Apocalipsis 6

₁Qaq co'ollaq choche nqat aso 'oonole soua siete na'anaxanaqtel se'eso Qagueta Llalec, nache aỹem sa'axaỹa so 'oonolec se'esoua cuatro shiguiỹa'c maye nca'altraue'c da lavilỹaxac 'eeta'am na nalataxa, 'eeta': «¡'Aỹala, ña 'anquigueuo!»

₂Qaq aỹem samata'a somaye, nache sela'a da nnoxonec so caaỹo lapagaxaic. Qaq so netalec somaye nasoqta'a aso lchecna qataq so lchecnec, nache somaye qoỹami' aso naro'o na nta'a. Cha'aye nauec so npa'aguenaxauapi, qataq cha'aye nache 'eetai' da dauegaxaatai'.

₃Qaq se'eso Qagueta Llalec, can qaltaq nqat aso lỹa na'anaxanaqte, nache sa'axaỹa da la'aqtac so lỹa shiguiỹac maye nca'altauec, 'eeta': «¡'Aỹala, ña 'anquigueuo!»

₄Nache nnoxonec so lỹa caaỹo togaxaraic. Qaq Ñim Lo'onatac 'Enauacna ỹanem se'eso netalec somaye da la'añaxac, da yaqto' nlaxaañi da nlagaxayec ana 'alhua, qataq da yaqto' ỹo'otec da ñi 'oonolec shiỹaxaua ỹalauat ca lỹa. Qataq ỹanem so lta'araic lainec somaye.

₅Qaq se'eso Qagueta Llalec can qaltaq nqat aso lỹa na'anaxanaqte, nache qaltaq sa'axaỹa so la'aqtac so lỹa shiguiỹac maye nca'altauec, 'eeta': «¡'Aỹala, ña 'anquigueuo!»

Qaq samata'a, nache sela'a so lỹa caaỹo lairaxaic. Qaq so netalec, somaye nasoqta'a aso naloqnaxanaxaqui. ₆Nache sa'axaỹa so na'aqtac chemaxangui na laiñi soua cuatro shiguiỹa'c maye nca'altraue'c, 'eeta': «Añi lasheue ca 'onataxanaxaic ye 'oonolec na'a'q, nalotalec da qaisheenaxana ca un kilos na trigo huo'otaq ca un kilos na cebada. ¡Qalaxaye saishet qome da huo'o ca qona'ac na aceite qataq na lataxa!»

₇Qaq So Qagueta Llalec can nqat aso pa'atec soua cuatro na'anaxanaqtel maye hua'auchiyiñi da qanqa't, nache sa'axaỹa so la'aqtac so lỹa shiguiỹac maye nca'altauec, 'eeta': «¡'Aỹala, ña 'anquigueuo!»

₈Ime, nache sela'a so lỹa caaỹo qovialec da lo'oxoỹaxac qataq ỹataqta qauem. Qaq som netalec somaye le'enaxat Nleuaxa. Qaq so ilotague' da lo'onataxanaxac da nleuaxa ca'attaueegue somaye. Qaq 'enauaque soomaye ỹaconegueta da la'añaxa'c da yaqto' ỹalauat na shiỹaxauapi so 'oonolec naua cuatro lpa'axaco namayepi ana 'alhua, irolec ca alaataxac, qataq na nqouaxa, qataq na nalolaxa qataq nam shiguiỹacpi dequi'iỹapec maye huetalec ana 'alhua.

₉Qaq se'eso Qagueta Llalec can qaltaq ivita da nqat aso cinco soua na'anaxanaqtel, nache sela'a da som qaỹalauatpi co'ollaxa, souaxat da ỹa'axattac da la'aqtac Ñim Lo'onatac 'Enauacna, hueto'ot aso nca'atoxonaxalate. ₁₀Nache somayepi ỹataqta na'axannec da la'aqtac, 'eeta': «'Am maye 'Aro'onatac 'Enauacna, qataq qaica ca 'auqalanapec qataq ỹataqta 'am qui'itta qataq nache 'eetai' da 'am 'eesa. ¿Chaq lagui da 'auauo'o ca 'arvi' da 'avi'enaxata'aguet nam qomi' ỹalaua't co'ollaxa? Qataq ¿Chaq lagui da 'auo'ot ca nhuaxanaguec namayepi?»

₁₁Nache Ñim Lo'onatac 'Enauacna ỹanema naua alogo lapagaxaiqa somayepi, nache 'enapega da ñaq cara'ac da deuataxanapec, cha'aye ñaq saxanaxa da imauec da ileu nam ỹa'amaqteetac So Cristo, maye iuen da ileu nataqa'en da 'ena'am somayepi.

₁₂Qaq se'eso Qagueta Llalec can qaltaq ivita da nqat aso seis soua na'anaxanaqtel, qaq samata'a, nache huo'o so lta'araic qalagoxoñi ana 'alhua. Qaq añi nala' qalaq 'om, qaq ñi ca'agoxoic qalaq ỹataqta 'eeta'am na ntago'q da ltogaxa. ₁₃Qataq ana huaqaañipi qalaq naañi, talec ana 'alhua, 'eeta'am ana ala aca 'epaq da naañi souaxat na la'at da ỹacholaxan. ₁₄Qaq na piguem qalaq nquicta'a't da sa qaila'a, 'eeta'am da 'eetec da qainana't aca neraxanaxalate, qataq 'enauac anam qaỹoqotcheguemec 'alhuapi qataq anam ỹaqauga 'alhuapi qalaq nqochen ca'ai na hueta'api.

₁₅Qaq huaña, nache 'enauac na nta'alpi maye ilotague' nam netalec ana 'alhua, qataq nam 'amaqtaqaicpi shiỹaxauapi huo'o da npogoxoinaxac da 'enauac da nqañoxotoiguilo naua auaco, nataqa'en nqañoxototo naua coma'ye maye netaiguilo ana qaỹoqotcheguemec 'alhuapi. Nataqa'en nqañoxooñi na lta'alpi na huataxanaq, qataq na sallaxanecpi, qataq na 'añaxaicpi, qataq 'enauac nam nlatacpi qataq nam huesochiguiñipi. ₁₆Qaq 'enauac namayepi detaqtacot ana qaỹoqotcheguemec 'alhuapi qataq na coma'pi, 'eeta':

«¡Ña qomi' qaupataqaiyiñi qome, yaqto' saishet da qomi' ila'alo ñi nso'ootangui añi nso'onaxaqui! ¡Qataq saishet da ỹauo'o ca qanhuaxanaguec Ñi Qagueta Llalec! ₁₇Cha'aye mashe ivita ye laloqo' da Ñim Lo'onatac 'Enauacna qataq Ñi Qagueta Llalec da ỹauo'o ca qanhuaxanaguec, qaq qaica ca ishet da dataỹa'aguet da nhuaxanaguec.»