qaỹo'oxoreetac,
cha'aye 'am 'oonolec da 'am qui'itta.
'Enauac na ỹotta'a't shiỹaxauapi ana 'alhua,
anac da 'am ỹo'oxoren,
cha'aye ỹaỹateeta
da 'am ỹataqta no'on da 'arataxac.»
5Qaq can ime de'era, nache qaltaq samato'ot na piguem, nache sela'a aso no'onaxanaxaqui da nauatoigui. 6Qaq nache chegoqtroiguilo soua siete namaxa'she piguem lashe' ỹachetra'c soua siete napaxaco maye qaica ca 'ena'am da lche'c maye taỹa'alo da yo'o'q. Nataqa'en soomaye ỹaatrañi soua alogo maye chegaqaiguilo na lino, maye ỹataqta qaỹoqtegue añi lasheue ỹataqta qui'itte' qataq qashelectrapiguiñi, qataq naua ltogue npaxattaleguete na lpaqtaxanaxa't ndota't na chegaqaigui na lcat le'enaxat oro. 7Nache so 'oonolec soua cuatro shiguiỹa'c maye nca'altraue'c ỹami' aso ỹomaxaqui nlaqchigui na lataxa ñi 'oonolec soua namaxa'she piguem lashe'. Qaq se'esoua siete ỹomaxaqui' maye huetagui na lataxa, naigui da layeloxo Ñim Lo'onatac 'Enauacna Ñim nache 'eetai' da nca'altauec. 8Nache asa'aso no'onaxanaxaqui ỹataqta nlaqchigui na lmala'q maye chegaqaigui dam la'amaqchec qataq da la'añaxac Ñim Lo'onatac 'Enauacna. Huaña, nache saishet da huo'o ca qaỹashenem da pa'aigui aso no'onaxanaxaqui qom saxanaxa da nvi' se'esoua siete napaxaco maye ỹacheta'ape soua siete namaxa'she piguem lashe'.
