Aso nere qataq So Qagueta Llalec
1Qaq aỹem sela'a aso nere qainaata'a't huetaigui na lhuaq aloiguishec so nso'ootangui aso so'onaxaqui. Ana lauepi asomaye qalaq 'enauaque naua laỹel da huo'o na leraxat. Qaq asomaye qaitoqootaleguete soua siete na'anaxanaqtel da qaỹapotagui. 2Ime, nache sela'a so namaxashec piguem le'ec ỹataqta qaica ca 'ena'am da la'añaxac. Somaye ỹataqta nlamaxaren da denataxaatac, 'eeta':
«¿Negue't ca ishet da nqa't naua na'anaxanaqtel, ime, nache ỹauachigui ara nere?»
3Qalaxaye qaica ca 'oonolec ana 'alhua da ỹañoxot da ỹauachigui aso nere, da yaqto' imeten nam huetalec. 4Qaq aỹem ỹataqta ñeỹeetac, souaxat da qaica ca ishet da ỹañoxot da ỹauachigui da itaxaỹaxan asa'aso nere. 5Qalaxaye huo'o so 'oonolec som nqueroxonecpi aỹem 'enapega, 'eeta':
«Saishet da qoqueto'ot da 'anỹeetac, cha'aye Ñim talec da lo'onataxanaxac co'ollaxa so nta'a David, Ñim qaiỹaxana naxa da quiyoc lỹa maye chegoxoguet so Judá, Ñimaye mashe dauegaxan. Qaq ỹoqo'oye nachaqñita da huo'o da 'enec da nqa't naua siete na'anaxanaqtel qataq ishet da ỹauachigui ara nere.»
6Ime, nache sela'a So Qagueta Llalec hueta'a ye saqaỹapeque aso so'onaxaqui. Qaq Somaye ỹataqta yo'oqta so lliguiñi so ỹeelonec co'ollaq qaipelecot na lqosot da qoỹaneuo da qaỹavigaxat. Qaq Somaye nachattañi, qaq soua shiguiỹa'c maye nca'altraue'c qataq soua veinticuatro nqueroxonqa coleesopa Somaye. Qaq somaye siete naua lcouel qataq siete naua la'ai'te. Qaq nachenaua naua siete saq cha'alo la'añaxaco Ñim Lo'onatac 'Enauacna maye qaỹamaxalec 'enauac ana 'alhua. 7Qaq se'eso Qagueta Llalec jec da ỹacona aso nere maye qainaata'a't, huetaigui na lhuaq aloic som nso'ootangui aso so'onaxaqui. 8Qaq co'ollaq chochaq ỹo'ot de'era, nache soua cuatro shiguiỹa'c maye nca'altraue'c qataq soua veinticuatro nqueroxonqa ỹa'aroto naua l-llectel Somaye. Qaq ñi 'oonolec se'esoua nqueroxonqa huo'o ana lvique, qataq lasoqta'a soua ỹomaxaqui' maye nlaqchigui na nchenaxanaxat ama na laita maye naigui da nqouagaxaunaxac na lalamaxatpi Ñim Lo'onatac 'Enauacna. 9Qaq 'enauac somayepi ỹo'ootac de'era dalaxaic no'onec maye 'eeta':
«'Am 'oonolec da 'aiguet da 'auacona ara nere
qataq 'anqa't naua na'anaxanaqtel maye qaiuaxaataleguete aramaye.
Cha'aye 'am qaỹalauat co'ollaxa,
qaq soua 'artago'q,
nache chegoqchiguilo da 'anca'alaxatec da
lalamaxat 'anqa'en Ñim Lo'onatac 'Enauacna
'enauac na ỹotta'a't shiỹaxauapi,
maye ỹotta'a't naua la'aqtaqa.
10Nache 'aỹa'anagui da nta'alpi
qataq ntaxaỹaxanaxanecpi
da qaitaxaỹapegue' Ñim Lo'onatac 'Enauacna;
Namayepi ilo'ogue 'enauac na
shiỹaxauapi maye huetalec ana 'alhua.»
11Ime, qaq aỹem sa'axaỹa da l-lamaxa so qalota namaxashecpi piguem le'ecpi. Somayepi ỹataqta qaica ca ivi' da naloqten, coleesop aso so'onaxaqui, qataq soua cuatro shiguiỹa'c maye nca'altraue'c qataq soua veinticuatro nqueroxonqa. 12Qaq somayepi ỹataqta nlamaxaren da detaqtac, 'eeta':
«Ñim Qagueta Llalec maye qoỹaneuo
co'ollaxa da qaỹavigaxat da qaỹauo'o nachetaqtaxanaqte,
nacheñi nagui ñi taiguet da ỹaconeguet da
namaxasoxonaxac qataq da nsallaxa,
naỹaanec, qataq da na'añaxac,
na'amaqchec, qataq ño'oxonnataguec.»
13Nataqa'en sa'axaỹa 'enauac nam lo'onatacpi Ñim Lo'onatac 'Enauacna, 'eeta':
«¡'Onaxaic da 'enauac qaỹo'oxoren
Ñim nso'ootangui añi so'onaxaqui
qataq nataqa'en Ñim Qagueta Llalec!
'Onaxaic da qaiỹaxana Ñim huo'o da llo'oxoyec,
qataq Ñim nache 'eetai' da huo'o da
na'aalaxa da lamaxasoxonaxac.»
14Qaq soua cuatro shiguiỹa'c maye nca'altraue'c 'eetra': «¡Aja', nache 'eetec!» Qaq soua veinticuatro nqueroxonqa ỹa'alyiñi naua l-llectel, nache ỹo'oxoreetrac som nso'ootangui aso nso'onaxaqui qataq So Qagueta Llalec.
